10 ءساۋىر كۇنى «استانا وپەرانىڭ» كامەرالىق زالىندا «ماڭگىلىك ۆەنا كلاسسيكاسى» شىرقالادى. اۆستريالىق ۇلى كومپوزيتورلاردىڭ تۋىندىلارى ديريجەر ەلدار ساپاراەۆتىڭ جەتەكشىلىگىمەن «استانا وپەرا» كامەرالىق وركەسترىنىڭ ورىنداۋىندا كورەرمەن نازارىنا ۇسىنىلاتىن بولادى. سوليست – قازاقستاننىڭ ەڭبەك سىڭىرگەن قايراتكەرى, تەاتر وركەسترىنىڭ ءسوليسى, كەرەمەت سكريپكاشى باعدات ءابىلحانوۆ, دەپ حابارلايدى استانا قالاسى اكىمدىگىنىڭ رەسمي سايتى.
كەش باعدارلاماسىنا ۆ. ا. موتسارتتىڭ عاجايىپ, دەموكراتياشىل ءارى پالساپالىق «سيقىرلى فلەيتا» وپەراسىنا جازىلعان كوڭىلدى دە شۋاعىن شاشقان ۋۆەرتيۋرا ەندى. ءداستۇرلى زينگشپيل جانرىندا جازىلعان ەرتەگى-وپەرا مۋزىكالىق تەاترداعى ەڭ تانىمال سپەكتاكلدەردىڭ بىرىنە اينالدى. مانەرلى تاسىلدەرىنىڭ مولدىعى, گۋمانيستىك مازمۇنى مەن شابىتقا تولى اۋەندىلىگى ارقاسىندا شىعارما بارلىق الەمدىك وپەرا ساحنالارىندا سالتانات قۇردى.
سونداي-اق, مۋزىكانتتار ي. گايدننىڭ № 85 سيمفونيا سي-بەمول ماجورىن ۇسىنادى. اۆستريالىق كلاسسيكتىڭ شىعارماشىلىعىنا تابىنۋشىلار بۇل تۋىندىنى «پاتشايىم» دەپ اتاپ كەتكەن, سەبەبى اتالعان سيمفونيانى فرانتسۋز پاتشايىمى ماريا-انتۋانەتتا ەرەكشە ءسۇيىپ تىڭداعان. ي. گايدننىڭ مۋزىكاسىنداعىداي, ونىڭ دۇنيەتانىمىندا دا ومىرگە دەگەن ۇيلەسىمدى ءارى ايقىن كوزقاراس باسىم, سونىڭ ناتيجەسىندە سيمفونيانى جۇيەلى, بەينەلى, قانىق تۇردە وزگەرمەس سەنىمدىلىك پەن جاراسىمدى ءازىل سيپاتتايدى.
«استانا وپەرا» سيمفونيالىق وركەسترىنىڭ ءسوليسى باعدات ءابىلحانوۆتىڭ ورىنداۋىندا ۆ. ا. موتسارتتىڭ ەڭ اتاقتى سكريپكالىق كونتسەرتى – وركەسترمەن سكريپكاعا ارنالعان № 5 كونتسەرت ليا ماجور شىرقالادى.
- ۆ. ا. موتسارتتىڭ سكريپكاعا ارنالعان بەسىنشى كونتسەرتى – كەمەڭگەر كومپوزيتور شىعارماشىلىعىنىڭ ناعىز جاۋھارى, XVIII عاسىرداعى كونتسەرت ءستيلىنىڭ اسقار شىڭى. تۋىندى وزىندىك ەرەكشەلىگىمەن, عاجايىپ قۇرىلىمىمەن, تەاترلىعىمەن, اسقاق جالىنىمەن, اسەمدىگىمەن جانە قۋلىعىمەن وزگەشەلەنەدى. بىرەگەي ءۇشىنشى بولىگىنىڭ ارقاسىندا كونتسەرت «تۇرىك» اتاۋىنا يە بولعان. سول زامانداعى قالىپتاسقان «جاقسى مىنەز ەرەجەسىنە» قاراماستان, كەربەز مەنۋەتتە (كونە فرانتسۋز ءبيى) كەنەتتەن حالىق اراسىنان شىققان «كوشە» كەيىپكەرى – سول ۋاقىتتا سانگە اينالعان «تۇرىك» مۋزىكاسىنا ەلىكتەپ, بيگە باسقان سىعان پايدا بولادى. كونتسەرتتىڭ سوڭى شىعارماشىلىق رۋحتىڭ ەركىندىگىن ماداقتايتىن باتىل سەرپىلىس بولدى, - دەپ اتاپ ءوتتى باعدات ءابىلحانوۆ. كونتسەرتتىڭ باستالۋى ساعات 19:00-دە.