قازىرگى تاڭدا اقمولا وبلىسىندا ءتۋريزمدى بارىنشا تارتىمدى ەتۋ تەتىكتەرى جەتىلدىرىلىپ كەلەدى. جاز ايلارى قىزمەت باعاسىن اسپانداتىپ جىبەرىپ, قىس بويى تاپقان تابىسىن كەمىرىپ جاتاتىن ۋاقىت بىرتىندەپ كەلمەسكە كەتىپ بارادى. ەندى بۋراباي كۋرورتتى ايماعى تۋريستەردى جىل بويى قابىلداۋعا دايىن ەكەندىگىن كورسەتىپ وتىر.
ەلىمىزگە عانا ەمەس, الىس تا جاقىن شەتەلدەرگە بەلگىلى كۋرورتتى ايماقتىڭ جىل بويى تۋريستەردى قابىلداي الاتىن اقمولا وبلىسىنىڭ تۋريستىك اقپاراتتىق ورتالىعى ۇيىمداستىرعان ارنايى ەكى كۇندىك ءباسپاسوز تۋرى بارىسىندا كوز جەتكىزدىك. ىشكى ساياسات باسقارماسى وڭىرلىك كوممۋنيكاتسيالار قىزمەتىنىڭ قولداۋىمەن ۇيىمداستىرىلعان ءباسپاسوز تۋرىنا شامامەن 30 ادام, سونىڭ ىشىندە رەسپۋبليكانىڭ جيىرماعا تارتا جەتەكشى بۇقارالىق اقپارات قۇرالدارىنىڭ وكىلدەرى قاتىستى.
سونىڭ بارىسىندا كۋرورتتى ايماقتىڭ سۇلۋ دا كورىكتى تابيعاتىن تاماشالاۋعا مۇمكىندىك تۋدى. بۇدان باسقا, بۇقارالىق اقپارات قۇرالدارى وكىلدەرىنە «Four seasons» تۇجىرىمداماسى بويىنشا جىل بويى ءتۋريزمدى دامىتۋ جولدارى ءتۇسىندىرىلدى. جانە دە جەرگىلىكتى بيلىك ورگاندارىنىڭ ءتۋريزمدى دامىتۋ جوسپارلارىمەن جاقىن تانىستىق. جالپى, جىل بويى ءتۋريزمدى دامىتۋ تۇجىرىمداماسىنا سايكەس ششۋچە-بۋراباي كۋرورتتىق ايماعىندا ءتۋريزمنىڭ بارلىق تۇرلەرىنە رەسپۋبليكالىق جانە حالىقارالىق دەڭگەيدە اۋقىمدى مادەني-سپورتتىق شارالاردى جۇزەگە اسىرۋ كوزدەلىپ وتىر. بۇل رەتتە اقمولا وبلىسى تۋريزم باسقارماسىنىڭ تۋريستىك اقپارات ورتالىعى ءبىراز شارۋالاردى دا تىندىرىپ تاستادى. تۇركيانىڭ تۋريزم سالاسىنداعى «Balikesir University» ءبىلىم وشاعىنىڭ تۋريزم جانە قوناق ءۇي شارۋاشىلىعى فاكۋلتەتىن تامامداعان ورتالىق جەتەكشىسى دانيار يدياتوۆ بۋرابايعا تۋريستەردى جاپپاي جانە جىل بويىنا تارتۋ باستى ماقساتتارى ەكەنىن ايتادى. دانيار ءوزى تۋىپ-وسكەن ولكەنى دامىتۋعا دا قۇلشىنىپ تۇر. وعان تاجىريبەسى مەن بىلىگى دە جەتكىلىكتى.
جالپى, اقمولا وبلىسىنىڭ تۋريستىك الەۋەتى زور. قىسقى جانە جازعى مەزگىلدەرى تاۋ-شاڭعى بازالارى مەن تۋريستىك باعىتتار بويىنشا تۋريستەردىڭ دەمالۋلارىنا بارلىق جاعداي جاسالعان. وسىعان وراي ەمدەۋ-ساۋىقتىرۋ, مادەني-تانىمدىق, ەكولوگيالىق, بۇقارالىق سپورت جانە ىسكەرلىك تۋريزمىنە ەرەكشە دەن قويىلىپ وتىر. ارينە مۇنداي كەزدە قىزمەت كورسەتۋ ساپاسىنا دەگەن تالاپ تا ارتا تۇسەدى. وسى تۇرعىدان كەلگەندە قىزمەت كورسەتۋدى جانە تۋريستىك يندۋستريانى جاقسارتۋدىڭ ماڭىزدى قادامى قوناق ۇيلەردىڭ قىزمەت كورسەتۋ ساپاسىن ارتتىرۋ ەكەندىگى ايتپاسا دا تۇسىنىكتى. وسىعان وراي وڭىردەگى قوناق ۇيلەر مەن دەمالىس ورىندارى ساناتىن ارتتىرۋ جولىندا جۇيەلى جۇمىستار جاسالۋدا ەكەندىگى اتالماي قالمادى.
ءباسپاسوز تۋرى اياسىندا بۇقارالىق اقپارات قۇرالدارىنىڭ وكىلدەرى, تۋريستىك ورىنداردىڭ جوعارى ساپاسى مەن كورسەتىلەتىن قىزمەتتەرىنە ءوز باعالارىن بەرىپ جاتتى. جالپى, مۇنداي ءباسپاسوز تۋرلارى بۋراباي اۋدانىنىڭ تۋريستىك قىزمەت نىساندارىنىڭ جايىنا نازار اۋدارتىپ عانا قويماي, جارناما ناۋقانىن ۇيىمداستىرۋعا تاپتىرمايتىن تەتىك. بۇل ءوز كەزەگىندە الگى دەمالىس ورىندارىنا الەۋەتتى تاپسىرىس بەرۋشىلەر قاتارىن مولايتا ءتۇسۋى ءتيىس.
اسقار تۇراپباي ۇلى, «ەگەمەن قازاقستان»
اقمولا وبلىسى