قوستاناي وبلىسىندا 29 كيەلى جەرلەر بەلگىلەنىپ, ولاردىڭ كارتاسى جاسالعان بولاتىن. وسى ساكرالدىق ورىنداردىڭ 10-ى جالپىۇلتتىق ماڭىزعا يە, قالعان 19 جەرگىلىكتى مازمۇندا بولىپ سانالادى. رەسپۋبليكا ماقتانىشىنا اينالعان ساكرالدى ورىندارعا قوستاناي وبلىسىندا تورعاي گەوگليفتەرى, قامىستى مەكەنى, ەكىدىڭ ءدىني ەسكەرتكىشى, باراق, جاۋكە, ىبىراي التىنسارين, مىرجاقىپ, ابدىعاپار حان, كەيكى باتىر كەسەنەلەرى, سونىمەن قاتار امانگەلدى باتىر جەرلەنگەن ورىن جاتادى.
بيىل وبلىس وڭىرىندەگى كيەلى ورىندار, ەسكەرتكىشتەردىڭ بىرقاتارى جوندەلىپ, قالپىنا كەلتىرىلەدى. وعان بيۋدجەتتەن تىس 88,5 ميلليون تەڭگە قارجى تارتىلدى. بارلىق كيەلى ورىندار كوركەيتىلەدى, سونىڭ ىشىندە ايىرىقشا جوندەۋدى قاجەت ەتەتىن ۇلت ۇستازى احمەت بايتۇرسىنوۆتىڭ تورعايداعى, ياعني جانگەلدين اۋدانىنداعى تۋعان ءۇيى, باراق باتىر كەسەنەسى جانە قوستاناي قالاسىنداعى سۆياتو-نيكولسكي شىركەۋى نازارعا الىنىپ وتىر. ولار كۇردەلى جوندەۋدەن وتەدى.
احمەت بايتۇرسىنوۆ تۋعان ءۇيدى وسىدان بىرنەشە جىل بۇرىن الدىمەن ارقالىق قالاسىنداعى ەلەنا تسۆەنتۋح باسقاراتىن «جاس ۇلان» بالالار مەن جاسوسپىرىمدەر ورتالىعى ۇيىمداستىرعان تاريحي-تانىمدىق ەكسپەديتسيا احاڭ تۋعان ءوڭىردىڭ تاريحىن, ونىڭ كىندىك قانى تامعان ءۇيدىڭ تاعدىر-تالايىن جاقسى بىلەتىن اقساقالداردى ەرتىپ بارىپ, قۇلاپ قالعان تامنىڭ ىرگەتاسىنان كەسەگىن الىپ, بەلگىلەپ, كەيىننەن ونى قالپىنا كەلتىرۋ تۋرالى باستاما دا كوتەرگەن بولاتىن. ءبىرشاما ۋاقىت وتكەن سوڭ احاڭ ۇرپاقتارى تۇراتىن اقكول-قاراسۋ اۋىلىنىڭ جاستارى اسارلاتىپ, قۇلاپ, ىرگەتاسىنىڭ ورنى عانا قالعان عيماراتتىڭ قابىرعاسىن قايتا تۇرعىزدى. بىراق قام كەسەكتەن سالىنعان ءۇي ۋاقىت كوشىنە شىداماي, توزىپ بارادى. ەندى, مىنە, «رۋحاني جاڭعىرۋ» باعدارلاماسىنىڭ اياسىندا ءۇيدىڭ تولىق كۇردەلى جوندەۋدەن وتەتىنى تۋرالى جاقسى حابار جۇرتتىڭ كوڭىلىنە قۋانىش ۇيالاتتى. ول تورعاي وڭىرىنە اياق باسقانداردىڭ بارىپ كورەتىن, كەمەڭگەر ادام كىندىگىنىڭ قانى تامعان جەرگە تاعزىم جاسايتىن ورىنعا اينالاتىن بولادى.
ءنازيرا جارىمبەت,
«ەگەمەن قازاقستان»
قوستاناي
سۋرەتتە: احاڭ ءۇيىنىڭ ورنىنا جاسالعان ەكسپەديتسيا مۇشەلەرى جانە ءۇيدى اسارلاتىپ قالپىنا كەلتىرگەن اۋىل تۇرعىندارى