باعزىدان كەلە جاتقان تۇسىنىكپەن تاپسىرلەسەك, شىن جازۋشىنىڭ ءولىمى وقىرماندى, ونىڭ ىشىندە ويلى وقىرماندى, تانىپ-تالعاپ وقيتىن وقىرماندى (وكىنىشكە وراي, بۇل توپتىڭ وكىلدەرى بىزدە ات توبەلىندەي) وقىس ويلاندىرىپ, جۇرەك ىشىندەگى جۇرەكتىڭ شىندىعىنا ۇڭىلۋگە ماجبۇرلەيدى. سونداي ايرىقشا قاسيەت قونعان, قازاقتىڭ بۇرىنعى بابا, بي ءتىلىنىڭ قۇنارىن ساقتاپ قالعان جازۋشىنىڭ ءبىرى دە بىرەگەيى راحىمجان وتارباەۆ ەكەنى ايداي اقيقات.
بۇل قازا قارا تىرناعىنا دەيىن شەنەۋنىكتەردىڭ 90 پايىزىن سەلت ەتكىزبەگەنىمەن, زيالى قاۋىم, ويلى وقىرمان ءۇشىن نەگە اۋىر بولدى؟ كەيىنگى كەزدە ومىردەن وسىنداي دارا دارىندار وتكەن تۇستا بايقالاتىن ءبىر ءۇردىس بار. ەگەر اياعى جەتىپ جاتسا, دەنساۋلىعى جاراسا سول قارالى جيىنعا سول سالانىڭ بەلگىلى ادامدارى (قىزمەتتەگى ەمەس) كەلىپ, كەيبىرى ءسوز سويلەيدى. بولماسا باسىلىمدارعا, تەلەارنالارعا دا سۇحبات بەرىپ جاتاتىن سولار. دەمەك جالپىعا ورتاق بولۋعا ءتيىستى قازانىڭ كەيدە سول سالا ادامدارىنىڭ عانا قازاسىنا اينالاتىنى دا جاسىرىن ەمەس.
اكىم-قارا, قاراپايىم وقىرمان, كورەرمەن, تىڭداۋشىنىڭ ىلۋدە ءبىرى بولماسا, قارا كورسەتە بەرمەيدى. دۇرىسى, قانشا جوعارى لاۋازىم يەسى بولسا دا باسشىنىڭ سول تۇلعا تۋرالى پىكىر بىلدىرگەنى ورىندى. بۇل ماسەلەدە قىزمەتتىك شەكتەۋ قويىلماۋى كەرەك. سەبەبى ەل ونىڭ دەڭگەيىن, پاراسات-پايىمىن جۇرت اراسىنا كەلگەندە, ءبىر قايعى, ءبىر قۋانىش ۇستىندە ءبىلۋى قاجەت. وسىنداي ەرەكشەلىككە جول بەرىلمەگەن جاعدايدا قوعامدى اكىم-قارا تۋرالى ورىنسىز پىكىر جايلايدى.
جازۋشىمەن اتىراۋداعى ماحامبەت اتىنداعى وبلىستىق دراما تەاترىندا قوشتاسۋ ءراسىمى ءوتتى. قارالى جيىندا قالامگەردى شىعارىپ سالۋدىڭ رەسمي ءساتى جارتى ساعات بولعانىمەن, ونىڭ الدىنداعى وقىرمانداردىڭ قوشتاسۋى, حالىقتىڭ ءنوپىرى ۇزىن-ىرعاسى شاماسى 40 مينۋتكە سوزىلدى. سوندا باس اياعى 1 ساعات دەيىكشى. كۇنى كەشە ماسكەۋدە ولەگ تاباكوۆتى شىعارىپ سالۋ كۇن رايىنىڭ قولايسىزدىعىنا قاراماستان بەس ساعاتقا سوزىلىپ, وعان ەدەن سىپىرۋشىدان ەتىكشىگە دەيىن كەلدى.
ارينە ماسەلە ۋاقىتتا ەمەس, ءار حالىقتىڭ ءوزىنىڭ ريتۋالدىق, شاريعاتقا نەگىزدەلگەن تالاپتارى دا بار بولار, دەيتۇرعانمەن دە كەي-كەيدە اقيقات نارسەنىڭ ءوزى دە وسىنداي سالىستىرۋلار ارقىلى ايقىندالىپ جاتپاي ما؟ عۇمىرى جەتكەنشە قازاق ساحناسىنا تاڭداۋلى تۋىندىلار بەرىپ, تالايدى تۇشىندىرىپ, تالاي تۇلعانى تىرىلتكەن (بەيبارىس, جاڭگىر, ماحامبەت, تەمىربەك, امىرە, ساكەن, مۇقاعالي, فاريزا, ت.ب.) جازۋشىنىڭ سوڭعى ساپارىنان دا ۇلت رۋحىنا نەگىزدەلگەن, ەل ەسىندە قالار ءبىر شاعىن ساحنالىق ليرو-تراگەديالىق كورىنىستىڭ (فراگمەنت), فارستىڭ جاسالعانى دۇرىس بولماس پا ەدى دەپ تە ويلايسىڭ. ءولىمنىڭ وزىنە ونەر قىزمەت ەتىپ جاتسا بۇل دا ءبىر جاڭالىق, وزگەشە قۇرمەت ءتۇرى, ەرەكشەلىك بولماس پا ەدى. بۇل ءولىمنىڭ وزىنەن دە ونەگە تۇيەتىن وزگە ەل داستۇرلەرىنىڭ بىزدە ءالى دە ۇردىسكە ەنبەگەنىن كورسەتپەي مە؟
بولماسا ەلگە ايرىقشا ەڭبەگى سىڭگەن ادامداردى سوڭعى ساپارعا شىعارىپ سالۋ ءراسىمى كەيبىر وڭىردە مادەنيەت باسقارماسى باسشىسىنىڭ ورىنباسارى دەڭگەيىندە وتكەنىن كوز كورگەندە, بۇل جيىنعا شۇكىرشىلىك ايتاسىڭ. رەسپۋبليكانىڭ بارلىق وڭىرلەرىنەن اياعى جەتكەننىڭ ءبارى كەلدى. ءبىر ءوزى ءبىر ەلدىڭ بيىگىندەي تالاي تۇلعالار ءجۇردى. ۇيىمداستىرىلۋىندا ءمىن جوق. جازۋشىنىڭ قوعامداعى, مەملەكەتتەگى, شەتجۇرتتاعى ورنى ءبارى-ءبارى رەتىمەن قامتىلدى. ءسوزدىڭ اسىلى ايتىلىپ, ولەڭدەر ارنالىپ, تەلەارنالار حابار بەرىپ (اسىرەسە, «قازاقستان»), الەۋمەتتىك جەلىلەر جارىلىپ كەتە جازداپ جاتتى, شۇكىر عوي. قۇدايدىڭ قۇدىرەتىمەن بولعان مىنا ءبىر سايكەستىكتى قاراڭىزشى.
ول ومىردەن كوشكەندە اكەمتەاتردا «سۇلتان بەيبارىس» قويىلىپ جاتتى. ومىردەن وتەرىنىڭ الدىندا استاناداعى ق.قۋانىشباەۆ تەاترىندا «امىرە», «فاريزا مەن مۇقاعالي» قويىلىپتى, اققۋ انىندەي بولىپتى. مۇقاعالي دەمەكشى, الاشتىڭ ءاسانالىسى ونى قوشتاسۋ راسىمىندە «پروزاداعى مۇقاعالي» دەۋىنىڭ ءوزى جۇرتتى ءبىر تەرەڭ كۇرسىندىردى. ءوز اسىلدارىمىزعا تەڭەۋدى ءوز ىشىمىزدەن تابۋى دا تاعلىم تۇيگىزىپ كەتتى. اتىراۋ وبلىسىنىڭ اكىمى نۇرلان نوعاەۆتىڭ قوناقاسىدا, قارالى جيىندا دا, توپىراق سالۋ كەزىندە دە كورگە ءتۇسىپ كەتەردەي بوپ ءجۇرۋى, كەسەك-كەسەك, تۋراپ-تۋراپ سويلەۋى نەگە تۇرادى!؟ اسىلىق بولماسىن, ءوزى دە ونەردەن قۇرالاقان ەمەس بيىك ازاماتتىڭ ءتۇر-تۇرپاتىن كورىپ تۇرىپ, ەكى تىزەسى ات قۇلاعىن تەۋىپ وتىراتىن يمانجۇسىپتەردىڭ ءوزى دە بولسا وسىنداي بولعان شىعار دەپ تە ويلايسىڭ.
شىن شىعارما پىكىر الۋاندىعىنان, كوزقاراستار قايشىلىعىنان تۋادى. تالانتتىڭ ءوزى قايشىلىقتان تۇرادى. وسى تۇرعىدان كەلگەندە جازۋشىنىڭ سوڭعى ۋاقىتتارداعى وي-تولعانىستارىنداعى ايتىلعان جايلارعا دا ۋاقىتتىڭ ءوزى وزگەرىس ەنگىزۋى ابدەن مۇمكىن. سەبەبى تالانتتى ادامنىڭ بويىندا ۇنەمى جىلى, كەرەعار اعىستار ءجۇرىپ جاتادى.
دارىننىڭ اتى دارىن. ول حالىقتىڭ ولشەۋسىز بايلىعى. سوندىقتان ول قوعامدا ءوز باعاسىن الۋى كەرەك. ولاي بولماعان كۇندە ادەبيەت پەن ونەردە ء«جاي پىسىقتار» (س.مۇقانوۆ), ء«سال شەنەۋنىكتەر» (م.اۋەزوۆ) العا شىعىپ كەتۋى جالعاسا بەرەدى. ال بۇلار قوعام ءۇشىن دە, مەملەكەت ءۇشىن دە اسا قاۋىپتى قۇبىلىستار.
تالانتتىڭ ءوز باعاسىن الۋى ءۇشىن قوعامدا, ونىڭ ىشىندە جەرگىلىكتى جەردە دە ميني-وماروۆتار, ميني-جانىبەكوۆتەر وتىرۋى ءتيىس. وسىلاي دەگەندە نۇرلان اسقار ۇلى نوعاەۆتىڭ راحاڭنىڭ 60 جىلدىعىندا «ورحون-ەنيسەي جازبالارىندا: «بەگىن سىيلاعان حالقى بولسا, حالقىن سىيلاعان بەگى بولسا – ول ەل ماڭگى بولادى» دەگەن جازۋ بار ەكەن. مىنە, ءبىز وسى ۇستانىممەن ءجۇرىپ كەلەمىز. وتباسىندا, ورتاسىندا ادامي قۇندىلىقتاردى ناسيحاتتاي بىلەيىك» دەگەن ءسوزى ەرىكسىز ەسىمە ءتۇستى.
بالكىم اڭىز, بالكىم اقيقات, ەرتەدە وقىعان ءبىر دەرەك ەسىمدە قالىپ قويىپتى. شىعىس جاقتا ءبىر كىشكەنتاي ەل بار دەيدى. سول ەلدىڭ زاڭدارى وتە قىسقا جازىلادى ەكەن. ءتىپتى زاڭدى بىلمەيتىن كورىنەدى. سەبەبى بۇل ەلدىڭ كارى-جاسى تەك ادەبيەتتى وقيدى ەكەن. «ادەبيەتى جوق ەلدە ادەپ بولمايدى» دەگەن ۇران-ءسوز كىسى بويىنداي ەتىپ جازىلىپ قويىلىپتى. سودان با ەكەن ەلدە قىلمىس اتاۋلى بولمايتىن كورىنەدى. قىلمىس جوق جەردە زاڭنىڭ كەرەگى نە؟! دەمەك, ەل ىزگىلىكپەن باسقارىلادى دەگەن ءسوز عوي. بىلايشا ايتقاندا, نۇرلانداي باسشىلارى, راحىمجانداي جازۋشىلارى بار ەل بولسا كەرەك.
قازا ۇستىندە كوڭىلدەن شىقپاي جۇرەتىن وسى ءبىر ءتامسىل دە كومەكەيدە بۇلكىلدەپ تۇرىپ الدى.
راحاڭنىڭ ءوزى اتىراۋدا وتكەن مەرەيتويى ۇستىندە «قۇداي باسقا سانا بەردى, قولعا قالام بەردى, تىلگە بوياۋ بەردى» دەگەنى بار ەدى. «مەنىڭ تىلىمدە اباي ءتىلىنىڭ مادەنيەتى بار» دەمەۋشى مە ەدى اۋەزوۆ. راحىمجاندا دا اباي مەن ماحامبەت ءتىلىنىڭ مادەنيەتى بار ەدى. ول ءتىرى ءسوز جازدى, ءىرى ءسوز جازدى. جازۋىن بىلاي قويعاندا, سويلەپ ءبىر كەتسە توگىپ-توگىپ جىبەرەتىن اق جاۋىنداي ەدى. ول بازبىرەۋدەي شابىت كۇتىپ وتىرمايتىن, شابىت دەگەن شارتتى نارسە عوي (رابوچەە سوستويانيە), قايتا كوڭىل قوشى جوق كەزدە توقتاۋسىز جازاتىن.
بۇل دۇنيەنىڭ شىن جالعان ەكەندىگىنە تاعى دا كوزىمىز جەتسە دە ول جالعان ءومىر سۇرمەدى, جالعان ءسوز جازبادى. ءومىر شىندىعىن ونەر تىلىمەن جەرىنە جەتكىزىپ كەتتى. قايتەيىك-اي!؟ مىناۋ جالعان دۇنيەگە بەس كۇن قوناق پەندەنىڭ قولىندا نە تۇر؟.. نە شارا؟..
ءتىرى ءسوزدىڭ, ءىرى ءسوزدىڭ يەسى, كەۋدەسى قارا ءسوزدىڭ كۇمبىرلەگەن كۇي ساندىعى, جازۋى شەرتپە كۇيدەي شۇيگىن, شىرىن, شەرلى ەدى.
قازاقستاننىڭ ەڭبەك سىڭىرگەن قايراتكەرى, حالىقارالىق ايتماتوۆ اكادەمياسىنىڭ اكادەميگى, الەمدىك دەڭگەيدەگى اسا كورنەكتى جازۋشى, قازاق ينتەللەكتۋالدى پروزاسىنىڭ ءىرى وكىلى راحىمجان وتارباەۆ ومىردەن وزدى دەگەندە ەسەڭگىرەپ وتىرىپ قالىپ ەدىك, ەندى ەس جيىپ, ەستى ءسوز جازۋعا بەت بۇرعان كەز بۇل. مۇندايدا ازا ءسوز جازۋعا جۇرەك شىركىن شىدار ما, قول جۇرەر مە؟ الگىندە ايتقانداي, شىن جازۋشىنىڭ ءولىمى اركىمدى دە وقىس ويلاندىرىپ, ءوز جۇرەگىنىڭ ىشىندەگى جۇرەكتىڭ شىندىعىنا ۇڭىلۋگە جەتەلەيتىن شىعار. سول شىڭىراۋداعى شىندىقتى جالعاننىڭ جارىعىنا شىم-شىمداپ شىعارىپ, شىرىلداتىپ ايتىپ جۇرگەن ساناۋلى سۋرەتكەردىڭ ءبىرى ەدى راحىمجان وتارباەۆ.
قايران, راحا! سوڭعى ۋاقىتتا بۇ دۇنيەنىڭ جالعاندىعى, پەندەشىلىك جونىندە كوپ ايتىپ, ۇلتىن رۋحاني كەمەلدىككە ۇمتىلدىرۋدىڭ قامىنداعى قىسقا-قىسقا قايىرىمدارعا دەن قويىپ ەدى. ايتۋىنداي ايتىپ, جازۋىنداي جازىپ كەتتى. ەندى قالعانى الاشقا امانات.
قايران, قالامگەر! بۇل ءومىردىڭ قامشىنىڭ سابىنداي قىسقا ەكەنىن ەرتە بولجادى ما ەكەن كەيىنگى تۇستا تۇلعالاردى قوپارىپ تۇگەندەۋگە كىرىسكەن ەدى.
– ءبىر شەتەل ساپارىنان ورالعان راحىمجاننىڭ سونداعى ءبىر ۇزدىگىپ, ۇگىلىپ سويلەگەنى ەسىمدە. سىزگە ءبىر مويىن بۇرا الماي قويدىم. ماڭگىلىك جۇرە بەرەتىندەيمىز عوي. وسى ۋاقىتقا دەيىن قاسىمدا عوي دەپ, الاڭسىز ءجۇردىم, ءسىز دە ءالى تولىق اشىلماي جاتقان قازىناسىز عوي, ەندى سىزگە تولايىم بۇرىلامىن. «ەدىل-جايىق» دەگەن پەسا جازامىن. جۇبان اعا ەكەۋىڭىز جونىندە. كەيىنگى كەزدەگى رۋحاني تۇلعالارىمىز تۋرالى جازىلىپ جاتقان دۇنيەلەردىڭ كوپشىلىگىنە كوڭىلىم تولمايدى دەپ ەدى, – دەگەن يليا اعانىڭ تولقىپ سويلەگەنى دە قازىر جادىمىزدا جاڭعىرىپ تۇر.
ءيا, ءوزى دە تۇلعاعا اينالعان ول ەندىگى جەردە تۇلعالاردىڭ بىرىڭعاي ساحنالىق گالەرەياسىن جاساۋعا كىرىسىپ ەدى. بىردە اتىراۋعا جول ءتۇسىپ, سارايشىققا بىرگە ساپارلاپ جول بويى اڭگىمەمىز تاۋسىلماي, قالاعا كەلگەن سوڭ دا جالعاسىپ قيماي قوشتاسقانىم ەسىمە ءتۇسىپ وتىر. سونداعى اڭگىمەنىڭ تۇرقى دا وسى ەدى. ءتىرى بولعاندا ول تۇگەندەر ەدى ءبارىن.
ءوزى تۋرالى 53 مينۋتتىك دەرەكتى فيلم ءتۇسىرىپ, ءوزى كورىپ كەتكەنى دە كوڭىلگە ءبىر دەمەۋ. اقۇشتاپ اقىن ايتقانداي, ءبىز ەندى ونى كومەمىز, قايتەمىز بارىنە كونەمىز.
دۇنيەدەگى قانداي قۇبىلىستى, قانداي ءساتتى بولسىن (قۋانىشتى, قارالى, ازالى, جانىڭ توزبەس ساتتەر, كورىنىستەر) جازۋشى ەڭ الدىمەن جۇرەگىنە جيادى, ءبارىن سونىڭ سۇزگىسىنەن وتكىزەدى. عالىمداردىڭ زەرتتەۋىنشە, ادام جۇرەگى كۇنىنە 100 مىڭ رەت سوعىپ, 2 توننا قان ايدايدى ەكەن. بۇل جالپىعا ءتان نارسە دەسەك, ال جۇرەگى جۇقا, نازىك ونەر ادامىنىڭ كۇنى نە بولماق؟! ءبارىن جۇرەگىنە جيىپ, جارىلىپ كەتۋ ءتان وعان. ول دا سول ءوز جۇرەگىنىڭ ىشىندەگى تاعى ءبىر جۇرەكتىڭ ءسوزىن سويلەپ, ايتقانىن ايتىپ, جاز دەپ ءامىر بەرگەنىن جازىپ كەتتى. «وتىرىگىمىز جاراسقان سوڭ دوس بولىپ ەدىك. ورتاعا شىندىق ءتۇسىپ, اجىراتىپ جىبەردى» دەپ ءوزى كۇندەلىگىندە جازعانىنداي, ول وتىرىك ءومىر سۇرە المادى. ونىڭ بار شىعارماشىلىعىنداعى ۇستانعانى وسى قاعيدا ەدى. ايتپاسا تۇرا المايتىن ونىڭ كەي تۇستا ارتىق تا كەتىپ, سونىڭ ۋايىمىن كوپ جەپ, ءوزىن جەل مۇجىگەن جارتاستاي ۇگىتىپ, ءوز جۇرەگىنىڭ وتىنا ءوزى جانىپ, جىلىنىپ جۇرەتىن. ءومىرىنىڭ سوڭىندا ول وسى ءبىر جۇدىرىقتاي ەت تۋرالى دا ءجيى ايتىپ, جۇرەگىم شىداسا جازاتىن نارسە كوپ دەيتىن.
ءجۇزىڭدى كورۋ ءۇشىن ايناعا قارايسىڭ. ال جۇرەگىڭدى كورۋ ءۇشىن قايدا قارايسىڭ؟! كىم ساقتايدى سەنىڭ جۇرەگىڭدى؟ حاس قالامگەردىڭ قازاسى قياداعى قىراننىڭ قازاسىنا ۇقساس. قىران جۇرەگىن جارتاسقا سوعىپ جارىپ جىبەرەدى ەكەن.
جازۋشىنىڭ, ونەر ادامىنىڭ جۇرەگىن كىم اشىپ كوردى دەيسىڭ. جوق اشىپ كورگەن ادام بار. ۇيىقتاعاندا دا جۇدىرىعىن ءتۇيىپ جاتاتىن 45 جاستاعى شۋكشين ومىردەن وزعاندا ونىڭ جۇرەگىن كورگەن دارىگەر دانا قاريانىڭ جۇرەگىنە بالاپتى. مىنا جۇرەكپەن قالاي جۇرگەن دەپ تاڭقالىپتى. ال ەندى ءوزىمىزدىڭ نۇراعاڭ – نۇرعيسانىڭ جۇرەگىن دارىگەردىڭ سوڭىندا ءبىر جۇما ءجۇرىپ, زورعا كەلىسىپ, ارنايى اپپاراتتان كورگەن بەلگىلى قالامگەر باسقار بيتانوۆتىڭ ىلگەرىدە «نۇرعيسانىڭ جۇرەگى» دەگەن ەسسە جازعانىن دا بىلەمىز. قاراپايىم حالىقتىڭ ءوزى الىپ وركەستردىڭ سۇيەمەلدەۋىندەگى سۇراپىل دۇنيەلەردى تىڭداعاندا جانىن قويارعا جەر تاپپاي كەتپەي مە, ال ەندى سونشاما الاپات مىنەزىن بىلاي قويعاندا, مۋزىكامىزدىڭ ماحامبەتى – ديريجەرلىك پۋلتتە تۇرعان نۇرعيسانىڭ جۇرەگى قالاي شىدادى ەكەن. تاڭقالارلىق جاعداي. ومىردەگى بار جۇمباق, تىلسىم ساتتەر وسىنداي قاراپايىم سالىستىرۋلار ارقىلى انىقتالادى ەكەن عوي.
ءوزىمىزدى قويىپ, وزگە ەلدەردى دە وتارلاي باستاعان سۇراپىل سۋرەتكەر وتارباەۆتىڭ دا جۇرەگى وسىنداي حالدە بولماعانىنا كىم كەپىل؟
اڭگىمەمىز جازۋشى تۋرالى بولعاننان كەيىن بە, كوڭىل دەگەن كوك دونەن دە جۇيتكىپ, ويىڭدى اساۋ اتتاي ءار قياعا الىپ قاشادى. مىناداي وي كەلەدى دوڭگەلەپ. كەيبىر الپاۋىت ەلدەرگە ات باسىن تىرەگەندە بايقايتىنىمىز, ەسكەرتكىشتەردە, سيمۆولدىق دۇنيەلەردە ناقتىلىقتان گورى ابستاركتسيالىق جايلارعا كوبىرەك كوڭىل اۋدارىپ, ادامنىڭ قۇدىرەت-كۇشىن تىلسىم قۇبىلىستار, توسىن ساتتەر ارقىلى بەينەلەۋ بەلەڭ العان. ادام مەن تابيعات, ونداعى تىرشىلىك يەلەرى ءبىتىسىپ, استاسىپ كەتكەن.
باسقاسىن بىلاي قويعاندا الاقانداي بالتىق جاعالاۋىنىڭ ءبىر ەلىندە كوك جۇزىندە قالقىپ بارا جاتقان قۇستاردى بەينەلەيتىن ەسكەرتكىشكە «حالىق ءانى» دەگەن ءسوز قاشاپ جازىلىپ, سونادايدان ۇزىلدىرەدى كورگەن كىسىنى. ءتىپتى ءبىر ەلدە بايلىق پەن كەدەيلىككە سوعىلعان ەسكەرتكىش تە بار. مۇنىڭ ءبارى ادامنىڭ ارمان-اڭسارىنان, ماقسات-مۇراتىنان تۋعان تۋىندىلار. كەلەشەك ۇرپاقتىڭ كوڭىل كەڭىستىگىنە وسىنداي وي سالاتىن, ءتىپتى وپىندىراتىن توسىن تۋىندىلار جاساۋ جولىنداعى ىرگەلى, ىڭكار ىزدەنىستەرگە دە بەت بۇراتىن كەز كەلدى عوي. ونداي دۇنيە جاساۋعا كەلگەندە قابىلەتى ون وراپ الاتىن شەبەرلەر دە بىزدە جوق ەمەس. سوندىقتان ومىردەن وزعان بار جازۋشىعا (شىن جازۋشىعا) ەسكەرتكىش سوعۋ مۇمكىن ەمەس شىعار. الايدا «جازۋشىنىڭ جۇرەگى» دەگەن اتاۋمەن ءبىر ەسكەرتكىش ورناتسا قانەكي!؟..
ر.S. كىم ءبىلسىن, جىلقىنىڭ ءمۇسىنىن, سۋرەتىن كوپ جينايتىن داعدىسى بار ەدى. بالكىم, ونىڭ جۇرەگى جىلقىنىڭ جۇرەگىنە اينالىپ كەتكەن شىعار.
قالي سارسەنباي