قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ عالىمدارى اپورت الماسىنىڭ جاڭا كوشەتتەرىن ءوسىرىپ, تاراتۋدى قولعا الۋدا, دەپ حابارلايدى وقۋ ورنىنىڭ ءباسپاسوز جانە قوعاممەن بايلانىس ءبولىمى.
ۋنيۆەرسيتەتتىڭ قاپشاعاي قالاسىنىڭ ماڭىنداعى اگروبيوستانتسيا كەشەنى اۋماعىن ءتيىمدى پايدالانۋ, بولاشاق مامانداردىڭ ءبىلىمىن تاجىريبەمەن ۇشتاستىرۋ باعىتىندا قولعا الىنعان بۇل جوبانىڭ ءونىمى تەك ديقاندار ءۇشىن عانا ەمەس, سونداي-اق وتاندىق بيولوگ عالىمدار مەن تۇرعىندار ءۇشىن دە ۇلكەن ماڭىزعا يە.
جاراتىلىستانۋ فاكۋلتەتىنىڭ عالىمدارىنىڭ ايتۋىنشا, ايگىلى اپورتتىڭ بۇل سورتىنىڭ تاتتىلىگى بۇرىنعىدان جوعارى, جەمىستى ەرتە بەرەدى. ءونىم ءتۇسىمى مول.
– رەسمي دەرەكتەرگە سۇيەنەر بولساق, الماتىلىقتار جىلىنا 17 مىڭ توننا اپورت جەيدى ەكەن. سودان دا بولار, وڭتۇستىك استانا بيلىگى ۋاقتىسىندا داڭقى دۇركىرەگەن اتاقتى اپورتتى قايتادان كوبەيتۋگە تىرىسىپ جاتىر. مەملەكەت باسشىسى نۇرسۇلتان نازارباەۆ الماتىعا كەلگەن ساپارىندا المانىڭ بۇل ءتۇرىن قايتا جاڭعىرتۋدى ناقتى تاپسىرعان بولاتىن. بۇگىندە وسى باعىتتا بىرقاتار ىستەر جۇيەلەنىپ, اۋقىمدى جۇمىستار جاسالۋدا. ەگەردە قولعا الىنعان جوسپارلار مەن جوبالاردىڭ بارلىعى جۇزەگە اسسا بولاشاقتا الماتىنىڭ اتىن شىعارعان اپورت قايتا تۇلەمەك. ءبىزدىڭ دە باستى ماقساتىمىز وسىعان سايادى, – دەيدى قىزدار ۋنيۆەرسيتەتىنىڭ عالىمدارى.
مامانداردىڭ پايىمداۋىنشا, اپورتتىڭ ازايۋىنا نەگىزگى سەبەپ – ەكولوگيالىق فاكتور. سونىمەن قاتار, اپورت باقتارىنا ارنايى ساراپتاما جاسالماي, انالىق اعاشتاردىڭ جۇيەسىز كوبەيتىلۋى دە ءوز اسەرىن تيگىزۋدە.
– بۇرىن ىلە الاتاۋىنىڭ تابيعاتى اتالعان الما سورتىن وسىرۋگە قولايلى بولعان-تىن. اپورت تەڭىز دەڭگەيىنەن 900-1200 مەتر بيىكتىكتە جاقسى وسەدى. ويتكەنى, وسى شامادا قاجەتتى جىلۋعا جاقسى قانىعادى. ال سوڭعى ۋاقىتتا جەمىس اعاشتارىنىڭ ءوسۋ دەڭگەيى تىم تومەندەپ كەتتى. وسىنىڭ اسەرىنەن جىلۋ ارتىقتىعى سەكىلدى ءتۇرلى فاكتورلار المانىڭ بۇرىنعى قۇنارلىعىن جوعالتتى. ءبىز اپورت كوشەتتەرىن ءوسىرۋ بارىسىندا وسىعان باسا ءمان بەرەمىز, – دەپ اتاپ ءوتتى بيولوگ عالىمدار.