قاراعاندىداعى وبلىستىق بەينەلەۋ ونەرى مۇراجايىندا «رۋحاني جاڭعىرۋ» باعدارلاماسى اياسىندا «قازاقستان سۋرەتشىلەرىنىڭ مۇراسى» اتتى كورمە ءوتتى.
بيىل – بۇقار جىراۋدىڭ 350 جىلدىق مەرەيتويى. ايگىلى جىراۋدىڭ ءوز زامانىنداعى وزەكتى دەگەن ماسەلەنىڭ ءبارىن نازاردان تىس قالدىرماي, ولاردىڭ شەشىمىن تابۋعا ۇمتىلعان قايراتكەر تۇلعا ەكەندىگى بەلگىلى. قاراعاندىلىق سۋرەتشى ايبەك بەگالين بولسا, ءوزىنىڭ تۋىندىسىندا جىراۋدى وسى قىرىنان تانىتۋعا كۇش سالعان.
جالپى, كورمەدە پورترەتتىك جانر جۇرت نازارىنا كەڭىنەن ۇسىنىلدى. قازىبەك بي, قۇرمانعازى, اباي قۇنانباەۆ, شاشۋباي قوشقارباەۆ, كۇلاش بايسەيىتوۆا, قانىش ساتباەۆ جانە ولجاس سۇلەيمەنوۆ سىندى الاش اسىلدارىنىڭ كەنەپتەگى كەسكىندەرى جۇرت نازارىن وزىنە اۋدارماي قويمادى. كورمەگە كەلۋشىلەر قىلقالامنىڭ ايتۋلى شەبەرلەرى ءابىلحان قاستەەۆتىڭ, قانافيا تەلجانوۆتىڭ, گۇلفايرۋس يسمايلوۆانىڭ, حامزا كيكيموۆتىڭ جانە باسقا دا سۋرەتشىلەردىڭ تۋىندىلارىمەن جاقىنىراق تانىستى.
بۇل مادەني شارادا مينگيش ابىلقاسوۆ, مۇرات قالقاباەۆ, ءجۇرسىن بالكەنوۆ سياقتى شەبەرلەردىڭ ادام بالاسىنىڭ ۇعىمىن الەمدى تانۋ فيلوسوفياسىمەن ۇشىراستىراتىن مەتافورا جانە سيمۆول تىلىنە سۇيەنگەن تۋىندىلارى توردەن ورىن تاپتى.
سونداي-اق ەلىمىزدى يندۋستريالاندىرۋ تاقىرىبىن قىلقالامنىڭ كومەگىمەن اشقان ءماجيت بايتەنوۆ, ميحايل پودلەسنىي, ۆلاديمير كيم سىندى سۋرەتشىلەردىڭ ەڭبەكتەرى دە تالعامى بيىك كەلۋشىلەر تاراپىنان لايىقتى باعاسىن الدى.
سونىمەن قاتار كورمە اياسىندا « ۇلى دالانىڭ ۇلى تۇلعالارى: قازىبەك بي جانە بۇقار جىراۋ» اتتى مۋزەي ساباعى ءوتتى. وعان مەكتەپ وقۋشىلارى مەن باق وكىلدەرى قاتىستى.
قايرات ءابىلدا, «ەگەمەن قازاقستان»
قاراعاندى