وڭىردە سوڭعى كۇندەرى تولاستاماي جاۋعان جاڭبىر قاسات قاردى لەزدە ەرىتىپ, ايماقتاعى ۇيلەر, اۋلالار مەن قورا-قوپسىنى سۋ الا باستادى.
وبلىستىق توتەنشە جاعدايلار دەپارتامەنتى ءباسپاسوز قىزمەتىنى تاراتقان مالىمەتتەرىنە سۇيەنسەك, قازىرگى ۋاقىتتا 6 جەكە مەنشىك ءۇي مەن 25 اۋلا اۋماعىن سۋ باسقان. ناقتىراق ايتساق, وسكەمەندە 4 ءۇي مەن 14 ۋچاسكە, اياگوز اۋدانىندا 2 ءۇي مەن 6 ۋچاسكە, ۇلان اۋدانىندا 5 اۋلا اۋماعى جاڭبىر مەن ەرىگەن قار سۋىنىڭ استىندا قالعان. توتەنشە جاعدايلار دەپارتامەنتىنىڭ 200 قىزمەتكەرى, 50 تەحنيكاسى مەن 20 سۋ سورۋ قۇرىلعىسى وسكەمەن قالاسى جانە اياگوز, ۇلان, گلۋبوكوە اۋداندارىندا كۇن-ءتۇن دەمەي ءتىلسىز جاۋمەن كۇرەسۋدە. قۇتقارۋشىلاردىڭ ءبىر توبى ۇلان اۋدانىنىڭ ماماي باتىر اۋىلى تۇرعىندارىنىڭ قاۋىپسىزدىگىن كۇزەتۋگە جۇمىلدىرىلىپتى. سەبەبى, قارعىن سۋ اۋىل شەتىندەگى كوپىردىڭ ۇستىنە شىعىپ كەتكەن. سونىمەن قاتار گلۋبوكوە اۋدانىنىڭ ۋشانوۆ اۋىلىندا ەلدى مەكەندەگى ۇيلەرگە سۋدى جىبەرمەۋ ءۇشىن جولداردى تازارتۋ جانە قۇم توگۋ جۇمىستارى جۇرگىزىلۋدە. دەپارتامەنت قىزمەتكەرلەرى ءبىر تاۋلىكتە 23 ادامدى قاۋىپسىز جەرگە كوشىرىپتى.
ال وبلىس ورتالىعى – وسكەمەندە تۇرعىن ۇيلەردىڭ اۋلالارى مەن جەكە مەنشىك ۇيلەردى سۋ باسۋمەن قاتار قالانىڭ ورتالىق كوشەلەرى دە كولكىگەن سۋ استىندا قالىپ وتىر. كوشەگە جايىلعان كولكىگەن سۋدان ادامدار تۇگىل كولىكتەردىڭ ءوزى ازەر وتۋدە. قالا اكىمىنىڭ ءباسپاسوز قىزمەتىنىڭ حابارلاۋىنشا, قارعىن سۋ كراسين, كۇلەنوۆ, شمەلەۆ لوگ, احمەر, سامسونوۆ, ابلاكەت جانە ميرنىي ەلدى مەكەندەرىنىڭ تۇرعىندارىن ابىگەرگە سالۋدا. سامسونوۆ اۋىلىنان 10 ادام قاۋىپسىز جەرگە كوشىرىلگەن. «وسكەمەن ءتارتىپ» مەكەمەسىنىڭ ديرەكتورى تامارا راحىمجانوۆا قازىرگى ۋاقىتتا قولدا بار تەحنيكالار تەك سۋ باسقان ۇيلەرگە عانا جىبەرىلگەنىن, مولشەردەن تىس سۋدى تاراتۋعا جەراستى قۇدىقتارىنىڭ شاماسى جەتپەي جاتقانىن حابارلادى.
ازامات قاسىم, «ەگەمەن قازاقستان»
شىعىس قازاقستان وبلىسى
سۋرەتتى تۇسىرگەن تىلەۋبەك شاياحمەت