وسىدان جەتى جىل بۇرىن ولكەتانۋشىلارمەن بىرگە تورعاي دالاسىنا جاسالعان تاريحي-تانىمدىق ەكسپەديتسيا قۇرامىندا بولعانىمىزدا, احمەت بايتۇرسىنوۆتىڭ كىندىك قانى تامعان اقكول توڭىرەگىندەگى كول اتتاس اۋىلعا دا جولىمىز تۇسكەن. اۋزىن اشسا, جۇرەگى كورىنەتىن اۋىل ادامدارى ەكسپەديتسيانى كۇتىپ الىپ, سول ولكەنىڭ تاريحى تۋرالى اڭگىمە تيەگىن اعىتقان ەدى. سول جولى ىزبان اۋىلدىق وكرۋگىندە باس مامان بولىپ قىزمەت ىستەيتىن رابيعا جاقىپبەكوۆا اپامىز اۋىل مەكتەبىندەگى مۋزەي بۇرىشىنان اۋزىن كەرە اشقان, تىستەرى قاسقىردىڭ تىسىندەي اقسيىپ تۇرعان شورتاننىڭ باسىن كورسەتكەن ەدى. ءبىز سول ءساتتى فوتواپپارات وبەكتيۆىنە باسا قويىپپىز.
– احاڭنىڭ اقكولىنەن وسىدان 3-4 جىل بۇرىن اۋىلداعى اماندىق ولجاباەۆ دەگەن جىگىتتىڭ اۋىنا تۇسكەن شورتاننىڭ سالماعى 17 كيلوگرامم تارتتى. اۋىلداستاردىڭ بارىنە ءدام اۋىز تيۋگە جەتكەن بولاتىن. بالىقتىڭ باسىن مەكتەپ مۋزەيىنە سول جىگىتتىڭ ءوزى اكەلىپ بەردى, – دەگەن ەدى اپاي. شورتان بالىق قوستاناي-تورعايدىڭ وزگە دە وزەن-كولدەرىندە دە كەزدەسەدى. بىراق شورتان بىتكەننىڭ تۇرقى كىسى بويىنداي, سالماعى وسىنشا تارتا بەرمەيتىنى راس. بالىعى شورشىپ جاتاتىن اقكولدىڭ ءبىر بايلىعى, قاسيەتى بولار دەپ ويلاعانبىز.
بىراق سوڭعى جىلدارى اقكولگە جىلانشىق وزەنى قۇيۋدى قويعان بولاتىن. ون شاقتى جىل سۋ جەتپەگەن سوڭ, كولدىڭ تابانى قۇرعاپ, بالىقتىڭ قىرىلعان كەزى دە بولدى. بىراق تابيعاتتىڭ بىزبەن بولىسە بەرمەيتىن قۇپياسى مول-اۋ. بيىل قىس جۇمساق بولىپ, قار از تۇسسە دە, اقكول سۋعا تولىپ, كەمەرىنەن اسىپتى. تەك اقكول ماڭى عانا ەمەس, جالپى تورعاي دالاسىنا سۋ جايىلدى. اقكولدىكتەردىڭ دە, تورعاي وڭىرىندەگىلەردىڭ قۋانىشىندا شەك جوق. اقكول, سول باياعى بالا احمەت جاعالاۋىندا جۇگىرگەن اقكول تۇك بولماعانداي تولقىپ جاتىر. اۋىل ادامدارى بۇل كۇندە قايتادان قارماعىن دايىنداپ, اۋ توقۋعا كىرىسكەن. اماندىقتىڭ اۋىنا تۇسكەن شورتان مۋزەيدە عانا تۇرا ما دەگەن اۋىلداستاردىڭ ۋايىمى سەيىلگەندەي.
ءنازيرا جارىمبەت, «ەگەمەن قازاقستان»
قوستاناي وبلىسى, جانكەلدين اۋدانى