ۇلتتىق بىرىڭعاي تەستىلەۋدى تاپسىرۋعا نەمەسە جوعارى وقۋ ورىندارىنا تۇسۋگە ازىرلەنۋگە اۋىلدى جەرلەردەن گورى قالادا كوپ مۇمكىندىك بار ەكەنى بەلگىلى. دەگەنمەن سوڭعى جىلدارى شالعايداعى اۋىل مەكتەپتەرىنە دە كوڭىل بولىنە باستادى.
وسى رەتتە «كازناكوۆكا» ءبىلىم بەرۋ قورىنىڭ جۇمىسىن ەرەكشە اتاپ وتۋگە بولادى. ءوز جۇمىسىن 2005 جىلى كوكپەكتى اۋدانىنداعى كازناكوۆكا ورتا مەكتەبىنىڭ وقۋشىلارىن كىتاپ وقۋعا ىنتالاندىرۋدان باستاعان قور قازىرگى ۋاقىتتا كۇرشىم, كاتونقاراعاي, تارباعاتاي, زايسان جانە ءۇرجار اۋداندارىنىڭ 9-10-شى سىنىپ وقۋشىلارىن ۇلكەن ومىرگە باتىل قادام جاساۋعا دايىنداپ جاتقان كورىنەدى. «قور 9-10-شى سىنىپ وقۋشىلارى اراسىندا جىلىنا 5 رەت (تورتەۋى – اۋداندىق, بىرەۋى – وبلىستىق دەڭگەيدە) «ەرۋديت» ەسسە بايقاۋى, ماتەماتيكا, فيزيكا, اعىلشىن ءتىلى جانە جەڭىل اتلەتيكا باعىتتارى بويىنشا وليمپيادا ۇيىمداستىرادى. وليمپيادا وتكىزۋ ارقىلى قابىلەتتى وقۋشىلاردى ىرىكتەپ الىپ, ولاردىڭ ەلىمىزدەگى جانە الەمدەگى ەڭ ۇزدىك ۋنيۆەرسيتەتتەرگە تۇسۋىنە كومەك كورسەتىلەدى.
شالعايداعى اۋىل مەكتەپتەرىنىڭ جوعارى سىنىپ وقۋشىلارى قازاقستان مەن شەتەلدەردىڭ جوعارى وقۋ ورىندارى, وزىنە لايىقتى ۋنيۆەرسيتەتتى تاڭداۋ, دايىندالۋ, گرانتتار مەن شاكىرتاقىلار تۋرالى اقپاراتتاردى تەگىن الا الادى. سونداي-اق ولارعا ۋنيۆەرسيتەتتە وقۋ كەزىندە بەلگىلى ءبىر كەزەڭگە دەيىن قولداۋ كورسەتىلەدى. بايقاۋعا ەستۋ, كورۋ قابىلەتى ناشار جانە باسقا دا فيزيكالىق شەكتەۋلەرى بار وقۋشىلار قاتىسا الادى. ولارعا تاپسىرمالاردى ورىنداۋ كەزىندە جەڭىلدىكتەر, ءتيىستى جاعدايلار جاسالادى», دەيدى «كازناكوۆكا» ءبىلىم بەرۋ قورىنىڭ اتقارۋشى ديرەكتورى ايجان سادىقوۆا. ونىڭ ايتۋىنشا, ءبىلىم قورى ۇيىمداستىراتىن وليمپيادالارعا قاتىساتىن وقۋشىلار سانى توقسان سايىن كوبەيىپ كەلەدى. ماسەلەن وليمپيادانىڭ 1-تۋرىنا وبلىستاعى 6 اۋداننىڭ 9-10 سىنىپتارىنىڭ 5250 وقۋشىسىنىڭ 1105-ءى قاتىسسا, ەكىنشى تۋرىنا قاتىسۋعا 1542 وقۋشى ءوتىنىش ءبىلدىرىپتى.
ازامات قاسىم,
«ەگەمەن قازاقستان»
شىعىس قازاقستان وبلىسى