بۇگىن ۇكىمەت ۇيىندە ەنەرگەتيكا ۆيتسە-ءمينيسترى ماعزۇم مىرزاعاليەۆتىڭ قاتىسۋىمەن پرەزيدەنتتىڭ «ەلدى گازبەن قامتاماسىز ەتۋدى جالعاستىرۋ» بەسىنشى باستاماسىن ىسكە اسىرۋعا ارنالعان ءباسپاسوز كونفەرەنتسياسى ءوتتى.
ماعزۇم مىرزاعاليەۆتىڭ ايتۋىنشا, 2014 جىلى ۇكىمەت قازاقستاندى 2015–2030 جىلدارعا دەيىن گازداندىرۋدىڭ باس سحەماسىن بەكىتتى. وسى سحەماعا سايكەس گازداندىرۋ دەڭگەيىن اعىمداعى 47%-تەن 2030 جىلعا قاراي 56%-كە دەيىن جەتكىزۋ كوزدەلىپ وتىر. بۇل 3 ملن ادامدى نەمەسە 1,6 مىڭنان استام ەلدى مەكەندى گازبەن قامتاماسىز ەتۋگە مۇمكىندىك بەرەدى.
«گاز تاسىمالداۋ ينفراقۇرىلىمىن دامىتۋدىڭ ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋدە جانە رەسپۋبليكا ەكونوميكاسى ءۇشىن ستراتەگيالىق ءمانى اسا زور. سونداي-اق, بۇل ەل حالقىنىڭ ەكولوگيالىق جانە الەۋمەتتىك ءال-اۋقاتىن جاقسارتۋعا جول اشادى», — دەدى ۆيتسە-مينيستر.
سپيكەردىڭ بەرگەن مالىمەتىنە سايكەس, تاۋەلسىزدىك جىلدارى گازدى ىشكى تۇتىنۋ 1,5 ەسەگە وسكەن (1991 جىلى 9 ملرد م3-تان 2017 جىلى 13,8 ملرد م3-قا دەيىن). كوممۋنالدىق جانە تۇرمىستىق كاسىپورىندار مەن حالىقتىڭ گازدى تۇتىنۋ كولەمىنىڭ ءوسۋى قر گازداندىرۋدىڭ باس سحەماسىندا قاراستىرىلعان شارالار كەشەنىن جۇزەگە اسىرۋمەن بايلانىستى.
«قىزىلوردا — جەزقازعان — قاراعاندى — تەمىرتاۋ — استانا — كوكشەتاۋ — پەتروپاۆل» باعىتى بويىنشا «سارىارقا» ماگيسترالدى گاز قۇبىرى جوباسىنا «قازترانسگاز» اق تەحنيكالىق–ەكونوميكالىق نەگىزدەمە ازىرلەگەن بولاتىن. وعان «مەمساراپتاما» رمك وڭ باعاسىن بەردى. تەن-گە سايكەس جوبانىڭ جالپى قۇنى — 370 ملرد تەڭگەنى (ققس-مەن) قۇرايدى. جوبانى كەزەڭ-كەزەڭىمەن ىسكە اسىرۋ كوزدەلگەن.
م. مىرزاعاليەۆتىڭ ايتۋىنشا, بۇگىندە مەملەكەت باسشىسىنىڭ تاپسىرماسىنا سايكەس ۇزىندىعى 1081 شاقىرىم, قۇنى 267 ملرد تەڭگە بولاتىن «قىزىلوردا — جەزقازعان — قاراعاندى — استانا» باعىتى بويىنشا ءبىرىنشى كەزەڭ ازىرلەنىپ جاتىر. گاز قۇبىرىنىڭ وسى ۋچاسكەسى استانا, قاراعاندى, تەمىرتاۋ, جەزقازعان قالالارىنىڭ تۇرعىندارىن جانە ماگيسترالدى گاز قۇبىرى تراسساسى بويىنا جاقىن ورنالاسقان ەلدى مەكەندەردى تابيعي گازبەن قامتاماسىز ەتەتىن بولادى.
«سارىارقا» جوباسىن ىسكە اسىرۋ استانادا اۋاعا تاستالاتىن زياندى قالدىقتاردى جىلىنا 36,1 مىڭ تونناعا دەيىن ازايتۋعا مۇمكىندىك بەرەدى. «سارىارقا» ماگيسترالدى گاز قۇبىرىنىڭ قۇرىلىسى بارىسىندا شامامەن 800 جۇمىس ورنى جانە ونى پايدالانۋ كەزەڭىندە 225 جۇمىس ورنى اشىلادى دەپ كوزدەلىپ وتىر.
سونىمەن قاتار, قاراعاندى, اقمولا وبلىستارى جانە استانا قالاسى اكىمدىكتەرى گاز تاراتۋ جەلىلەرىن جوبالاۋ مەن سالۋ ماسەلەلەرىن پىسىقتاپ جاتىر. وسىلايشا تاراتۋ جەلىلەرىنىڭ ءبىرىنشى كەزەڭى گاز قۇبىرىنىڭ قۇرىلىسى اياقتالىسىمەن 2019 جىلدىڭ جەلتوقسانىندا قوسىلۋعا دايىن بولۋى ءتيىس.
ەسكە سالا كەتەيىك, بيىل 5 ناۋرىزدا ەلباسى قازاقستان حالقىنا ارناعان ۇندەۋىندە ءبىر جارىم جىل ىشىندە, ياعني 2019 جىلدىڭ جەلتوقسان ايىنا دەيىن استانانى, قازاقستاننىڭ ورتالىق جانە سولتۇستىك وڭىرلەرىن گازبەن قامتاماسىز ەتۋ ماقساتىندا «قىزىلوردا — جەزقازعان — قاراعاندى — تەمىرتاۋ — استانا» باعىتى بويىنشا «سارىارقا» ماگيسترالدى گاز قۇبىرىنىڭ قۇرىلىسى جوباسىن جۇزەگە اسىرۋدى تاپسىردى.