بۇگىندە قازاقستاندىق گۇرزى جۇدىرىق يەلەرىنەن الەمنىڭ كەز كەلگەن بوكسشىلارى قايمىعىپ, ءبىزدىڭ باتىرلارمەن ساناساتىنى بەلگىلى. بۇل الەمدىك بوكستا قازاقستاندىق سپورتشىلاردىڭ وزىندىك ويىن ورنەگى بار ەكەندىگىن كورسەتكە كەرەك. دۇنيەنىڭ ءار قيىرىنان 300-گە تارتا سپورتشى قاتىسقان ۆەنگرياداعى جاستار اراسىنداعى ايتۋلى حالىقارالىق تۋرنيردە اقمولالىق سپورتشى جاسىنداي جارقىرادى.
ۆەنگريانىڭ ەدەر قالاسىندا جاستار اراسىندا وتكەن حالىقارالىق تۋرنيردە اقمولا وبلىسىنىڭ بوكسشىسى تالعات شايكەن ەشكىمگە دەس بەرگەن جوق. قازاقستان جاستار قۇراما كومانداسى ساپىندا سىنعا تۇسكەن ول 64 كيلو سالماقتا چەمپيون اتاندى. ءبىرىنشى جەكپە-جەكتە تالعات گەرمانيالىق بوكسشىنى جەڭىپ, العا وزدى. كەلەسى ايقاستا ول جەرگىلىكتى ۆەنگر بوكسشىسىن تىزە بۇكتىرىپ, ءوزىنىڭ مىقتى ەكەندىگىن تاعى دالەلدەدى. بۇدان كەيىنگى جۇدىرىقتاسۋ دانيا سپورتشىسىمەن جالعاستى. فينالدىق سايىستا اقمولالىق سپورتشى السىزدىك تانىتپاي, قارسىلاسىن تىقسىرا ءجۇرىپ قاپى قالدىردى. وسىلايشا ءۇش كەزدەسۋ ناتيجەسى بويىنشا جەرلەسىمىز التىن جۇلدە الدى.
رەتى كەلگەندە ايتا كەتەيىك, تالعات قاجىمۇقان اتىنداعى №3 ارنايى وبلىستىق بالالار-جاسوسپىرىمدەر سپورت مەكتەبىنىڭ تاربيەلەنۋشىسى. سونداي-اق ول جاتتىقتىرۋشى قۋات بەيسەنباەۆتىڭ جەكە جەتەكشىلىگىمەن شەبەرلىگىن شىڭداپ كەلەدى. الدا تالعات شايكەندى ءالى وقۋ-جاتتىعۋ جيىندارى مەن جوسپارلانىپ وتىرعان بانگكوك قالاسىندا (تايلاند) وتەتىن ازيا چەمپيوناتى كۇتىپ تۇر.
اسقار تۇراپباي ۇلى,
«ەگەمەن قازاقستان»
اقمولا وبلىسى