استانادا قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ بالاباقشاسى اشىلدى. ەرەكشەلىگى سول, ورتالىق سوڭعى ۇلگىدەگى يننوۆاتسيالىق ءبىلىم بەرۋ قۇرالدارىمەن جابدىقتالعان.
سالتاناتتى شارانىڭ اشىلۋ راسىمىنە قاتىسقان مەملەكەتتىك حاتشى گۇلشارا ابدىقالىقوۆا قازاقستاندىق ءبىلىم بەرۋ رەفورماسىنىڭ باستى ماقساتتارىنىڭ ءبىرى – باسەكەگە قابىلەتتى ءبىلىم كەڭىستىگىن قۇرۋ ەكەنىن اتادى.
«پرەزيدەنت بيىلعى جولداۋىندا بالالاردى ەرتە جاستان دامىتۋ ءۇشىن مەكتەپكە دەيىنگى ءبىلىم بەرۋ مەكەمەلەرىنە بىرىڭعاي ستاندارت ەنگىزىلۋ ءتيىس ەكەنىن ەرەكشە اتاعان بولاتىن. وسى نەگىزدە ءبىلىم بەرۋدىڭ نەگىزگى ساتىسى بولاتىن ارنايى ورتالىقتار ءۇشىن جاعداي جاسالۋى قاجەت», - دەگەن گ.ابدىقالىقوۆا بالالاردى, اتا-انالار مەن تاربيەشىلەردى بالاباقشانىڭ اشىلۋىمەن قۇتتىقتاپ, ونىڭ سۇيىكتى استانامىزدىڭ 20 جىلدىق مەرەيتويى جىلىندا لايىقتى تارتۋ بولعانىن ەرەكشە اتاپ ءوتتى. سونىمەن بىرگە ول ەلدەگى دەموگرافيالىق احۋالدىڭ دا جىل سايىن جاقسارىپ كەلە جاتقانىنا توقتالدى.
«بىلتىر ەلىمىزدە 409 مىڭ بالا دۇنيە ەسىگىن اشقان. قازىر استانا جاستاردىڭ, بالالاردىڭ قالاسى سانالادى. تەك استانانىڭ وزىندە 30 مىڭ بالا تۋعان. بۇل قاراعاندى وبلىسىنىڭ ءبىر اۋدانىنداعى تۇرعىن سانىمەن شامالاس دەگەن ءسوز. بۇل وتە تاماشا كورسەتكىش, وسى قارقىنمەن استانانىڭ دامۋى وركەندەي بەرمەك», دەدى مەملەكەتتىك حاتشى. ونىڭ سوزىنشە, 2017 جىلى ەلدە 849 بالاباقشا اشىلدى, ونىڭ 82-ءسى – استاناداعى مەكتەپكە دەيىنگى مەكەمەلەر.
«قازىر ەلىمىزدەگى 3 پەن 6 جاس ارالىعىندا 90 پايىز بالانى قامتىپ وتىرمىز. 2020 جىلعا دەيىن ەلدەگى بالالاردى تۇگەل قامتۋ كەرەك تۋرالى مىندەت قويىلعان. وسى ءۇشىن جۇمىس ىستەيتىن بولامىز», دەپ مالىمدەدى گۇلشارا ابدىقالىقوۆا.
350 ورىنعا ارنالعان مەكتەپكە دەيىنگى بۇل مەكەمە – پرەزيدەنتتىك ءىس باسقارماسى مەديتسينالىق ورتالىعىنىڭ «قارلىعاش» بالاباقشاسى» مەملەكەتتىك كاسىپورنىنا قاراستى ءۇشىنشى نىسان. مەملەكەتتىك كاسىپورىن ديرەكتورى گۇلنار ابدۋللينا ورتالىقتىڭ جۇمىس ىستەۋ ءتارتىبى مەن بالالاردىڭ ينتەللەكتۋالدى دامۋىنا ارنالعان وقۋ بولمەلەرىن تانىستىردى.
ورتالىقتا بالالاردىڭ فيزيكالىق دامۋى ءۇشىن سانيتاريالىق-گيگيەنالىق تالاپتارعا ساي ماتەريالدىق-تەحنيكالىق بازا قۇرىلعان. ءار وبەكتىدە بالالاردىڭ فيزيكالىق جانە پسيحولوگيالىق دەنساۋلىعىن نىعايتۋ مەن ساقتاۋعا ارنالعان جاعداي جاسالعان. ءجۇزۋ باسسەيندەرى, بالالاردىڭ فيزيكالىق جانە شىعارماشىلىق قابىلەتتىلىكتەرىنىڭ دامۋىنا ارنالعان سپورتتىق زالدار, كونفەرەنتس-زال, وقۋ كابينەتتەرى, فيتوبارلار, پسيحولوگ مەن لوگوپەدتەردىڭ كابينەتتەرى زاماناۋي تالاپتارعا ساي جابدىقتالعان.
«بالاباقشادا يننوۆاتسيالىق تەحنولوگيالاردى قولدانۋ جانە بالالاردىڭ تانىمدىق-كوممۋنيكاتيۆتىك داعدىلارىن دامىتۋ ماقساتىندا مۋلتيمەديالىق باعدارلامالىق-ادىستەمەلىك كەشەن – مۋلتيتىلدىك زياتكەرلىك ورتالىق (مزو, يزرايل) قولدانىلادى. سونداي-اق كۇندەلىكتى وقۋ بارىسىندا كونسترۋكتيۆتىك ەلەمەنتتەرىمەن ەرەكشەلەنەتىن ۆ.ۆ. ۆوسكوبوۆيچتىڭ دامىتۋشى ويىندارى ويناتىلادى», دەيدى كاسىپورىن ديرەكتورى گۇلنار ابدۋللينا.
ورتالىقتى ارالاپ ءجۇرىپ ءبىر بۇرىشقا تىگىلگەن اسىقتارعا كوزىمىز ءتۇستى. قىزىلدى-جاسىلدى ەتىپ بويالعان اسىقتارمەن دويبى, الشى, حان تالاپاي ويناۋعا لايىقتالىپ ارنايى ورىندار جاسالىپتى. ورتالىق ماماندارىنىڭ ايتۋىنشا, اسىق ويىنى بالانىڭ جاستايىنان جۇيكە جۇيەلەرىن شىڭداپ, ولاردى دالدىككە, ۇستامدىلىققا, بايسالدىلىققا تاربيەلەيدى ەكەن. ودان بولەك كەز كەلگەن ساباقتا ۇنامدى سۋرەتتەر, سىزبالار, تاسىلدەر ارقىلى گرافيكالىق يلليۋستراتسيالار نەگىزىندە اقپاراتتىق-كوممۋنيكاتسيالىق تەحنولوگيالاردى پايدالانۋ تاربيەلەنۋشىلەردىڭ تانىمدىق بەلسەندىلىگىن ارتتىرىپ قانا قويماي, لوگيكالىق ويلاۋ جۇيەسىن قالىپتاستىرۋعا, شىعارماشىلىقپەن ەڭبەك ەتۋىنە جاعداي جاسايدى.
ايا ءومىرتاي,
سۋرەتكە تۇسىرگەن - ەرلان ومار
«ەگەمەن قازاقستان»