يسپانيانىڭ «سەۆيليا» كومانداسى چەمپيوندار ليگاسىنىڭ 1/8 فينالىندا سىرت الاڭدا انگليانىڭ «مانچەستەر يۋنايتەد» كومانداسىمەن كۇش سىناسىپ, 2:1 ەسەبىمەن جەڭىسكە جەتتى.
ويىننىڭ العاشقى بولىگىندە ەسەپ اشىلمادى. ال كەلەسى 45 مينۋتتا يسپانيالىق كوماندا بەلسەندىلىك تانىتىپ, نەبارى ءتورت مينۋتتىڭ ىشىندە ويىن تاعدىرىن شەشىپ كەتتى. 74-مينۋتتا فرانتسيالىق شابۋىلشى ۆيسسام بەن يەددەر «سەۆيليانى» العا شىعارسا, 78-مينۋتتا دۋبل يەسى اتاندى.
نەگىزگى ۋاقىتتىڭ اياقتالۋىنا التى مينۋت قالعاندا «قىزىل سويقاندار» ساپىنان رومەلۋ للۋكاكۋ ەسەپ ايىرماسىن قىسقارتقان. بىراق وسىدان كەيىن جانۇشىرا العا ۇمتىلعانمەن اعىلشىن كومانداسى سەرحيو ريكونىڭ قاقپاسىنان ساڭىلاۋ تابا المادى.
وسىلايشا قوس كەزدەسۋدىڭ قورىتىندىسى بويىنشا اندالۋسيالىق كوماندا 60 جىلدان كەيىن چەمپيوندار ليگاسىنىڭ شيرەك فينالىنا العاش رەت جولداما الدى.
ال يتاليانىڭ «روما» كومانداسى ءوز الاڭىندا ۋكراينانىڭ «شاحتەر» كومانداسىن قابىلداپ, 1:0 ەسەبىمەن جەڭىسكە جەتتى. جەڭىستى گولدى 52-مينۋتتا ەدين دجەكو سالدى.
ايتا كەتەرلىگى, العاشقى كەزدەسۋدە ۋكراينالىق كوماندا ريمدىكتەردى 2:1 ەسەبىمەن ۇتقانمەن, ەكى ويىننىڭ قورىتىندىسى بويىنشا چەمپيوندار ليگاسىنىڭ 1/4 فينالىندا «روما» كلۋبى ءوتتى.