جاڭا جىلدىڭ سولتۇستىكقازاقستاندىقتار ءۇشىن قايعىلى وقيعالارمەن باستالۋى وكىنىشتى-اق.
توتەنشە جاعدايلار جونىندەگى دەپارتامەنت ماماندارى ونىڭ سەبەبىنە ادامداردىڭ ءوز ومىرىنە دەگەن نەمقۇرايدىلىعىن كولدەنەڭ تارتادى.
كەلىسپەسكە شارا جوق. كۇن رايىنىڭ كۇرت سۋىتاتىنى جايلى ساقتاندىرۋلارعا قۇلاق اسپاعانداردىڭ ءبىرى – ءۋاليحانوۆ اۋدانى بەرەكە اۋىلىنىڭ 20 جاستاعى تۇرعىنى. مەكتەپتە مۇعالىم بولىپ ەڭبەك ەتەتىن ول اقتۇتەك بوراننىڭ باسىلۋىن كۇتپەستەن سىرتقا شىققان. كوشەنىڭ شەتىندە تۇراتىن جولداسىنىڭ ۇيىنە سوعىپ, ودان ءارى قايدا كەتكەنى بەلگىسىز. مارقۇمنىڭ ءمايىتى ەلدى مەكەننەن 10 شاقىرىم جەردەن تابىلعان. مىنە, سينوپتيكتەردىڭ ەسكەرتۋلەرىن جۇرە تىڭداۋدىڭ اقىرى وسىنداي توسىن جايتقا سوقتىرعان.
سول سياقتى ەكى ايەلدىڭ ۇسىك شالىپ, كوز جۇمعانى دا سالعىرتتىقتىڭ سالدارىنان بولعانى انىق. جامبىل اۋدانى سۆياتودۋحوۆكا اۋىلىنىڭ 44 جاستاعى تۇرعىنىنىڭ دەنەسى كوشەدەن تابىلعان. ءمايىت ءتۇنى بويى دالادا جاتىپ قالسا كەرەك. ال تايىنشا اۋدانى لەتوۆوچنوە اۋىلىنىڭ 65 جاستاعى تۇرعىنىنىڭ ءولى دەنەسىن ىزدەۋشى توپ اۋىل سىرتىنان كەزىكتىرگەن.
جەكە ۇيدە تۇراتىن ادامدار دا ساقتىق شارالارىن مۇلدەم ۇمىتقان ءتارىزدى. وبلىس ورتالىعىندا ءۇش جەر ءۇي ورتەنىپ, ءتورت ادامنىڭ ءومىرى قيىلدى. ولاردىڭ اراسىندا 90 جاستاعى كەيۋانا مەن ەكى جاستاعى شوبەرەسى بار. اكە-شەشەسى ۇلىن اجەيگە تابىستاپ, از عانا ۋاقىتقا ۇيدەن شىعىپ كەتكەن. وسى ەكى ارادا باسپانا قىزىل جالىنعا ورانعان. ءورت سوندىرۋشىلەر جەتكەنشە ابدەن توزىعى جەتكەن اعاش ءۇيدىڭ توبەسى وپىرىلىپ تۇسكەن. ءورت گاز باللونىنان تۇتانعان دەگەن جورامال بار.
تاعى ءبىر ۇيدە توسەكتە شىلىم شەككەن كۇيى قالىڭ ۇيقىعا كەتكەن 66 جاستاعى ەر ادام تۇتىنگە تۇنشىعىپ ولگەن. جەر ءۇيدىڭ پەشىنەن شىققان تاعى ءبىر ء«تىلسىز جاۋ» 72 جاستاعى زەينەتكەردىڭ ءومىرىن جالماعان. كوزى كورمەيتىن مۇگەدەك جان سىرتقى ەسىكتى تاپپاي قالعان.
«ساقتانساڭ, ساقتايدى» دەپ بەكەرگە ايتىلماسا كەرەك. قاۋىپسىزدىك شارالارى مۇقيات ويلاستىرىلسا, مۇنداي قايعىلى وقيعالار ورىن الماس ەدى.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى