ەرتىستىڭ سۋى سەمەي-دولون جولىنىڭ 32 شاقىرىمىنا جايىلىپ, جول جابىلعان. سونىڭ سالدارىنان بەسقاراعاي اۋدانىنا قاراستى بىرلىك اۋىلىنان 18 ادام قاۋىپسىز جەرگە كوشىرىلدى, دەپ حابارلايدى توتەنشە جاعدايلار دەپارتامەنتى.
ۇيىنە سۋ جايىلعان ادامداردىڭ بارلىعى گلۋحوۆ اۋىلىنىڭ مەكتەبىنە ورنالاستى. اتالمىش اۋىل حالقىنا دا تاسقىن كۇشەيگەن جاعدايدا نە ىستەۋ كەرەكتىگى ءتۇسىندىرىلدى.
«بىرلىك اۋىلىندا 38 ءۇي بار. ولاردا 116 ادام تۇرادى. اۋىلدى توتەنشە جاعداي ماماندارى باقىلاۋعا الىپ, كۇزەت قويىلدى» - دەلىنگەن دەپارتامەنت تاراتقان اقپاراتتا.
كەشە وسى اۋدانداعى كريۆين اۋىلىنىڭ تۇسىندا ەرتىستىڭ مۇزىن جارۋ جۇمىستارى جۇرگىزىلگەن بولاتىن. قازىرگى تاڭدا بەسقاراعاي اۋدانى بويىنشا 40 قۇتقارۋشى مەن 13 تەحنيكا, 4 قايىق اپاتپەن كۇرەسكە دايىن تۇر. ال زىريان اۋدانىندا ءالى 72 ءۇيدى سۋدان ارىلتۋ جۇمىستارى ءجۇرىپ جاتىر. وتكەن تاۋلىكتە ۇيلەردەن 47 مىڭ تەكشە مەتر سۋ شىعارىلعان.
بۇعان دەيىن وبلىستىڭ اكىمى دانيال احمەتوۆ زىريان قالاسىنان 2 ملن تەكشە مەتر سۋ سورعىتۋ قاجەتتىگىن ايتقان بولاتىن. وسى اۋداننىڭ تۇرعىسىن اۋىلىندا تاسىعان سۋدىڭ ارناسى كەڭەيتىلسە, چاپاەۆ اۋىلىندا دامبانى بيىكتەتۋ جۇمىستارى قارقىن الۋدا. اندرەەۆ اۋىلىندا سۋ شايعان كوپىردى قالپىنا كەلتىرۋ جۇمىستارى باستالىپ كەتتى. سەمەيدە دە سۋ سورعىتۋ جۇمىستارى جالعاسۋدا.
«قالعان اۋدانداردا جاعداي تولىق تۇراقتالا باستاعاندىقتان, كەشەدەن بەرى دابىل جەلىسى جۇمىسىن توقتاتتى» - دەيدى دەپارتامەنتتىڭ ءباسپاسوز قىزمەتى.