پاۆلودار قالاسىندا وتكەن ءماشھۇر ءجۇسىپتىڭ 160 جىلدىعىنا ارنالعان «كۇي تارتىس» بايقاۋى وبلىستىق ءبىلىم بەرۋ باسقارماسىنىڭ باستاماسىمەن وسىمەن 7-ءشى رەت ۇيىمداستىرىلىپ وتىر. بايقاۋ بولعان كۇنى وقۋشىلار سارايىندا «رۋحاني جاڭعىرۋ» كابينەتى اشىلدى.
بايقاۋعا 10-15 جاس ارالىعىنداعى 30-عا جۋىق وقۋشى قاتىستى. الدىمەن, قازىلار القاسى كۇيشىلەردى جەكە-جەكە تىڭداپ الدى. ۇمىتكەرلەرگە باعا بەرۋ بارىسىندا ولاردىڭ ورىنداۋ شەبەرلىگى, ارتىستىگى, ەكى قولدىڭ قويىلىمى, ساحنالىق كيىمى باستى نازارعا الىندى. كەلەسى كەزەكتە كۇيشىلەر جەكپە-جەك كەزدەسىپ, كۇي تارتىس تا باس-الدى. ونەرپاز ورەندەر قۇرمانعازىنىڭ «بالبىراۋىن», «اداي», داۋلەتكەرەيدىڭ «تۇركىمەن», ءا.جەلدىباەۆتىڭ «ەركە-سىلقىم», دينانىڭ «توي باستار» كۇيلەرىن جانە باسقا حالىققا كەڭىنەن تانىمال شىعارمالاردى ورىنداپ بەردى.
جاھاندانۋ زامانى ۇستەمدىك قۇرا باستاعانىنا قاراماستان كىشكەنتايلارىنان قولدارىنا دومبىرا ۇستاپ, ۇلتتىق ونەردى ۇلىقتاپ جۇرگەن ۇل-قىزدارعا ىشتەي ريزا بولىپ, قىزىعا قارادىق.
اسا تارتىستى بايگەنىڭ باس جۇلدەسى وبلىس ورتالىعىنداعى قۇرمانعازى اتىنداعى №1 بالالار مۋزىكا مەكتەبىنىڭ وقۋشىسى ايشات باقىتوۆاعا بەرىلدى.
– بۇل جەڭىسىمدى ۇستازىم قۋانىش مەيرام ۇلىنا ارنايمىن. بۇل سىندا تولەگەن مومبەكوۆتىڭ «سالتانات» كۇيىن ورىندادىم, – دەيدى ايشات قۋانىشىن جاسىرا الماي.
ال 1-ءشى ورىندى ەكىباستۇزداعى بالالار مۋزىكا مەكتەبىنىڭ وقۋشىسى ارمان سەرىكوۆ, 2-ءشى ورىندى پاۆلودارداعى №2 مەكتەپتىڭ وقۋشىسى ايدوس اۋباكىروۆ پەن №35 مەكتەپتىڭ وقۋشىسى داريعا ساحيەۆا يەلەنسە, 3-ءشى ورىندى ەرتىس اۋدانى بالالار ونەر مەكتەبىنىڭ وقۋشىسى ايمان ىلياشەۆا مەن وقۋشىلار سارايىنىڭ «جاس ەكپىن» دومبىرا ءانسامبلىنىڭ مۇشەسى اسەمگۇل توقباەۆا الدى.
فاريدا بىقاي, «ەگەمەن قازاقستان» پاۆلودار