«ەگەمەن قازاقستان» 1994 جىل. سەنبى, 17 جەلتوقسان.
«ەگەمەن قازاقستان» گازەتى رەداكتسياسىنىڭ ۇجىمى مەن وقىرماندارىنا
وسىدان 17 جىل بۇرىنعى 17 جەلتوقسانداعى گازەتتىڭ مەرەكەلىك ءنومىرى تۇتاستاي گازەتتىڭ ءبىرىنشى ءنومىرىنىڭ شىققانىنا 75 جىل تولۋىنا ارنالىپتى. مۇندا ءبىرىنشى بەتتەن باستاپ سوڭعى بەتكە دەيىن گازەت شەجىرەسى شەرتىلگەن. سونداي-اق بۇل ءنومىر شاعىن فورماتپەن شىعارىلىپتى. گازەتتىڭ ەكىنشى بەتىندە جوعارىداعىداي اتاۋمەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ گازەت رەداكتسياسى مەن وقىرماندارىن قۇتتىقتاۋى بەرىلگەن. وندا بىلاي دەلىنگەن: قازاق ءباسپاسوزىنىڭ قارا شاڭىراعى «ەگەمەن قازاقستان» گازەتى رەداكتسياسىنىڭ ۇجىمى مەن قالىڭ وقىرمانىن گازەتتىڭ شىعا باستاعانىنا 75 جىل تولۋ مەرەيتويىمەن شىن جۇرەكتەن قۇتتىقتايمىن. العاشقى ءنومىرى «ۇشقىن» دەگەن اتپەن شىققان بۇگىنگى «ەگەمەن قازاقستان» گازەتى ءوز حالقىمەن بىرگە ءومىردىڭ ىستىق- سۋىعىن تەڭ ءبولىسىپ, تاريحتىڭ قيلى كەزەڭدەرىن باسىنان بىرگە كەشىپ كەلەدى. ونىڭ قالىپتاسۋى مەن دامۋ كەزەڭدەرىندە قاھارماندىعى مەن قاسىرەتى بىرگە ءورىلىپ وتىرعان تۇتاس ءداۋىرىمىزدىڭ شىندىعى جاتىر. بۇل گازەت قاي كەزەڭدە دە ءوز حالقىنا ۇلكەن ونەگە مەن تاربيە مەكتەبى بولا ءبىلدى. ەل تاريحىنداعى ەلەۋلى كەزەڭدەردىڭ ەشقايسىسى گازەت نازارىنان تىس قالعان جوق. سونىمەن بىرگە ول رەسپۋبليكانىڭ زيالى قاۋىمىن قالىپتاستىرۋعا, ەلدىڭ رۋحاني جاعىنان وركەندەۋىنە ءوزىنىڭ لايىقتى ۇلەسىن قوستى. العاشقىدا «ۇشقىن», ودان كەيىن «ەڭبەك تۋى», «ەڭبەكشى قازاق», «سوتسيالدى قازاقستان», «سوتسياليستىك قازاقستان» دەگەن اتتارمەن حالىققا كەڭىنەن تاراعان وسى گازەتتە ءار جىلدارى الاشتىڭ اياۋلى ۇلدارى – ساكەن سەيفۋللين مەن تۇرار رىسقۇلوۆ, سماعۇل سادۋاقاسوۆ پەن وراز جاندوسوۆ, مىرجاقىپ دۋلاتوۆ پەن جۇسىپبەك ايماۋىتوۆ, تەمىربەك جۇرگەنوۆ پەن وراز يساەۆ, بەيىمبەت مايلين مەن جانايدار سادۋاقاسوۆ, ءسابيت مۇقانوۆ پەن عابيت مۇسىرەپوۆ ەڭبەك ەتكەن. سونىمەن بىرگە بۇل شاڭىراقتان كورنەكتى جازۋشىلار مەن بەلگىلى عالىمداردىڭ ۇلكەن ءبىر شوعىرى تاربيەلەنىپ شىقتى. قازىر ەڭبەك جولىن وسى گازەتتەن باستاعان كوپتەگەن قوعام قايراتكەرلەرى رەسپۋبليكانىڭ قوعامدىق-ساياسي ومىرىنە قىزۋ ارالاسىپ ءجۇر. قازىر ەلىمىزدىڭ تاۋەلسىزدىگى, دۇنيەجۇزىلىك قوعامداستىقتاعى ورنى باسپاسوزگە كەڭ ءورىس اشىپ وتىر. وسى ورايدا وقىرماندارعا نارىق پروتسەسىنىڭ باعىت-باعدارلارىن, ينتەگراتسيانىڭ, ۋاقىت اكەلگەن باسقا دا وڭدى وزگەرىستەردىڭ قىرى مەن سىرىن, تاريحىمىزدىڭ ايتىلماي كەلگەن اقتانداق تۇستارىن جان-جاقتى اشىپ كورسەتۋ, وقىرماندارعا جەتكىزۋ «ەگەمەن قازاقستان» الدىندا تۇرعان اسا ماڭىزدى مىندەتتەردىڭ ءبىرى بولىپ سانالادى. ەلدىكتى, تاۋەلسىزدىگىمىزدى باياندى ەتۋ, كوپ ۇلتتى قازاقستان حالقىنىڭ كەلىسىم مەن جاراستىعىن, ساياسي تۇراقتىلىقتى ورنىقتىرۋ رەسپۋبليكانىڭ باس گازەتىنە زور جاۋاپكەرشىلىكتەر جۇكتەيتىنىن ايتا كەتكىم كەلەدى. گازەت رەداكتسياسىنىڭ ۇجىمىن, ونىڭ سان مىڭداعان وقىرماندارى مەن جاناشىرلارىن «ەگەمەن قازاقستاننىڭ» شىعا باستاعانىنا 75 جىل تولۋىمەن تاعى دا قۇتتىقتاي وتىرىپ, زور دەنساۋلىق, شىعارماشىلىق تابىس, باقىت تىلەيمىن.نۇرسۇلتان نازارباەۆ,
قازاقستان رەسپۋبليكاسىنىڭ پرەزيدەنتى.