الماتىداعى «گوركي تەننيس پارك» كەشەنىندە ATP Challenger سەرياسىنىڭ تەننيستەن ءىرى حالىقارالىق ءتۋرنيرىنىڭ العاشقى كەزدەسۋلەرى ءوتتى, دەپ حابارلايدى اقپاراتتىق جانە سپورتتىق حاب.
Almaty Challenger تۋرنيرىنە 25 ەلدەن كەلگەن 100-گە جۋىق تەننيسشى قاتىسۋدا – ولاردىڭ ىشىندە الەم رەيتينگىسىنىڭ توپ-جۇزدىگىنە كىرەتىن تەننيسشىلەر دە بار. ال ەل نامىسىن الەكساندر نەدوۆەسوۆ, تيمۋر حابيبۋللين, رومان حاسانوۆ جانە دەنيس ەۆسەەۆ سىندى ۇزدىك تەنيسشىلەر قورعايتىن بولادى.
جارىستىڭ سالتاناتتى اشىلۋ راسىمىنە قازاقستان, الماتى تەننيس فەدەراتسياسىنىڭ وكىلدەرى, «گوركي تەننيس پارك» جەتەكشىلەرى, سونىمەن قاتار, سپورتشىلار مەن حالىقارالىق دارەجەدەگى تورەشىلەر قاتىستى. تەننيستەن قازاقستان فەدەراتسياسىنىڭ ۆيتسە-پرەزيدەنتى دياس دوسقاراەۆ بارلىعىن بايراقتى باسەكەنىڭ اشىلۋىمەن قۇتتىقتاپ, قاتىسۋشىلارعا ساتتىلىك تىلەدى!
- ءبىز وسىمەن ءۇشىنشى رەت الماتىدا وسىنداي ءتۋرنيردى وتكىزۋدەمىز, ءتىپتى, قالانىڭ يگى داستۇرىنە دە اينالىپ ۇلگەردى. پرەزيدەنت كۋبوگىنان كەيىنگى ەڭ اۋقىمدى تۋرينيرلەردىڭ ءبىرى - ATP Challenger. بۇگىنگى تاڭدا, ەلىمىزدە تەننيس قارقىندى دامىپ كەلەدى. وتكەن جىلعى ناتيجەلەرمەن سالىستىراتىن بولساق, تۋرنير ەكى ەسە كۇشەيىپ, مارتەبەسى دە ءبىرشاما كوتەرىلدى. بىراق, بۇل ءوز كەزەگىندە باسەكەنى دە كۇشەيتتى, ءبىزدىڭ سپورتشىلارعا وڭاي بولمايدى, - دەپ ءبولىستى دياس دوسقاراەۆ.
جارىستىڭ جۇلدە قورى $50000 قۇرايدى, اقشالاي سىيلىقتان بولەك, قاتىسۋشىلار ATP رەيتينگتىك ۇپايلاردى جيناپ, دەڭگەيلەرىن كوتەرۋگە مۇمكىندىك الادى.
ءبىرىنشى كۇننىڭ ناتيجەلەرىن ايتاتىن بولساق, ەلىمىزدىڭ ۇزدىك جۇبى تيمۋر حابيبۋلين مەن الەكساندر نەدوۆەسوۆ كەرەمەت باستادى, جاقسى ناتيجە كورسەتۋدە. ەۋروپادان كەلگەن مىقتى جەكە ساناتتاعى تەننيسشىلەرگە قاراماستان, ءبىزدىڭ سپورتشىلار دا جۇلدەلى ورىنداردى ساراپقا سالادى دەگەن ۇمىتتەمىز. اسىرەسە, دياس دوسقاراەۆ يسپاندىق كاسىپقوي تەنيسشىمەن كەزدەسەتىن دەنيس ەۆسەەۆتى اتاپ ءوتتى.
- تۋرنير مەن ءۇشىن جاقسى ءوتتى. وكىنىشكە وراي, كەرەمەت ويىن ۇلگىسىن كورسەتە المادىم. وسىنداي ايتۋلى دوداعا ءۇشىنشى رەت قاتىسۋدامىن, بۇل مەن ءۇشىن تاجىريبيە. ۇيىمداستىرۋ جاعىنان بارلىعى كەرەمەت, بازا دا جاقسى. ەۋروپا مەن ازيادان كەلگەن ۇزدىك ويىنشىلارمەن باستەسۋدىڭ ءوزى ۇلكەن مارتەبە. كەلەشەكتە, نەمىس تەننيسشىلەرمەن باق سىناسقىم كەلەدى. ولار وسى ءتۋرنيردىڭ ۇزدىكتەر قاتارىندا, - دەپ اتاپ ءوتتى قازاقستان قۇراماسىنىڭ تەننيسشىسى بەيبىت جۋكاەۆ.
ەسكە سالا كەتسەك, تەننيستەن «Almaty Challenger» حالىقارالىق ءتۋرنيرى 16 ماۋسىمعا دەيىن جالعاسادى, سول كۇنى جەڭىمپازدار مەن جۇلدەگەرلەر ەسىمدەرى انىقتالادى.