وڭتۇستىكتە سوعىس ارداگەرلەرىنە قۇرمەت كورسەتىلدى

سوعىستا جانقيارلىق ەرلىگى ءۇشىن 51 وڭتۇستىكقازاقستاندىق  كەڭەس وداعىنىڭ باتىرى, 8 مايدانگەر «داڭق» وردەنىنىڭ يەگەرى اتاندى. مىڭداعان ارداگەرلەر ءتۇرلى وردەن, مەدالدارمەن ماراپاتتالدى. بۇگىنگى تاڭدا وڭتۇستىكتە 174 ۇلى وتان سوعىسىنىڭ ارداگەرى, 4885 مايدانعا قاتىسۋشى مەن مۇگەدەككە تەڭەستىرىلگەندەر جانە 15733 تىل ەڭبەككەرى بار.

جەڭىستىڭ 73 جىلدىعىنا وراي شىمكەنت قالاسىنداعى «وڭتۇستىك» قابىلداۋ ۇيىندە مايدانگەرلەرگە قۇرمەت كورسەتىلدى, مەرەكەلىك داستارحان جايىلىپ, كونتسەرتتىك باعدارلاما ۇسىنىلدى. «حالقىمىزدا «ەر – ەلىنىڭ قورعانى» دەگەن اتالى ءسوز بار. ءبىز وسىنداي جانداردىڭ ەرلىكتەرىنە ساي سىي-قۇرمەت كورسەتە وتىرىپ, ولاردان ونەگە الىپ وسەتىن جاس ۇرپاق وتانىنا ادال قىزمەت ەتەدى دەپ سەنەمىز. سىزدەردىڭ جانە ەرلىگىمەن ەسىمدەرى تاريحىمىزدا جازىلعان باتىر بابالاردىڭ الدىندا ولشەۋسىز قارىزدارمىز. ەلباسىمىز مايداننان ورالماعان جاۋىنگەرلەرىمىزدىڭ ەسىمدەرىن ماڭگى ەل ەسىندە ساقتاۋدا جانە ارامىزدا جۇرگەن ارداگەرلەرىمىز بەن تىل ەڭبەككەرلەرىن ارداقتاۋدا ارقاشان مەملەكەتتىڭ قامقورلىعى بولاتىنىن ايتىپ, جارقىن باستامالارعا جول اشىپ كەلەدى. سوندىقتان دا اقتاڭداق جىلدارداعى ەل ازاماتتارىنىڭ جاۋجۇرەكتىلىگى مەن تىل ەڭبەككەرلەرىنىڭ ەرەن ەڭبەكتەرىنە ءبىز ءاردايىم قۇرمەتپەن باس يەمىز»,- دەدى مەرەكەلىك جيىنعا قاتىسقان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ. مەرەكەلىك كەزدەسۋ بارىسىندا وبلىستىق جانە قالالىق ارداگەرلەر كەڭەسىنىڭ توراعالارى مەن مايدان جانە تىل ارداگەرلەرى ءسوز سويلەپ, قازىرگى كەزدە مەملەكەت تاراپىنان كورسەتىلىپ جاتقان قۇرمەت, قولداۋلارعا ريزاشىلىقتارىن ءبىلدىردى.

سونداي-اق, وبلىس اكىمى سوعىس ارداگەرى مۇراتالى تولەپبەرگەن ۇلىن ۇلى جەڭىس كۇنىمەن ارنايى قۇتتىقتاپ بارىپ, سىي-سياپات جاسادى. بۇگىندە توقساننان اسىپ وتىرعان ارداگەر كەزىندە بەلارۋس مايدانىندا بولىپ, ودەر وزەنىنەن ءوتۋ, ۋكراينا, بەلورۋس جەرلەرىن ازات ەتۋدە ەرلىك كورسەتكەن. برەست قامالى, ۆارشاۆا, دانسك, ۆيسسمارك, بيتتەنبۋرگ, پەرلەبەرگ قالالارىنىڭ شايقاسىنا قاتىسقان. سوعىستا كورسەتكەن ەرلىكتەرى ءۇشىن: ءىى–شى دارەجەلى « ۇلى وتان سوعىسى» وردەنىمەن, «ەرلىگى ءۇشىن», «ۆارشاۆانى ازات ەتكەنى ءۇشىن», «گەرمانيانى جەنگەنى ءۇشىن» جانە مەرەكەلىك مەدالدارمەن ماراپاتتالعان.

گەرمانيانىڭ بيتتەنبەرگ قالاسىندا جاۋىنگەرلىك جولى جەڭىسپەن اياقتالعان مايدانگەر ەلگە 1950 جىلى ورالعان. سوعىس ارداگەرى 2 ۇل 6 قىز ءوسىرىپ, 19 نەمەرە, 10 شوبەرە ءسۇيىپ وتىر. مايدانگەر ءوزىن قۇتتىقتاي كەلگەن ايماق باسشىسىنا العىسىن ءبىلدىرىپ, اق باتاسىن بەردى.

ەركىن دوسىمباي,

وڭتۇستىك قازاقستان وبلىسى