تەننيستەن دەۆيس كۋبوگى اياسىندا قازاقستان ۇلتتىق قۇراماسى 2-4 اقپان كۇندەرى شۆەيتساريا قۇراماسىمەن كەزدەسەدى. جارىستىڭ شيرەك فينالىنداعى بۇل كەزدەسۋ استانا قالاسىنداعى «داۋلەت» ۇلتتىق تەننيس ورتالىعىندا وتەدى.
قازاقستان ۇلتتىق قۇراماسى 1995 جىلدان باستاپ دەۆيس كۋبوگىنا تۇراقتى قاتىسىپ كەلەدى. 2011 جىلدان بەرى عانا الەمدىك توپقا كوتەرىلدى. وعان دەيىن ىرىكتەۋدەن ءارى اسا الماي ءجۇردى. سول 2011 جىلدان بەرى قۇرامامىز 41 كەزدەسۋدە جەڭىسكە جەتىپ, 28-ىندە جەڭىلىس تاپتى. وتكەن جىلى وتانداستارىمىز الەمدىك توپتىڭ پلەي-وفف ساتىسىنا شىعىپ, ارگەنتينا قۇراماسىنا قارسىلاس اتاندى. جەرەبە بۇل ويىندى قازاقستاننىڭ الاڭىندا وتەدى دەپ بەلگىلەگەن سوڭ, جەرلەستەرىمىز جەلپىنىپ جەڭىستى ج ۇلىپ اكەتتى. ءوز الاڭىنداعى ويىنداردا كوپ جەڭىلە بەرمەيتىن تەننيسشىلەرىمىز بۇل جولى دا شۆەيتساريانىڭ اپشىسىن قۋىراتىنى انىق.
شۆەيتساريا قۇراماسى دەۆيس كۋبوگىندا وزىنە كەرەكتى جۇلدەنىڭ ءبارىن العان. 2014 جىلى بۇل قۇراما چەمپيون اتانعان دا بولاتىن. بىراق, سودان بەرى شۆەيتساريالىقتار ءسال دە بولسا السىرەپ قالدى. ونىڭ باستى سەبەبى, كوماندانىڭ اينىماس ليدەرى بولعان رودجەر فەدەرەر ۇلتتىق قۇراما ويىندارىنا جاراقاتىنا بايلانىستى قاتىسپايتىندىعىندا ەدى. ءتىپتى ودان كەيىنگى ستانيسلاۆ ۆاۆرينكا دا قۇراماعا كەلۋىن ازايتىپ ءجۇر. الەمدىك تەننيس جۇلدىزدارىنا كوممەرتسيالىق كوپتەگەن تۋرنيرلەرى دەمالۋعا مۇرشا بەرمەي جاتادى. كەيدە وسال قۇرامالارعا قارسى ويىندارعا كەلمەي قوياتىنى بار. سونىڭ سالدارىنان بولسا كەرەك, پلەي-وفف كەزەڭىندە شۆەيتساريا قۇراماسى بەلارۋس ۇجىمىن ازەر جەڭدى. تەكەتىرەس بارىسىندا 2 جەڭىسكە قولعابىس ەتكەن ماركو كيۋدينەللي كەزدەسۋ قاھارمانىنا اينالدى. ودان بولەك شۆەيتساريا قۇراماسى جاس تالانت حەنري لاكسوننەندى ءوز ساپىنا قوسىپ العان. سوندىقتان دا قارسىلاستىڭ قارىمدى ەكەنىن, وڭاي شاعىلار جاڭعاق ەمەس ەكەندىگىن انىق سەزەمىز.
شۆەيتساريا چەمپيون بولعان 2014 جىلى قازاقستان قۇراماسى جەنەۆادا شيرەك فينالدىق كەزدەسۋدى بولاشاق چەمپيوندارعا قارسى وتكىزدى. ميحايل كۋكۋشكين مەن اندرەي گولۋبەۆ باستاعان تەننيسشىلەرىمىز قانشا تىرىسقانىمەن, فەدەرەر مەن ۆاۆرينكا سەكىلدى اڭىزدارعا شامالارى جەتپەدى. جارتىلاي فينالعا شۆەيتساريا ءوتتى. ەندى قارىمتا قايتاراتىن كەز كەلگەن سياقتى.
وسى ورايدا ءبىز قازاقستان قۇراماسىنىڭ كاپيتانى دياس دوسقاراەۆقا حابارلاسىپ, شۆەيتساريا كومانداسى جايلى ازدى-كەم اقپار سۇرادىق.
– شۆەيتساريا قۇراماسىنان وتكەن جولى جەڭىلىپ قالدىق. بىراق, العاشقى كۇنى ولاردى ۇتىپ باستاعانىمىز ەستەرىڭىزدە شىعار. بۇل جولى رودجەر فەدەرەر كەلمەيتىن سەكىلدى. ول دەۆيس كۋبوگىن جەڭگەننەن كەيىن ۇلتتىق قۇرامادا وينامايمىن دەدى. جەكە تۋرنيرلەرىنىڭ ءوزى باستان اسىپ جاتىر. سوندىقتان دا فەدەرەر وسى ماتچقا قاتىسپايتىن شىعار دەپ وتىرمىن. ال ەگەر ۆاۆرينكا كەلەتىن بولسا ونىڭ دا ويىن تاجىربيەسى ناشار ەكەندىگى بەلگىلى. سەبەبى, جارتى جىل بويى جاراقاتتان ەمدەلىپ, كورتقا شىققان جوق. لاكسوننەن دەگەن تەننيسشىلەرى ءالى جاس. سوندىقتان دا ءوز جەرىمىزدە شۆەيتساريانى جەڭىپ كەتۋىمىز ابدەن مۇمكىن. ەگەر جەڭسەك تاريحىمىزدا تۇڭعىش رەت جارتىلاي فينالعا شىعامىز. وسىعان دەيىن قانشاما مۇمكىندىگىمىز بولىپ, سول مەجەگە جەتە الماي قالدىق. بالكىم, وسى جولى باعىمىز جانار.
جەرگىلىكتى جانكۇيەردىڭ قولداۋىن سەزىنسە, قازاقستاندىق تەننيسشىلەر المايتىن قامال جوق. قارسىلاستىڭ اتاعىنان ۇركەتىن دە كەزدەر ارتتا قالعان. ۇلتىق قۇرامامىز ەلوردا تورىندە يتاليا, ارگەنتينا, بەلگيا سەكىلدى الپاۋىت تەننيس دەرجاۆالارىن تىزەرلەتكەلى بەرى بارلىعىمەن تەڭ دارەجەدە ايقاسادى. بۇل جولى قالاي بولارىن بايقاپ كورەلىك. ەگەر جەڭىسكە جەتسە قازاقستان قۇراماسى ءوز تاريحىندا تۇڭعىش رەت جارتىلاي فينالعا جولداما الماق.
ەرمۇحامەد ماۋلەن,
«ەگەمەن قازاقستان»