بۇگىن ەلوردامىزدا 11-ءشى استانا ەكونوميكالىق فورۋمى باستالدى. الەمدىك پروبلەمالاردى شەشۋ جولدارى قاراستىرىلاتىن فورۋم Global Challenges Summit-2018 كونگرەسى اياسىندا وتەدى.
فورۋم بارىسىندا بۇگىنگى تاڭدا الەمدى الاڭداتىپ وتىرعان 11 تاقىرىپ توڭىرەگىندە ءسوز قوزعالادى. ونىڭ ىشىندە ءبىرتۇتاس ەكونوميكا, جاڭا تازا ەنەرگيا الەمى, جاھاندىق قاۋىپسىزدىك, بولاشاققا بولجام, جاھاندىق ستراتەگيا, جاڭا ادامزات الەمى, تسيفرلى الەم, رەسۋرستار الەمى, بولاشاقتىڭ اقشاسى, بولاشاقتىڭ قالاسى سىندى تاقىرىپتار بويىنشا سپيكەرلەر پىكىرلەرىن ورتاعا سالادى. فورۋمعا الەمنىڭ ءتۇرلى ەلدەرىنەن 500-گە جۋىق سپيكەر قاتىسادى. ولاردىڭ ىشىندە فرانتسيانىڭ بۇرىنعى پرەزيدەنتى فرانسۋا وللاند, Apple Computer كومپانياسىنىڭ تەڭ نەگىزىن سالۋشى ستيۆ ۆوزنياك, بۇۇ-نىڭ بۇرىنعى باس ديرەكتورى پان گي مۋن, دۇنيەجۇزىلىك بانكتىڭ ەۋروپا جانە ورتالىق ازيا جونىندەگى باس ەكونوميسى گانس تيممەر بار.
فورۋمنىڭ العاشقى ەكى كۇنى كۇن تارتىبىندەگى جاھاندىق ماسەلەلەرگە ارنالادى, ءۇشىنشى كۇنى سپيكەرلەر قر ۇكىمەتىنىڭ, ساراپشىلار قوعامداستىعىنىڭ وكىلدەرىمەن التى باعىت بويىنشا جۇمىس جۇرگىزەدى.
ايتا كەتەيىك, استانا ەكونوميكالىق فورۋمى ەڭ العاش 2008 جىلى وتكىزىلگەن. العاشقى فورۋمدا دۇنيەجۇزىلىك ەكونوميكا مەن قارجى جۇيەسىن وڭالتۋ جانە دامىتۋ ماسەلەلەرى تالقىلانعان. سودان بەرى فورۋم ىقپالدى حالىقارالىق الاڭداردىڭ بىرىنە اينالدى.
ءمادينا جالەلقىزى,
"ەگەمەن قازاقستان"