وڭتۇستىك قازاقستان وبلىسىندا قاعاز قالدىقتارىنان كارتون شىعاراتىن كاسىپورىن جۇمىسى جاندانا تۇسۋدە. الايدا كاسىپورىن توقتاۋسىز جۇمىس ىستەۋى ءۇشىن قاعاز قالدىقتارى, ياعني ماكۋلاتۋرا قاجەت.
«وڭتۇستىك» يندۋستريالدى ايماعىندا 2016 جىلى جىلى ىسكە قوسىلعان, كارتون شىعاراتىن «بۋمپروم» جشس بۇگىندە قاجەتتى شيكىزاتتى قىزىلوردا, الماتىدان تاسىمالداپ, وبلىس بويىنشا جيناۋدا. كاسىپورىن باسشىسىنىڭ ورىنباسارى سەرىك تاشنازاروۆتىڭ ايتۋىنشا, وندىرىسكە قاجەتتى قاعاز قالدىقتارىنىڭ ءبىر كەلىسى 40 تەڭگەدەن ساتىپ الىنادى. كورشىلەرىمىز قىرعىزستان مەن وزبەكستاندا وڭدەلەتىن قاعازعا قاجەتتىلىك جوعارى. سوندىقتان دا وڭتۇستىك وڭىرلەردەگى قاعاز قالدىقتارىن كورشى ەل كاسىپكەرلەرى كوپتەپ ساتىپ الۋدا. كاسىپورىن باسشىلارىنىڭ ايتۋىنشا, وزبەكستاندىق كاسىپكەرلەر ماكۋلاتۋرانىڭ ءبىر كەلىسىنىڭ باعاسىن 60 تەڭگەگە دەيىن كوتەرىپ جىبەرگەن.
ايتا كەتەلىك, قاعاز قالدىقتارىن وڭدەۋ ماقساتىنداعى جوبانىڭ جالپى قۇنى 200 ملن تەڭگە. كاسىپورىن جىلىنا 4 مىڭ, ال ايىنا 350 توننا ءونىم شىعارۋعا قاۋقارلى. قىتايلىق مامانداردىڭ ارنايى وقىتۋىنان وتكەن 30 ادام جۇمىس ىستەيدى. زاۋىت ونىمدەرىنە سۇرانىس مول. اسىرەسە, تاپسىرىستار پاۆلودار, قاراعاندى, الماتى وبلىستارىنان ءجيى تۇسەدى ەكەن. الداعى ۋاقىتتا كاسىپورىن ونىمدەرىن كورشىلەس وزبەكستان, قىرعىزستان مەملەكەتتەرىنە جونەلتۋ جوسپارلانىپ وتىر. كاسىپورىن باسشىلىعى شيكىزاتتىڭ باعاسى كۇننەن كۇنگە ءوسىپ جاتقاندىقتان «اتامەكەن» كاسىپكەرلىك پالاتاسىنا قاعاز قالدىقتارىن شەتەلگە شىعارۋعا شەكتەۋ قاجەتتىگى جونىندە ۇسىنىس جولداپتى.
ەركىن دوسىمباي,
وڭتۇستىك قازاقستان وبلىسى.