ۇلتتى ساقتاۋدىڭ ەڭ توتە جولى – ۇرپاق تاربيەسى. بالا ويىنمەن وسەدى, داميدى, جەتىلەدى. قازىرگى بالالار اتادان مۇرا بولىپ كەلە جاتقان ويىندارىمىزدى قانشالىقتى بىلەدى؟ وسى جانە باسقا دا ساۋالدارعا تۇركى الەمىنىڭ بالالار ويىندارى حالىقارالىق فەستيۆالى جاۋاپ بەردى.
ۇلتتىق كيىم كيگەن بالالار كوز تارتادى. ولاردىڭ بايىرعى ويىنداردى بەرىلە ويناپ وتىرعانىن كورگەندە, جانىڭىز جادىرايدى. وسىنداي اۋقىمدى ءارى يگى ءىس-شارانى وقۋ-اعارتۋ مينيسترلىگى مەن تۇركيانىڭ ءبىلىم مينيسترلىگى بىرلەسىپ ۇيىمداستىردى.
وقۋ-اعارتۋ مينيسترلىگىنىڭ مالىمەتىنشە, 9–13 جاس ارالىعىنداعى وقۋشىلارعا ارنالعان فەستيۆال تۇركى مەملەكەتتەرى اراسىنداعى مادەني ىنتىماقتاستىقتى نىعايتۋعا, تۇركىلەرگە ورتاق باي مۇراسىن, ءداستۇرلى بالالار ويىندارىن ساقتاۋعا, ناسيحاتتاۋعا, سونداي-اق حالىقارالىق پەداگوگيكالىق ىنتىماقتاستىقتى دامىتۋعا باعىتتالعان. سونىمەن قاتار ءىس-شارا بالالار ويىندارىن جۇيەلەۋ, ورتاق مۇراعات قالىپتاستىرۋ, ويىنداردىڭ ءبىلىم بەرۋ ۇدەرىسىندەگى پەداگوگيكالىق ءرولىن ارتتىرۋ, سونداي-اق جاس ۇرپاقتىڭ الەۋمەتتىك, ەموتسيونالدىق ءارى مادەني دامۋىنا قولداۋ كورسەتۋدى كوزدەيدى.
فەستيۆال اياسىندا ەلىمىزدىڭ 20 وڭىرىنەن كەلگەن پەداگوگتەرگە ارنالعان حالىقارالىق سەمينار-ترەنينگ ءوتتى. قاتىسۋشىلار تۇركى حالىقتارىنىڭ ءداستۇرلى ويىندارىمەن تانىسىپ, ولاردى ءبىلىم بەرۋ ۇدەرىسىنە ەنگىزۋ جولدارىن تالقىلادى. سەمينار-ترەنينگ باعدارلاماسىندا اسىق اتۋ, تاياق تارتۋ, لاڭگى تەبۋ, ورامال تاستاماق, ساقينا سالۋ, حانتالاپاي, تىماق ۇرۋ, بەساسىق, تاعى باسقا ويىن تۇرلەرى ۇسىنىلعان. قورىتىندىسى بويىنشا تۇركيالىقتار قازاق مادەنيەتىنە ءتان بىرنەشە ويىندى ىرىكتەپ الدى. بۇل ويىندار بيىلعى ءساۋىر ايىندا ىستانبۇل قالاسىندا وتەتىن تۇركى ەلدەرى فەستيۆالىندە كورسەتىلەدى.