بىلتىر مۇنايلى وڭىردە 13 906 ءسابيدىڭ دۇنيەگە كەلگەنى تىركەلگەن ەدى. بيىلعى جىلدىڭ العاشقى تاڭىندا ولاردىڭ قاتارى 30 نارەستەمەن تولىقتى. ال جاقىندا ۇشەم ومىرگە كەلدى.
وبلىستىق دەنساۋلىق ساقتاۋ باسقارماسىنىڭ دەرەگىنە قاراعاندا, ۇشەمنىڭ اكە-شەشەسى ماقات اۋدانىندا تۇرادى. ءۇش بۇرىمدىنى جۇكتىلىكتىڭ 35-اپتاسىندا بوسانعان.
– اتا-انا ءۇشىن دە, مەديتسينا سالاسىنداعى قىزمەتكەرلەر ءۇشىن دە ۇشەمنىڭ ومىرگە كەلۋى – ەرەكشە وقيعا. الايدا اتىراۋ وبلىسىندا ۇشەم سيرەك كەزدەسەدى. بيىلعى ۇشەمنىڭ اتا-اناسى بۇرىننان ەكى قىز, ءبىر ۇل تاربيەلەپ وتىر. دۇنيە ەسىگىن ەندى اشقان نارەستەلەرىن قىمبات, سىمبات, قاراقات ەسىمىمەن اتادى. ۇشەمنىڭ سالماعى بىردەي ەمەس. ءبىرى – 1 921, ەكىنشىسى – 2 275, ال ءۇشىنشىسى – 2 204 گرامم. بويلارى 44–45 سم ارالىعىن قۇرادى, – دەپ حابارلادى باسقارما باسشىسىنىڭ ورىنباسارى ءاليا جانعاليەۆا.
ۇشەمنىڭ اناسى اسەلحان كەڭەسوۆانىڭ ايتۋىنشا, ءوزىنىڭ دە, كۇيەۋىنىڭ دە اۋلەتىندە ەگىزدەر بولعان. دارىگەرلەر ۇشەمنىڭ ومىرگە كەلەتىنىن الدىن الا ەسكەرتىپتى.
– بۇل حاباردى ەستىگەندە قۋاندىق ءارى قوبالجىدىق. دەگەنمەن ءبىر كۇندە كوپبالالى وتباسى اتاندىق. دارىگەرلەر ۇشەمنىڭ امان-ەسەن ومىرگە كەلۋىنە جان-جاقتى قولداۋ كورسەتتى, – دەيدى ءا.كەڭەسوۆا.
اتىراۋ وبلىسى