قوعامدىق ساياسات ينستيتۋتى جۇرگىزگەن ساۋالناما قازاقستان رەسپۋبليكاسىنىڭ جاڭا كونستيتۋتسياسى جوباسى جونىندە حالىقتىڭ حاباردارلىق دەڭگەيى جوعارى ەكەنىن كورسەتەدى. «قازاقستان رەسپۋبليكاسىنىڭ جاڭا كونستيتۋتسيا جوباسى تۋرالى ەستىدىڭىز بە؟» دەگەن ساۋالناما سۇراعىنا رەسپوندەنتتەردىڭ 87,5%-ى قۇجاتپەن بەلگىلى ءبىر دەڭگەيدە تانىس ەكەنىن بىلدىرگەن: ولاردىڭ 34,2%-ى مازمۇنىن جاقسى بىلەتىنىن ايتسا, تاعى 53,3%-ى جوبا تۋرالى ەستىگەنىن, بىراق ەگجەي-تەگجەيىمەن تانىس ەمەس ەكەنىن جەتكىزگەن. سونىمەن قاتار, ساۋالناماعا قاتىسقانداردىڭ 12,5%-ى بۇل تۋرالى ەشتەڭە ەستىمەگەنىن مالىمدەگەن, دەپ حابارلايدى Egemen.kz.
جاڭا كونستيتۋتسيا جوباسىن قولداۋ دەڭگەيى («بۇقارالىق اقپارات قۇرالدارىندا جاڭا كونستيتۋتسيا جوباسى جاريالاندى. ءسىز وسى جوبانى قولدايسىز با؟») ايتارلىقتاي جوعارى. ساۋالناماعا قاتىسقانداردىڭ 86,5%-ى جاريالانعان جوبانى قولدايدى: 48,4%-ى ۇسىنىلعان وزگەرىستەردى تولىقتاي قۇپتايدى, ال 38,1%-ى جەكەلەگەن باپتارى مەن ەرەجەلەرىن ماقۇلدايدى. سونىمەن بىرگە قۇجات ماتىنىمەن جاقسى تانىس رەسپوندەنتتەر اراسىندا قولداۋ دەڭگەيى اقپاراتتانۋ دەڭگەيى تومەن توپتارمەن سالىستىرعاندا ەداۋىر جوعارى ەكەنى بايقالادى.
رەفەرەندۋم: داۋىس بەرۋ ۋچاسكەسىن قايدان بىلۋگە بولادى؟
رەفەرەندۋمعا ىقتيمال قاتىسۋ دەڭگەيى 70,7% كولەمىندە باعالانادى ء(«سىز جاڭا كونستيتۋتسيا جوباسى بويىنشا وتەتىن رەفەرەندۋمعا داۋىس بەرۋگە باراسىز با؟»). سونىمەن قاتار, رەسپوندەنتتەردىڭ 11,6%-ى داۋىس بەرۋگە قاتىسۋدى جوسپارلامايتىنىن بىلدىرسە, 17,7%-ى ءالى ناقتى شەشىم قابىلداماعان.
«جاڭا كونستيتۋتسيا جوباسىندا كورسەتىلگەن تومەندەگى باپتار مەن نورمالاردى ءسىز قولدايسىز با, الدە قولدامايسىز با؟» دەگەن سۇراققا بەرىلگەن جاۋاپتارعا سايكەس, جوبا نورمالارىنىڭ ىشىندە ەڭ جوعارى قولداۋعا يە بولعاندار: تابيعاتقا ۇقىپتى قاراۋ قاعيداتىن بەكىتۋ (94,3%), مادەنيەت پەن ءبىلىم, عىلىم مەن يننوۆاتسيا قۇندىلىقتارىن بەكىتۋ (87,8%), سونداي-اق تسيفرلىق ورتادا ازاماتتاردىڭ جەكە دەرەكتەرىن قورعاۋ (87,7%). اتالعان ەرەجەلەرگە قاتىستى وڭ كوزقاراس بارلىق الەۋمەتتىك توپتاردا كورسەتىلىپ وتىر.
ساۋالنامانى قوعامدىق ساياسات ينستيتۋتى «AMANAT» پارتياسىنىڭ تاپسىرىسى بويىنشا ۇلتتىق رەپرەزەنتاتيۆتى ىرىكتەمە نەگىزىندە 9-18 اقپان ارالىعىندا جۇرگىزدى. ىرىكتەمە كولەمى – 18 جاستان اسقان 8000 رەسپوندەنت (17 وبلىس, استانا, الماتى, شىمكەنت قالالارى). ىرىكتەمە قاتەلىگى – ±1,19%. دەرەكتەردى جيناۋ ءادىسى – جاپپاي ساۋالناما (face-to-face). ساۋالناما قازاقستان رەسپۋبليكاسىنىڭ ورتالىق سايلاۋ كوميسسياسىن جازباشا حاباردار ەتۋ ارقىلى, قازاقستان رەسپۋبليكاسىنىڭ «رەسپۋبليكالىق رەفەرەندۋم تۋرالى» كونستيتۋتسيالىق زاڭىنا سايكەس وتكىزىلدى.
رەفەرەندۋم-2026: شەتەلدەگى داۋىس بەرۋ ۋچاسكەلەرىنىڭ ءتىزىمى جاريالاندى