18 قاڭتاردان باستاپ II «تۇمار» ۇلتتىق تەلەۆيزيالىق بايگەسىنە قاتىسۋعا وتىنىمدەر قابىلدانا باستادى. بۇل تۋرالى اقپارات جانە كوممۋنيكاتسيالار مينيسترلىگى ءباسپسوز قىزمەتى حابارلادى.
بايقاۋعا 2017 جىلى ەفيرگە شىققان بىرەگەي تەلەديدارلىق جوبالار قاتىسا الادى. جۇلدەگە ۇلتتىق جانە ايماقتىق تەلەۆيزيالىق كومپانيالار, ستۋديالار, پروديۋسەرلىك ورتالىقتار جانە تەلەديدارلىق كونتەنت شىعاراتىن باسقا دا مەديا-يندۋستريا مەكەمەلەرى ۇمىتكەر بولا الادى.
ۇمىتكەرلەردىڭ وتىنىمدەرى 1 – ناۋرىزعا دەيىن قابىلدانادى.
بيىلعى جىلى جەڭىمپازدار كەلەسى نوميناتسيالار بويىنشا انىقتالادى: ۇزدىك دەرەكتى فيلم, ۇزدىك تەلەحيكايا, ۇزدىك الەۋمەتتىك جوبا, ۇزدىك اقپاراتتىق باعدارلاما, ۇزدىك ايماقتىق تەلەارنا, ۇزدىك ءبىلىم بەرۋ باعدارلاماسى, تەلەۆيزيالىق ماۋسىمنىڭ ۇزدىك وقيعاسى, «تەلەۆياعا 60 جىل» - تەلەۆيزيا دامۋىنا قوسقان ۇلەسى ءۇشىن جانە ۇزدىك ويىن-ساۋىق جوباسى.
سونىمەن قاتار, ۇزدىك رەجيسسەرلىك جۇمىسقا, ۇزدىك وپەراتورلىق جوبا ءۇشىن, جىلدجىڭ ۇزدىك تەلەجۇرگىزۋشىسىنە جانە ۇزدىك تەلەجۋرناليستكە دە ارنايى جۇلدەلەر تاعايىندالعان. ەلىمىزدىڭ باس قالاسى استانانىڭ 20-جىلدىق مەرەيتويىنا ارنالىپ, «استانا تۋرالى ۇزدىك جوبا» نوميناتسياسى بويىنشا جۇلدە بەرىلەدى.
لاۋرەاتتاردى ۇسىنىلعان ماتەريالداردىڭ ساراپتامالىق قورىتىندىلارى نەگىزىندە جۇرگىزىلەتىن قازىلار القاسىنىڭ جابىق تۇردە داۋىس بەرۋى انىقتايدى. قازىلار القاسى قازاقستاندىق تەلەۆيزيانىڭ بىلىكتى ماماندارىنان قۇرالادى.
«تۇمار» ۇلتتىق تەلەۆيزيالىق بايگەسى قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترلىگى تاراپىنان ەلىمىزدىڭ ەڭ جوعارى ساپالى جانە زاماناۋي تەلەديدارلىق مازمۇنىن انىقتاۋ, تالانتتى مامانداردى قولداۋ, وتاندىق تەلەۆيزيا مازمۇنىن جەتىلدىرۋگە جانە قازاقستاندىق جوعارى ساپالى تەلەديداردى دامىتۋعا ىنتالاندىرۋ ماقساتىندا قۇرىلعان.