«وڭتۇستىكتەن – سولتۇستىككە كوشۋ» مەملەكەتتىك باعدارلاماسى اياسىندا كەيىنگى ەكى جىلدا ۇلىتاۋ وڭىرىنە 56 وتباسى قونىس اۋدارعان. اسىرەسە 2025 جىلى 27 وتباسى, ياعني 111 ادام كوشىپ كەلدى. بيىل تاعى 27 وتباسىنى وڭىرگە تارتۋ جوسپارلانىپ وتىر.
قونىس اۋدارۋ باعدارلاماسى بويىنشا ءار وتباسى مۇشەسىنە 300 مىڭ تەڭگە كولەمىندە بىرجولعى جاردەماقى بەرىلەدى. سونداي-اق ءبىر جىل بويى تۇرعىن ءۇيدى جالعا الۋ ءۇشىن اي سايىن 100 مىڭ تەڭگە مولشەرىندە قارجىلاي قولداۋ كورسەتىلەدى.
قىزىلوردا وبلىسىنان قونىس اۋدارعان ىرىسبەك ءومىربايدىڭ وتباسى بۇگىندە جەزقازعان قالاسىندا تۇرىپ جاتىر. ول «ە-قىزمەت» ونلاين پلاتفورماسى ارقىلى بوس لاۋازىمعا ءوتىنىم بەرىپ, مەملەكەتتىك قىزمەتكە ورنالاستى.
«مەن بۇرىن اكىمدىكتە جۇمىس ىستەگەنمىن. سولتۇستىك وڭىرلەرگە قونىس اۋدارۋعا قاتىستى باعدارلامامەن اۋەلدەن تانىسپىن. «ە-قىزمەت» ونلاين پلاتفورماسى ارقىلى بوس لاۋازىمعا ءوتىنىم بەردىم. قازىر تابيعي مونوپوليالاردى رەتتەۋ كوميتەتىنىڭ ۇلىتاۋ وبلىسى بويىنشا دەپارتامەنتىندە باس مامان بولىپ جۇمىس ىستەيمىن. وسى كونكۋرسقا قاتىسۋ ناتيجەسىندە ۇلىتاۋ وبلىسىنىڭ «وڭتۇستىكتەن – سولتۇستىككە كوشۋ» مەملەكەتتىك باعدارلاماسىنا ەنگەنىن ەستىدىم. وبلىستاعى مانساپ ورتالىعىنىڭ ماماندارىمەن سويلەسىپ, ۇلىتاۋ وڭىرىنە تۇبەگەيلى كوشۋگە شەشىم قابىلدادىم», دەيدى ى.ءومىرباي.
جالدامالى پاتەردە تۇرىپ جاتقان جاس مامان قازىرگى ۋاقىتتا ۇلىتاۋ وبلىسىنان باسپانا الۋعا ارەكەت جاساپ جاتىر.
ۇلىتاۋ وبلىسى