قازاقستان رەسپۋبليكاسىنىڭ ەڭبەك سىڭىرگەن قايراتكەرى, «دارىن» مەملەكەتتىك جاستار سىيلىعىنىڭ لاۋرەاتى, بەلگىلى ايتىسكەر اقىن, «اسىل ارنا» تەلەارناسىنىڭ باس ديرەكتورى مۇحامەدجان تازابەك قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتتەرىمەن كەزدەستى, دەپ حابارلايدى وقۋ ورنىنىڭ ءباسپاسوز قىزمەتى.
جيىندا مۇحامەدجان تازابەك ەلىمىزدىڭ بۇگىنى مەن بولاشاعى, قازىرگى قوعامنىڭ بەت-بەينەسى تۋراسىندا كەڭىنەن اڭگىمە ءوربىتتى. ۇلتتىق دەڭگەيدە ويلاۋ, مەملەكەتتىك سانانى قالىپتاستىرۋ, قازاقى سالت-ءداستۇر, وزىندىك بولمىسىمىزدى ساقتاۋ سىندى قاستەرلى قۇندىلىقتاردى دارىپتەۋگە ۇندەدى. كەشەگى دۋلاتي, بالاساعۇن, تولە بيلەردى, تاۋ تۇلعالى تۇرار, باتىر باۋىرجان, قابىرعالى قالامگەرلەر شەرحان مەن ءابىشتى, ۇلى انالارىمىز دومالاق, زەرە, ۇلجاندى بۇگىنگى بويجەتكەندەرگە ۇلگى ەتە سويلەدى.
تىكەلەي ينتەراكتيۆتى سۇحبات تۇرىندە جۇرگىزىلگەن كەزدەسۋدىڭ ەرەكشەلىگى جيىنعا قاتىسۋشىلاردىڭ ءاربىر ساۋالىنا سول مەزەتتە جاۋاپ بەرۋگە مۇمكىندىك بەرىلگەن. اسىرەسە, جينالعانداردىڭ ءبىر اۋىزدان جازعان جاۋاپ نۇسقاسى وزگە نۇسقالاردان وزگەشەلەنىپ, كولەمىنىڭ ۇلكەيىپ تۇراتىندىعى كوپشىلىكتىڭ وي-پىكىرىنە ساراپتاما جاساۋعا جاعداي جاسادى. سونىمەن قاتار, باسقوسۋ بارىسىندا ءتۇرلى ونلاين دياگراممالار دا نازارعا ۇسىنىلدى.
– قازاق مەملەكەتتىك قىزدار پەداگوگيكالىق ۋنيۆەرسيتەتى – مەملەكەت ءۇشىن اسا ماڭىزدى ستراتەگيالىق وبەكت. ويتكەنى, ەل ءۇشىن ۇلتتىڭ اناسى, جۇرتتىڭ ۇيىتقىسى بولعان قىز بالانىڭ تاعدىرىنان ارتىق قۇندىلىق جوق. بۇگىن وسى ۋنيۆەرسيتەتتىڭ سىرتقى تازالىعىنان باستاپ ىشكى تارتىبىنە دەيىن ءتانتى بولىپ, تاڭداي قاقتىم. شىنىندا, گاۋھار تورەمۇراتقىزى باستاعان وقۋ ورنىنىڭ باسشىلىعى قىز بالالاردىڭ ءتالىم-تاربيەسىنە اسا دەن قويىپ, بايىپتى ءبىلىمى مەن وزىنە لايىقتى قىلىعىن قاداعالاۋ جۇمىسىن ابدەن جۇيەلەگەن ەكەن. سونداي-اق, ءجاننات دانىشپايقىزى جۇرگىزىپ وتىرعان «اقتۇمار» مۋزەيىنىڭ دە ۇرپاق ءۇشىن ۇيرەتەر ۇلگىسى كوپ, بەرەر تاعىلىمى مول. ورتا ازيادا وزىندىك ورنى بار ءبىلىم ورداسىنىڭ جۇمىسى جەمىستى, ەڭبەگى ەلەۋلى بولسىن, – دەپ اتاپ ءوتتى مۇحامەدجان تازابەك ءوز سوزىندە.
جيىن بارىسىندا بەلگىلى ايتىسكەر اقىنعا ستۋدەنتتەر تاراپىنان قويىلعان ساۋالدار كوپ بولدى. سۇراقتاردىڭ دەنى اتا-انانى قادىرلەۋ, ادامدار اراسىنداعى سىيلاستىق, وتباسى قۇندىلىقتارى مەن قىز تاربيەسى جايىن قاۋزادى. باسقوسۋ سوڭىندا قىزدار ۋنيۆەرسيتەتىنىڭ تاربيە جانە الەۋمەتتىك جۇمىستار جونىندەگى دەپارتامەنتىنىڭ ماماندارى كەش قوناعىنا تاعىلىمعا تولى اڭگىمەسى ءۇشىن ريزاشىلىعىن ءبىلدىرىپ, سىي-سياپات كورسەتتى.
– «قىز وسسە – ەلدىڭ كوركى». يا, شىنىندا, قىز بالا قىزعالداق سياقتى, ونىڭ تامىرى اتا-اناسىنىڭ ۇيىندە ءنار الىپ, ساباعى سۇيگەن جارىنىڭ جانىندا ءبۇر جارىپ, گ ۇلى انا بولعان كەزىندە اشىلادى. قازىرگى قىز – ەرتەڭگى ۇلتتىڭ اناسى. سوندىقتان دا, جاقسىمىز بولسا, قىزدارعا بەرگىمىز كەلەدى, ارداقتى ويىمىز بولسا, اياۋلى قىزدارمەن بولىسكىمىز كەلەدى. بۇگىنگى قازاق مەملەكەتتىك قىزدار پەداگوگيكالىق ۋنيۆەرسيتەتىندە وتكەن كەزدەسۋدە وسى نيەتىمىزدىڭ جۇزەگە اسۋىنىڭ ءساتى ءتۇستى. «مەن سىزگە ءبىر الما, ءسىز ماعان ءبىر الما بەرسەڭىز, ەشتەڭە وزگەرمەيدى, ەكەۋمىزدە دە ءبىر-ءبىر المادان بولادى. مەن سىزگە ءبىر وي بەرسەم, ءسىز ماعان ءبىر وي بەرسەڭىز, ەكەۋمىز دە ەكى وي بولادى» دەگەندەي, بولاشاق انالاردىڭ الدىندا ءسوز سويلەپ, قارىنداستارىمىزعا اعالىق اقىل-كەڭەسىمىزدى ايتىپ, رياسىز پەيىلمەن, اقجارقىن كوڭىلمەن بەرەكەلى اڭگىمە-دۇكەن قۇرىپ, شىن مانىندە, رۋحاني جاڭعىردىق. ءلاززاتتى ساتتەر سەكۋندتاردان, ماڭىزدى ساتتەر مينۋتتاردان, باقىتتى ساتتەر ساعاتتاردان تۇرادى. بۇگىنگى كەزدەسۋ ءبىزدىڭ دە, قۇلاق قويىپ تىڭداعان قىزداردىڭ دا ەسىندە قالاتىن ەرەكشە شارا بولدى دەگەن ۇمىتتەمىن. وسىنداي يگىلىكتى ىسكە مۇمكىندىك بەرگەن قازاق مەملەكەتتىك قىزدار پەداگوگيكالىق ينستيتۋتىنىڭ باسشىلىعىنا, اسىرەسە, وقۋ ورنىنىڭ رەكتورى الدامبەرگەنوۆا گاۋھار تورەمۇراتقىزىنا ەرەكشە العىسىمدى بىلدىرەمىن, – دەدى م. تازابەك كەزدەسۋ سوڭىندا.