مەملەكەت باسشىسى نۇرسۇلتان نازارباەۆتىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىن جۇزەگە اسىرۋ جۇمىستارى ماڭعىستاۋ وبلىسىندا قارقىندى قولعا الىندى. وڭىردە باستامانىڭ ءتورتىنشى باعىتى – شاعىن نەسيە بەرۋدى ۇلعايتۋ بويىنشا «نۇر كاپيتال» باعدارلاماسى ىسكە قوسىلدى.
باعدارلامانىڭ ەرەكشەلىگى جانە تيىمدىلىگى – شاعىن جانە ورتا بيزنەسكە نەسيەنىڭ جىلىنا 1 پايىزبەن بەرىلۋىندە. مەملەكەت باسشىسىنىڭ ءوزى قولداپ, ماقۇلداعان جوباعا ماڭعىستاۋلىقتاردىڭ قىزىعۋشىلىعى جوعارى. ماڭعىستاۋ وبلىستىق كاسىپكەرلىك جانە ساۋدا باسقارماسىنىڭ مالىمەتىنشە, وبلىستاعى قالالار مەن اۋداندار اكىمدىكتەرىنە كاسىپكەرلەر تاراپىنان 2 ملرد تەڭگەدەن استام قارجىعا ەسەپتەلگەن 192 ءوتىنىم كەلىپ تۇسكەن.
نەسيەنى بەس جىل مەرزىمگە 1 پايىزبەن عانا بەرەتىن باعدارلامادا قاتىسۋشىنىڭ جاسىنا نەمەسە وزگە دە ەرەكشەلىكتەرىنە, سونداي-اق باعىتتارعا شەك قويىلماعان. كەلىپ تۇسكەن وتىنىشتەردىڭ 35%-ى مال شارۋاشىلىعى سەكتورىنا, 22 پايىزى وڭدەۋ جانە جەڭىل ونەركاسىبىنە, 16 پايىزى تۋريزم سالاسىنا, 8 پايىزى كولىك جانە قويما ءىسىن وركەندەتۋدى قولعا الۋعا قاتىستى بولسا, وسىمدىك شارۋاشىلىعىنا قاتىستى جانە دەنساۋلىق ساقتاۋ سالاسىنا ۇلەس قوسامىن دەگەن جوبالار ارقايسىسى 5 پايىزدى, قىزمەت كورسەتۋ مەن ءبىلىم بەرۋ سالاسى دا ارقايسىسى تيىسىنشە 3 پايىزدى قۇراپ وتىر. سونىمەن قاتار تاماقتانۋ قىزمەتتەرى 1 پايىز, كوتەرمە جانە بولشەك ساۋدا 1 پايىز, ينۆەستيتسيالار 0,3 پايىزدى قۇراسا, ونەر, ويىن-ساۋىق جانە دەمالىس باعىتىنا قاتىستى ءوتىنىش ازىرگە 0,1 پايىزدى قۇراپ وتىر ەكەن.
– ءبىز حالىقتىڭ قوعامدىق سانا-سەزىمىن جاڭعىرتۋ ءۇشىن شاعىن جانە ورتا بيزنەستى دامىتۋعا ناقتى جاعداي تۋعىزۋ مىندەتىن قويدىق. قازىرگى ۋاقىتتا جالپى نەسيە پورتفەلى 2,7 ملرد تەڭگەنى قۇرايدى, ونىڭ ىشىندە 900 ملن تەڭگە جەرگىلىكتى بيۋدجەتتەن, 1,800 ملن تەڭگە «دامۋ» قورىنان. بۇگىنگى تاڭدا «قازاقستاننىڭ حالىق بانكى» اق ماڭعىستاۋ وبلىستىق فيليالىمەن 400 ملن تەڭگە, «قازاقستاننىڭ حالىق بانكى» اق-تىڭ جاڭاوزەن وڭىرلىك فيليالىمەن 400 ملن تەڭگە جانە «ForteBank» اق-پەن 322 ملن تەڭگە, «سبەربانك روسسي» اق ەب-مەن 150 ملن تەڭگە كولەمىندەگى سوماعا كەلىسىم جاسالدى. سونداي-اق وسى باعدارلاماعا قاتىسۋ ءۇشىن «بانك تسەنتر كرەديت» اق جانە «اتامەكەن ميكروفينانس» جشس وتىنىمدەرىن بەردى, – دەدى ماڭعىستاۋ وبلىسىنىڭ اكىمى ەرالى توعجانوۆ. جوبانىڭ تۇساۋكەسەرىنە «اتامەكەن» ۇلتتىق كاسىپكەرلەر پالاتاسى تورالقاسىنىڭ توراعاسى تيمۋر ق ۇلىباەۆ, ماڭعىستاۋ وبلىسىنداعى قالالار مەن اۋداندار اكىمدەرى, كاسىپكەرلەر مەن قوعامدىق بىرلەستىكتەر مۇشەلەرى, ەكىنشى دەڭگەيلى بانكتەردىڭ, قارجى ينستيتۋتتارىنىڭ وكىلدەرى قاتىستى.
جالپى, ماڭعىستاۋ وبلىسىندا كاسىپكەرلىكتى جولعا قويۋ, كاسىبىن باستايمىن دەگەن جانعا قولداۋ كورسەتۋ دەڭگەيى جوعارى. مىسالى, وڭىردە 2018 جىلدىڭ قاڭتارىنان باستاپ وقۋشىلار اراسىندا كاسىپكەرلىك نەگىزدەرىن ۇيرەتۋ, بيزنەستى جۇرگىزۋ ادىستەرىن تانىستىرۋ ماقساتىندا «كاسىپكەر بولامىن!» اتتى قاناتقاقتى جوبانىڭ تۇساۋى كەسىلدى.
جوبا بارىسىندا مەكتەپ وقۋشىلارىنا كاسىپكەرلىك نەگىزدەگى ويىن جاتتىعۋلار ارقىلى الەۋمەتتىك-ءبىلىم بەرۋ كوزدەلگەن. «كاسىپكەر بولامىن!» جوباسى اياسىندا وبلىستىڭ 12 قاناتقاقتى مەكتەبىندە 365 جوعارى سىنىپ وقۋشىلارىنا ارنالعان 14 بيزنەس-ترەنەر فاكۋلتاتيۆتى ساباقتار وتكىزىلمەك, سونداي-اق بيزنەس-ترەنەرلەر مەن ولاردىڭ ستۋدەنتتەرى اراسىندا بايقاۋ ۇيىمداستىرىلىپ, 150 جەڭىمپازعا حالىقارالىق بيزنەس-ترەنەرلەردىڭ قاتىسۋىمەن بيزنەس-لاگەر ۇيىمداستىرىلادى. جەڭىمپازدار ايماقتىڭ ءىرى كاسىپكەرلەرى, «دامۋ» قورى جانە «اتامەكەن» ۇكپ گرانتتارىنا قول جەتكىزەدى.
بيزنەستى وركەندەتۋدى مەكتەپتەن, وقۋشىلار اراسىنان باستاعان وڭىردە «نۇر كاپيتال» باعدارلاماسىنا قاتىسقىسى كەلەتىن بارلىق كاسىپكەرلەر قاجەتتى قۇجاتتاردى دايىنداۋ جانە جيناۋمەن اينالىساتىن بيزنەس-بولىمشەلەرگە ءوتىنىش تاپسىرادى. مۇنداي بولىمشەلەر اقتاۋ جانە جاڭاوزەن قالالارىنا ورنالاسقان. بارلىق قاجەتتى قۇجاتتارىن ەكىنشى دەڭگەيلى بانكتەرگە تاپسىرعان كاسىپكەر ول ماقۇلدانعان جاعدايدا بانكپەن بىرلەسىپ, سۋبسيديا الۋ ءۇشىن قۇجاتتاردى وبلىستىق ۇيلەستىرۋ كەڭەسىنە جىبەرەدى. ايماقتىق ۇيلەستىرۋ كەڭەسى ءاربىر اۋدان ءۇشىن ماڭىزدى دەپ تانىلعان جوبالاردى قاراستىرادى.
نيەت بىلدىرگەندەر اراسىندا مال شارۋاشىلىعىنا وتىنىمدەردىڭ كوپتىگى اتالمىش باعىت بويىنشا باسكەلەستىكتى ارتتىراتىنى انىق. ال, ماڭعىستاۋلىقتار ءۇشىن وزگە دە ماڭىزدى, كرەاتيۆتى جوبالاردى جولداۋعا مۇمكىندىك بار. ءار جوبانىڭ ارتىندا باستالايىن دەپ تۇرعان بيزنەس, ءار بيزنەستە بىرنەشە ادامنىڭ جاڭا جۇمىس ورنى بار ەكەنى قۋانتادى. دەمەك, بۇل ارقىلى جوبا ولكەدەگى جۇمىسسىزدىقتى ازايتۋعا قول جەتكىزۋدى ماقسات ەتەدى.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى