ءتورت بالاسىن ءبىر ءوزى تاربيەلەپ وتىرعان قايرات اليپانوۆ اياق استىنان مۇنداي قۋانىش بولادى دەپ ويلاماعان دا شىعار. ەڭ كىشى بالاسىنىڭ جاسى ۇشتە. جالعىزىلىكتى اكە ۇزاق جىل بويى پاتەر جالداپ كۇنەلتتى.
توبەسىنەن سۋ وتكەن, ەدەنى سىز, قابىرعالارى قاقىراعان تالاي ءۇيدى امالسىزدان پانالادى. ەكى بالاباقشانىڭ بىرىندە سانتەحنيك, بىرىندە اۋلا سىپىرۋشى بولىپ ەڭبەك ەتىپ ءجۇرىپ, پەرزەنتتەرىن قاتارلارىنان قالدىرماۋعا تىرىسىپ باقتى.
ەندى, مىنە, جاپ-جاڭا, ساۋلەتى كەلىسكەن باسپانادا قونىس تويىن تويلاپ جاتىر. اليپانوۆتار وتباسىنا «نۇر وتان» پارتياسى اتىراۋ قالالىق فيليالى فراكتسياسىنىڭ مۇشەسى الىبەك سەمعاليەۆ جايلى ءۇي سىيلادى. دەپۋتاتتىڭ بۇل ىزگى ىسىنە ەل قۋاندى. قايرات اليپانوۆتى قونىسىمەن قۇتتىقتاي كەلگەن ۇجىمداستارى دا قازاقى جورالعىمەن شاشۋ شاشتى.
– قايرات – قايسار اكە, بالالارىنا بارىن توسىپ وتىرعان قامقور اكە. ۇجىمداستارى دا كومەكتەرىن اياماي, قولۇشتارىن بەرىپ كەلەدى. بالانى اناسىز تاربيەلەۋدىڭ جۇگى اۋىر. وسىنداي ازاماتقا كومەكتەسكەن الىبەك سەمعاليەۆتىڭ جاقسىلىعى كوپكە ۇلگى بولسا ەكەن, – دەيدى №27 بالاباقشانىڭ باسشىسى گۇلايىم قاشكەنوۆا.
ءوزى دە جاستايىنان اتا-اناسىنان ايىرىلىپ, بالالار ۇيىندە وسكەن قايرات اليپانوۆ: «كۇنى-ءتۇنى پەرزەنتتەرىم مەن كورگەن قيىندىقتاردى كورمەي وسسە ەكەن دەپ تىلەيتىنمىن. ءوز ۇيىڭە ەمىن-ەركىن كىرىپ-شىققاننان, ەشكىمگە كىرىپتار بولماعاننان ارتىق باقىت بار ما؟ وسىنداي قۋانىش سىيلاعان ازاماتتارعا العىسىم شەكسىز», دەيدى.
اتىراۋ قالالىق ءماسليحاتىنىڭ دەپۋتاتى الىبەك سەمعاليەۆ جالعىزىلىكتى اكەنىڭ جاعدايىن ەستىگەننەن كەيىن ءبىر سەپتىگىم تيسە دەپ ويلاعانىن ايتادى. قونىس تويىنا الماتى قالالىق ءماسليحاتىنىڭ دەپۋتاتى قايرات قۇدايبەرگەن دە ارنايى كەلىپ قاتىسىپ, وتباسىنا قاجەت جيھازداردى سىيعا تارتتى.
باقىتگۇل باباش, «ەگەمەن قازاقستان»
اتىراۋ