باتىس قازاقستان وبلىسىنىڭ ىشكى ساياسات باسقارماسىنا نۇرلىبەك داۋموۆ باسشى بولىپ تاعايىندالدى. ۇجىمعا جاڭا جەتەكشىنى باتىس قازاقستان وبلىس اكىمىنىڭ ءبىرىنشى ورىنباسارى يگور ستەكسوۆ تانىستىردى.
كونكۋرستىق كوميسسيانىڭ شەشىمىنە سايكەس باتىس قازاقستان وبلىسى ىشكى ساياسات باسقارماسىنىڭ باسشىسى لاۋازىمىنا بەكىتىلگەن داۋموۆ نۇرلىبەك جاسقايرات ۇلى – 1981 جىلى تۋعان, ءبىلىمى جوعارى. 2002 جىلى باتىس قازاقستان مەملەكەتتىك ۋنيۆەرسيتەتىن تامامداعان ول ءار جىلدارى باتىس قازاقستان وبلىستىق ىشكى ساياسات باسقارماسىندا جەتەكشى, باس مامان, ءبولىم باسشىسى; باتىس قازاقستان وبلىسى اكىمى اپپاراتىنىڭ الەۋمەتتىك-مادەني دامۋ ماسەلەلەرى جونىندەگى باس ينسپەكتور; قازاقستان رەسپۋبليكاسى مادەنيەت مينيسترلىگىنىڭ قوعامدىق ساياسي جۇمىس دەپارتامەنتىندە ساراپشى (استانا قالاسى); باتىس قازاقستان وبلىسى جاستار ساياساتى ماسەلەلەرى باسقارماسىندا باس مامان, ءبولىم باسشىسى; باتىس قازاقستان وبلىستىق ىشكى ساياسات باسقارماسىندا باسشىسىنىڭ ورىنباسارى قىزمەتتەرىن اتقارعان. بۇگىنگى لاۋازىمىنا دەيىن ن.داۋموۆ ورال قالالىق ىشكى ساياسات ءبولىمىنىڭ باسشىسى بولدى.
بۇعان دەيىن باتىس قازاقستان وبلىستىق ىشكى ساياسات باسقارماسىنىڭ باسشىسى قىزمەتىن اتقارعان باقىتجان نارىمبەتوۆ «وڭىردەن – ورتالىققا» روتاتسيالىق جوباسىنا وراي بيىلعى ناۋرىز ايىنىڭ سوڭىندا استانا قالاسىنا – قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگى ازاماتتىق قوعام ىستەرى كوميتەتى توراعاسىنىڭ ورىنباسارى لاۋازىمىنا قىزمەت اۋىستىرعان بولاتىن.
قازبەك قۇتتىمۇرات ۇلى
«ەگەمەن قازاقستان»
ورال