رونالدۋ مەن مەسسي مۋنديالمەن قوشتاستى

العاشقى جۇپتىڭ جارناماسى جارقىراپ, الادوپقا اڭسارى اۋعان ادامداردىڭ دەلەبەسىن قوزدىردى. ەندى شە, فرانتسيا مەن ارگەنتينا وسى كۇنى جەر شارىنداعى ەڭ تاڭ­داۋلى فۋتبولشىلاردان جاساق­تالعان. سوڭعى ەۋروپا چەم­پيوناتىنىڭ ءفيناليسى مەن سوڭعى الەم چەمپيوناتىنىڭ ءفيناليسى اراسىنداعى ويىن قىزىقسىز وتپەسى بەلگىلى. قوس كوماندانىڭ سوڭعى وتكەن 2 ءىرى دودادا جولى بولماعان. كۋبوكقا قولى سىنىق سۇيەم قالعاندا جەتپەي قالىپ ەدى. بۇل جولعى ويىن كۇتكەننەن دە تارتىستى ءوتىپ, كورەرمەننىڭ كوزايىمىنا اينالدى.

فرانتسيا قۇراماسى سالعان جەردەن باسىمدىعىن كورسەتىپ, ەۋروپا فۋتبولىنىڭ اناعۇرلىم مىقتى ەكەنىن بايقاتتى. بىراق, 5 مارتە «التىن دوپتى» يەلەنگەن لەونەل مەسسي قايتا-قاي­تا پاس بە­رىپ, ارگەنتيناعا ءۇمىت وتىن سىيلادى. دي ماريا گريز­مان سوق­قان پەنالتيگە 27 مەتر قاشىق­تىقتان گول سوعىپ, جاۋاپ قاتتى. بۇل وسى الەم چەمپيو­ناتىنداعى ەڭ الىس قا­شىقتىقتان سالىنعان گول بولىپ تىركەلدى. ايتپەسە, فۋت­بول­شىلار الىستان سوققى جا­ساۋدى قويعان ەدى. بيىلعى چەم­پيوناتتىڭ دا ەرەكشەلىگى سوندا بولىپ تۇر. كۇللى كوماندا كوم­بيناتسيالىق ويىن كورسەتىپ, شابۋىلداردى دا ەسەپپەن جاسايتىنداي بولىپتى. بۇرىندارى مۇنداي جاعدايدى كوپ بايقاي بەرمەيتىنبىز.

فرانتسيا ساپىنداعى وليۆە جيرۋ مەن انتۋان گريزمان سەكىلدى جۇلدىزدارعا كوز تىگىپ, سولاردىڭ اياعىنا قاراپ وتىرعانىمىزدا تاسادان شىققان جاس جۇلدىز كيليان مباپپە جارق ەتە ءتۇستى. 2 گول سالىپ, ءبىر پەنالتي جاساعان جاس پەرى فرانتسيانىڭ جەڭىسكە جەتۋىنە سۇبەلى ەڭبەك ءسىڭىردى. 19 جاسىندا الەم چەمپيوناتىندا 3 گول سالىپ ۇلگەرگەن شابۋىلشىنى تاريحي رەكوردتار كۇتىپ تۇرعان سىڭايلى. مۋنديالدار تاريحىندا 16 گول سوققان سۇرمەرگەن ميروسلاۆ كلوزەنىڭ جەتىستىگىن قايتالاۋى مۇمكىن شابۋىلشى ءدال قازىر وسى مباپپە.

ديدە دەشام شاكىرتتەرى ارگەنتينانى 4:3 ەسەبىمەن جەڭىپ, شيرەك فينالعا جولداما الدى. ال ولاردىڭ كەلەسى كەزەڭدەگى قارسىلاسى ۋرۋگۆاي – پورتۋگاليا اراسىنداعى ويىندا انىقتالدى. بۇل ماتچتا دا ءبىر فۋتبولشىنىڭ جەكە-دارا ەرەكشەلەنىپ, كوزگە تۇسكەنىن بايقادىق. سىمداي تارتىلعان, بويىندا ارتىق ەتى جوق ارعىماقتاي شابۋىلشى ەدينسون كاۆاني ەكى گول سوعىپ, ۋرۋگۆايعا جەڭىس سىيلادى. ال پورتۋگاليا قورعاۋشى پەپەنىڭ بۇرىشتاما كەزىندە سوققان جالعىز گولىمەن عانا جاۋاپ قاتتى. كريشتيانۋ رونالدۋ باستاعان جىگىتتەردىڭ ودان ارعىعا شاماسى جەتپەدى. سونىمەن شيرەك فينالدا فرانتسيا مەن ۋرۋگۆاي قۇرامالارى كەزدەسەدى.

وسى ورايدا جانكۇيەرلەر ولاردىڭ كەلەسى كەزەڭگە وتكەنىنەن گورى كريش­تيانۋ رونالدۋ مەن ليونەل مەسسيدىڭ مۋنديالمەن قوش ايتىسقانىن جار سالىپ ايتۋدا. سوڭعى 10 جىلدا «التىن دوپتى» كەزەك-كەزەك الىپ, وزگەلەردەن وق بويى وزىق تۇرعان قوس فۋتبولشى قۇرامالارىمەن بىرگە 1/8 فينالدان ءارى اسا المادى. رونالدۋدىڭ يسپانيا قاقپاسىنا سوققان حەت-تريگى بولماسا, لەو ەكەۋىنىڭ تىندىرعانى شامالى بول­دى. ەندى شاماسى بيىلعى «التىن دوپتىڭ» تالاسى قىزا تۇ­سەتىن سەكىلدى. سەبەبى برازيليا قۇراماسىنداعى نەيماردىڭ دا كۇللى اياقدوپشىنىڭ كوز جاۋىنا اينالعان سىيلىققا تالاسى بار. ول ءۇشىن نەيمار برازيليانى العا سۇيرەپ, چەمپيوندىققا جە­تەلەۋى ءتيىس.

ايتپاقشى, برازيليا بۇگىن مەكسيكامەن كەزدەسەدى. ال ەكىنشى ويىندا بەلگيا مەن جاپونيا ۇشىراسادى. اتالعان جۇپتاردىڭ جەڭىمپازدارى شيرەك فينالدا ءبىر-بىرىنە قارسىلاس اتانادى.

ەرمۇحامەد ماۋلەن,

«ەگەمەن قازاقستان»