ورتالىق كوممۋنيكاتسيالار قىزمەتىندە «سلاۆيانسكي بازار ۆ ۆيتەبسكە» حالىقارالىق ونەر فەستيۆالىنە ارنالعان ءباسپاسوز ءماسليحاتى ءوتتى. حالىقارالىق ونەر فەستيۆالى بەلارۋس مەملەكەتىن دۇنيە جۇزىنە تانىمال ەتكەنى بەلگىلى. 1995 جىلدان باستاپ فەستيۆال بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو مىرزانىڭ جەكە قولداۋىمەن, كوپ جىلدار ارالىعىندا وسى مۋزىكا فورۋمى باسقا ەلدەر مەن حالىقتار ارالىعىندا مادەنيەتتەر ديالوگىنىڭ دامۋىنا ىقپال ەتىپ كەلەدى.
«قازىرگى ۋاقىتتا فەستيۆالدىڭ اشىق اسپان استىندا وتپەۋى مۇمكىن ەمەس, سەبەبى سۋرەتشىلەردىڭ كەرەمەت شىعارمالارى, شەبەرلەر قالاسى, حالىقتىق ۇيىمدار بۇكىل حالىققا كوشەلەردە كورسەتىلەدى. فەستيۆال كۇندەرى ءداستۇرلى تۇردە وداقتاس مەملەكەتتەر كۇنى, بەلارۋس, رەسەي, ۋكراينا ونەر شەبەرلەرىنىڭ گالا-كونتسەرتى, «فەستيۆال بەز گرانيتس», «تەاترالنىە ۆسترەچي», «زۆەزدنىي چاس» باعدارلامالارى وتكىزىلەدى. وسى كەرەمەت فەستيۆالدە قازاقستان كۇنىن وتكىزۋ ەگەمەندى قازاقستاننىڭ ءوز الەۋەتىن تولىعىمەن اشىپ كورسەتىپ, جاڭا مادەنيەتتىك بايلانىستار ورناتۋعا مۇمكىندىك الادى. جاس ارتىستەرگە ۇلكەن ساحنادا ونەر كورسەتۋ مۇمكىندىگىن ءجيى بەرىپ تۇرۋ كەرەك, سەبەبى مۇنداي تاجىريبە ولاردىڭ ءارى قاراي شىعارماشىلىق دامۋىنا سەبەپ بولادى. ونىڭ ۇستىنە, ونەر توبىنىڭ ءوز تالانتتارىن ورتاعا سالۋى قازاقستان ەرەكشەلىگىن الەمدىك ارەنادا تانىتۋعا ۇلەسىن قوساتىنى انىق. سلاۆيان بازارىنداعى قازاقستان كۇنى « ۇلى دالا ونەرى» اتىمەن تۇڭعىش رەت وتكىزىلمەكشى. ءبىز ەلىمىزدىڭ ەرەكشەلىگى مەن ءتول مادەنيەتىن جانە بۇگىنگى تاڭداعى تابىستارىن حالىقارالىق دەڭگەيدە ورتاعا سالىپ, جاريا ەتۋدى ماقسات تۇتىپ وتىرمىز», دەدى مادەنيەت قايراتكەرى, قازاقستان مەن ورتالىق ازياداعى «سلاۆيانسكي بازار» حالىقارالىق فەستيۆالىنىڭ رەسمي وكىلى قارلىعاش ابدىكارىموۆا.
«سلاۆيانسكي بازار ۆ ۆيتەبسكە» كونكۋرسىنا قاتىسىپ, ەلىمىزدىڭ مارتەبەسىن كوتەرگەن ونەرپازداردىڭ اراسىندا الىشەر كارىموۆ, دينارا سۇلتان, ديماش قۇدايبەرگەن, ادام, ەرجان ماكسيم, لۋيزا نۇرقۋاتوۆا بار. ال بيىلعى بايقاۋدا قازاقستاننىڭ نامىسىن كوپشىلىك تىڭدارمانعا «امىرە» دەگەن اتپەن تانىلعان ءانشى ەرنار سادىرباەۆ قورعايتىن بولادى.
راۋان قايدار, «ەگەمەن قازاقستان»