بەيجىڭدە يندۋستريالاندىرۋ جانە ينۆەستيتسيالار سالاسىنداعى ىنتىماقتاستىق جونىندەگى قازاقستان-قىتاي بىرلەسكەن كوميسسياسىنىڭ XIV وتىرىسى ءوتتى.
قازاقستاندىق دەلەگاتسيانى قازاقستان رەسپۋبليكاسىنىڭ ينۆەستيتسيالار جانە دامۋ ۆيتسە-ءمينيسترى ارىستان قابىكەنوۆ, قىتاي تاراپىن قحر دامۋ جانە رەفورما ىستەرى مەملەكەتتىك كوميتەتى توراعاسىنىڭ ورىنباسارى نين تسزيچجە باسقاردى.
تاراپتار 2015 جىلى قازاقستان پرەزيدەنتى نۇرسۇلتان نازارباەۆ پەن قحر توراعاسى سي ءتسزينپيننىڭ باستاماسىمەن قازاقستانداعى وندىرىستىك قۋاتتىلىقتاردى دامىتۋ باعدارلاماسىنىڭ (51 جوبا) ىسكە اسىرىلۋ بارىسىن تالقىلادى. سونداي-اق قىتاي دامۋ بانكىنىڭ, جىبەك جولى قورى وكىلدەرىنىڭ باياندامالارى تىڭدالدى, ەكونوميكانىڭ شيكىزاتتىق ەمەس سەكتورلارىنداعى تسيفرلاندىرۋ, جاسىل جانە باسقا دا جوعارى تەحنولوگيالار سالاسىنداعى ءوزارا ءىس-قيمىلدى دامىتۋدىڭ الداعى قادامدارى قارالدى.
ء«بىز قازىرگى تاڭدا قىتاي مەن قازاقستاننىڭ دامۋ باعدارلامالارىن ودان ءارى سايكەستەندىرۋ ماسەلەلەرىن زەرتتەپ جاتىرمىز. وسى تۇرعىدان العاندا نۇرسۇلتان نازارباەۆتىڭ بيىلعى قازاقستان حالقىنا جولداۋى وتە قىزىقتى, ونى ءبىز مۇقيات زەردەلەپ شىقتىق, ول تسيفرلاندىرۋ, يندۋستريالاندىرۋ, تازا ەنەرگيا كوزدەرىن دامىتۋ جانە باسقا دا سالالارداعى ەكى ەل اراسىنداعى ءوزارا ءىس-قيمىل ءۇشىن ەلەۋلى مۇمكىندىكتەر اشادى», دەدى قىتاي دامۋ بانكىنىڭ جوسپارلاۋ دەپارتامەنتى ديرەكتورىنىڭ ورىنباسارى حۋ دۋنشەن.
بەيجىڭگە ەكى كۇندىك ساپار اياسىندا ا.قابىكەنوۆتىڭ China Power International Holding, China Telecom, Shanghai Electric Corp., YTO Group, COSCO Shipping Lines, NFC, NORINCO International جانە ت.ب. ءىرى قىتايلىق ينۆەستور كومپانيالاردىڭ باسشىلارىمەن كەزدەسۋى جوسپارلانعان.
«ەگەمەن-اقپارات»