پرەمەر-ءمينيستردىڭ ءبىرىنشى ورىنباسارى اسقار مامين وبلىسقا جۇمىس ساپارمەن كەلىپ, كۇزگەسالىم رەسەي جانە قازاقستان پرەزيدەنتتەرىنىڭ قاتىسۋىمەن وتەتىن شەكارالىق ايماقتاعى حالىقارالىق فورۋمعا دايىندىق بارىسىمەن تانىستى.
ا. ماميننىڭ جۇمىس ساپارى قايتا جاڭعىرتۋدان وتكەن پەتروپاۆل حالىقارالىق اۋەجايىنان باستالدى. ۇكىمەتتىڭ رەزەرۆتىك قورىنان بولىنگەن قارجىعا ۇشىپ-قونۋ جولاقتارى كەڭەيتىلىپ, ۇزارتىلعان. ينجەنەرلىك-كوممۋنيكاتسيالىق جۇيەلەر اۋىستىرىلعان. رەنتگەن-تەلەۆيزيالىق تەكسەرۋ قۇرىلعىلارى, بەينەباقىلاۋ كامەرالارى ورناتىلعان. بۇگىنگى كۇنى كەز كەلگەن ساناتتاعى اۋە كەمەلەرىن قابىلداي الادى. ايماق باسشىسى قۇمار اقساقالوۆتىڭ اۋەجاي ەسەبىندەگى ارنايى تەحنيكالار ەسكى, اۋىستىرۋدى قاجەت ەتەدى دەگەن وتىنىشىنە وراي ساتىپ الۋ مۇمكىندىكتەرى قاراستىرىلاتىن بولدى. اۋەجايعا اپاراتىن تاسجولدى قالپىنا كەلتىرۋگە 985 ميلليون تەڭگە جۇمسالماق.
فورۋم قوناقتارىنىڭ كوپشىلىگى اۋە جانە اۆتوموبيل جولدارىمەن كەلەتىنى ەسكەرىلىپ, «استانا–پەتروپاۆل» جول ءدالىزى قالپىنا كەلتىرىلگەن. ەندى ۇزىندىعى 60 شاقىرىم بولاتىن وبلىس ورتالىعى مەن رەسەي شەكاراسى اراسىنداعى تاسجول جوندەلۋدە. سونداي-اق قالاعا كىرەبەرىستەگى جول وتكەلىن جوندەۋ قولعا الىنعان. وعان «نۇرلى جول» باعدارلاماسى شەڭبەرىندە 1,2 ميلليارد تەڭگە قاراستىرىلعان. سيقى كەتكەن تەمىرجول ۆوكزالى جاڭارىپ, ليفت, ەسكالاتور قويىلادى. كوشەلەرگە ەلەكتر قۋاتىن ۇنەمدەيتىن شامدار ورناتىلادى. وسىلايشا قالا اباتتاندىرىلىپ, وزگەشە ساۋلەتپەن ورنەكتەلەتىن بولادى. قالانىڭ كىرە بەرىسىندە قوجابەرگەن جىراۋدىڭ ات ۇستىندەگى ەڭسەلى ەسكەرتكىشى «مەن مۇندالاپ» تۇرادى.
پرەمەر-ءمينيستردىڭ ءبىرىنشى ورىنباسارىنا جاڭادان بوي كوتەرگەن «جاس وركەن» ىقشاماۋدانىندا قىزۋ جۇرگىزىلىپ جاتقان قۇرىلىس جۇمىستارىنىڭ كەشەندى جوسپارى تانىستىرىلدى. بۇل اۋماقتا 2700 پاتەردى قولدانىسقا بەرۋ بەلگىلەنگەن. سپورت سارايى مەن تەننيس ورتالىعىنىڭ قۇرىلىسى اياقتالدى. قازاق تەاترىنىڭ قازىعى قاعىلىپ, ىرگەتاسى قالاندى. وبلىس اكىمى بيىل سالىناتىن وقۋشىلار سارايى IT-تەحنولوگيالارمەن جاراقتاندىرىلىپ, بالالاردىڭ عىلىممەن شۇعىلدانۋىنا كەڭ جول اشىلاتىنىن, تانىمدىق جانە ءتۇرلى ويىن-ساۋىق قىزمەت تۇرلەرى قۇرىلاتىنىن باياندادى. دەربەس كينوستۋديا, كيبەرقاۋىپسىزدىك جانە ۆيرتۋالدى كابينەتتەر, باعدارلاۋ زەرتحاناسى,كينوتەاتر جۇمىس ىستەيدى. وسى ىقشاماۋداندا تۇرعىن ءۇي-قۇرىلىس جيناق بانكى سالىمشىلارىنا ارنالعان 332 پاتەرلىك جاڭا باسپانا, ارقايسىسى 90 ورىندىق ەكى شاعىن ورتالىق ءوز ەسىگىن ايقارا اشادى. جوبانىڭ جالپى قۇنى 3,7 ميلليارد تەڭگەنى قۇرايدى.
ا. ماميننىڭ قاتىسۋىمەن وتكەن القالى جيىندا قازاقستان جانە رەسەي وڭىرارالىق ىنتىماقتاستىق فورۋمىنا ازىرلىك شارالارى جان-جاقتى تالقىلاندى. فورۋمعا «قازاقستان جانە رەسەي ءتۋريزمىن دامىتۋدىڭ جاڭا قىرلارى مەن باعىتتارى» تاقىرىبىنىڭ تاڭداپ الىنۋى كەزدەيسوقتىق ەمەس. قازاقستان بۇل سالاعا ۇلكەن كوڭىل ءبولىپ كەلەدى. سولتۇستىك قازاقستان دا زور مۇمكىندىكتەرگە يە. ىشكى الەۋەتتى بارىنشا پايدالانۋىمىز قاجەت. كورشى ەلدىڭ نارىعىنا شىعۋدىڭ جولدارىن قاراستىرۋ كەرەك, دەي كەلىپ ۇكىمەت باسشىسىنىڭ ورىنباسارى فورۋمدى جوعارى دەڭگەيدە اتقارۋ قازىرگى اتقارىلىپ جاتقان شارالارمەن تىعىز بايلانىستى ەكەنىن, قالا ينفراقۇرىلىمىنا باسا نازار اۋدارۋ قاجەتتىگىن, قاجەت بولسا قوسىمشا قاراجات قاراستىرىلاتىنىن اتاپ كورسەتتى. پەتروپاۆل-رەسەي شەكاراسى اۆتوجولىن جەدەل اياقتاۋدى تاپسىردى.
ق. اقساقالوۆ ءوز سوزىندە تۋريزم سالاسى بويىنشا بىۋرنەشە اۋقىمدى جوبالاردىڭ جۇزەگە اسىرىلىپ جاتقانىن, يمانتاۋ-شالقار ايماعىندا جاڭا دەمالىس ورىندارى مەن اۆتوكارنينگ ىسكە قوسىلاتىنىن جەتكىزدى. فورۋمعا ءبىر مىڭنان استام مەيمان كەلەدى دەپ كۇتىلۋدە. بۇگىندە 750 ورىندىق قوناقۇيلەر دايىن. 27 مەيرامحانا قىزمەت كورسەتەدى.
پرەمەر-ءمينيستردىڭ ءبىرىنشى ورىنباسارى زيكستو, پەتروپاۆل اۋىر ماشينا جاساۋ جانە س.كيروۆ اتىنداعى زاۋىتتاردا بولىپ, ۇجىمدارمەن كەزدەستى. اتقارىلعان ىستەرمەن, الداعى جوسپارلارمەن تانىستى.
ءومىر ەسقالي
«ەگەمەن قازاقستان»
سولتۇستىك قازاقستان وبلىسى.