كيەلى اۋليەاتا وڭىرىنەن شىعىپ, بۇگىندە ەلىمىزدىڭ ءاربىر سالاسىندا جەتىستىككە جەتكەن ازاماتتار از ەمەس. قازاق ادەبيەتىنە, عىلىمىنا, مادەنيەتى مەن سپورتىنا ۇلەس قوسىپ جۇرگەن جاندارعا لايىقتى قۇرمەت قاشاندا ەلدىكتىڭ بەلگىسى. ەلدىڭ داڭقىن شىعارعان ەرلەردىڭ ەسىمى ۇرپاق ءۇشىن ءاردايىم ونەگە.
ىلگەرىدە جامبىل وبلىسىنىڭ جانە تاراز قالاسىنىڭ قۇرمەتتى ازاماتتارىنىڭ, وليمپيادا, الەم جانە ازيا چەمپيوناتتارى جەڭىمپازدارىنىڭ ەسىمدەرى كونە شاھار ورتالىعىنداعى قايرات رىسقۇلبەكوۆ اتىنداعى ساياباق الدىندا ورنالاسقان «ەڭبەك داڭقى» اللەياسىنداعى «قۇرمەت تاقتاسىنا» ەنگىزىلگەن بولاتىن. تاسقا قاشالىپ جازىلعان تاريحي ەسىمدەر ءاردايىم ەلدىڭ ەرگە دەگەن قۇرمەتىن ارتتىرىپ كەلەدى.
بۇگىنگى تاڭدا اتالعان «قۇرمەت تاقتاسى» وبلىستىق تاريحي-ولكەتانۋ مۋزەيىنە اۋىستىرىلعان ەدى. وسى ورايدا ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ نەگىزىندە وبلىستىق مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن مۋزەيگە قويىلعان «قۇرمەت تاقتاسىنىڭ» تانىستىرىلىمى ءوتتى. شارا بارىسىندا باسقارما باسشىسىنىڭ ورىنباسارى سارا ماديەۆا تاقتانىڭ جانىنا سەنسورلى دۇڭگىرشەك ورناتىلىپ, وعان قۇرمەتتى ازاماتتار مەن چەمپيوندار تۋرالى بارلىق مالىمەتتەر ەنگىزىلەتىنىن ايتتى. ەندى تىزىمدەگى ازاماتتار جايىندا ارنايى بەينەروليكتەر دايىندالىپ, الگى دەرەكقورعا ەنگىزىلەتىن بولادى. مۋزەيگە كەلۋشىلەر بۇدان بىلاي ءوڭىردىڭ قۇرمەتتى ازاماتتارى مەن سپورت جەڭىمپازدارى تۋرالى بارلىق اقپاراتتى وسىندا ورناتىلعان شاعىن عانا دۇڭگىرشەكتەن تابا الادى.
جالپى, «جامبىل وبلىسىنىڭ قۇرمەتتى ازاماتى» اتاعى تۇڭعىش رەت ءبىرىنشى شاقىرىلعان وبلىستىق ءماسليحاتتىڭ 1999 جىلعى 17 قىركۇيەكتەگى ءححىىى سەسسياسىنىڭ شەشىمىمەن داڭقتى قىزىلشاشى, سوتسياليستىك ەڭبەك ەرى داريعا جانتوقوۆاعا بەرىلگەن ەكەن. ال تاراز قالاسىنىڭ تۇڭعىش قۇرمەتتى ازاماتى – ەلباسى نۇرسۇلتان نازارباەۆ. پرەزيدەنتكە قۇرمەتتى اتاق تاراز قالالىق ءماسليحاتىنىڭ 1997 جىلعى 8 قاڭتار كۇنگى كەزەكتەن تىس سەسسياسىندا بەرىلىپتى.
جيىن بارىسىندا وبلىستىق ارداگەرلەر كەڭەسىنىڭ توراعاسى, تاراز قالاسىنىڭ قۇرمەتتى ازاماتى سانسىزباي جورابەكوۆ, ەركىن كۇرەستەن لوندون وليمپياداسىنىڭ جانە الەم چەمپيوناتىنىڭ قولا جۇلدەگەرى اقجۇرەك تاڭاتاروۆ ءسوز الىپ, بۇل باستاماعا ريزاشىلىق ءبىلدىردى. وبلىستىق تاريحي-ولكەتانۋ مۋزەيىنىڭ ديرەكتورى گۇلنۇر ەمبەرديەۆانىڭ ايتۋىنشا, تاراز قالاسىنىڭ قۇرمەتتى ازاماتى اتاعىن 139 ازامات العان ەكەن. ال 60 ازامات ءار جىلدارى وليمپيادا, الەم جانە ازيا چەمپيوناتتارىنىڭ جەڭىمپازى اتانعان. «قۇرمەت تاقتاسى» ءوزىنىڭ لايىقتى ورنىن تاپتى دەپ ويلايمىز. ەندى ءوڭىر تۇرعىندارىمەن قاتار, ءار ايماقتان جانە شەتەلدەن كەلگەن قوناقتار وسى بۇرىشتان قۇرمەتتى ازاماتتارىمىزدى تانىپ, وزدەرىنە كەرەكتى بارلىق مالىمەتتى الا الادى», دەيدى مۋزەي باسشىسى.
حاميت ەسامان,
«ەگەمەن قازاقستان»
جامبىل وبلىسى