ورتالىق كوممۋنيكاتسيالار قىزمەتى الاڭىندا قازاقستانداعى ايەلدەر كاسىپكەرلىگىنىڭ دامۋىنا ارنالعان ءماسليحات ءوتتى. شاراعا «اتامەكەن» ۇكپ ىسكەر ايەلدەر كەڭەسىنىڭ ءتورايىمى لاززات رامازانوۆا, جامبىل وبلىسى وڭىرلىك ىسكەر ايەلدەر كەڭەسىنىڭ ءتورايىمى ايگۇل اقشالوۆا, اتىراۋ وبلىسى وڭىرلىك ىسكەر ايەلدەر كەڭەسىنىڭ ءتورايىمى ءاليا بەكقوجيەۆا, ىسكەر ايەلدەر كەڭەسىنىڭ مۇشەسى گۇلميرا شاجانباەۆا قاتىسىپ, ويلارىمەن ءبولىستى.
جيىن بارىسىندا «اتامەكەن» ۇكپ ىسكەر ايەلدەر كەڭەسىنىڭ ءتورايىمى ءلاززات رامازانوۆا نازىك جاندىلاردىڭ كاسىبىن قولداۋدا ءتۇرلى شارالار اتقارىلىپ جاتقانىن تىلگە تيەك ەتتى. ال, اتىراۋ وبلىسى وڭىرلىك ىسكەر ايەلدەر كەڭەسىنىڭ ءتورايىمى ءاليا بەكقوجيەۆا ايەلدەر قاۋىمى ءار سالادى قىزمەت ەتىپ جۇرگەنىن ايتتى.
«كەشەگى ايەل كاسىپكەر بۇگىنگى ۇلكەن زاۋىتتىڭ نەمەسە ءوندىرىستىڭ باسشىسى. توقسانىنشى جىلدارى توقىراۋ باستالعاندا ءاربىر ايەل, ءاربىر انا بالاسىن باعۋ ءۇشىن, وتباسىنىڭ بەرەكەتىن ساقتاپ قالۋ ءۇشىن, الا دورباسىن الىپ جولعا دا شىقتى, باسقا دا قىزمەتتەر ىستەدى ءبىز ونى بىلەمىز. اتىراۋ وبلىسىندا جاڭا فارماتسەۆتيكالىق زاۋىت سالىنىپ جاتىر. ونى دا باستاعان ايەل. قازىرگى ۋاقىتتا نازىك جاندىلارىمىزدى قۇرىلىستان دا كەزدەستىرۋگە بولادى. بالىق وندىرىسىندە دە ءجۇر. بۇرىن بالىق اۋلاۋعا تەك ازاماتتارىمىز شىعۋشى ەدى. بۇگىنگى كۇنى ول كاسىپتى دە ايەلدەر دوڭگەلەتىپ وتىر. ونىڭ ءوزى ءبىزدىڭ ارىپتەستەرىمىزدىڭ, قىز-كەلىنشەكتەرىمىزدىڭ دەڭگەيىنىڭ كوتەرىلگەندىگى دەپ ايتۋعا بولادى», دەپ اتاپ ءوتتى اتىراۋ وبلىسى وڭىرلىك ىسكەر ايەلدەر كەڭەسىنىڭ ءتورايىمى ءاليا بەكقوجيەۆا.
راۋان قايدار,
«ەگەمەن قازاقستان»