بۇگىن ۇكىمەت باسشىسىنىڭ ورىنباسارى اسقار جۇماعاليەۆ الماتى وبلىسىنىڭ پانفيلوۆ اۋدانىنا جۇمىس ساپارىمەن كەلىپ, «قورعاس-شىعىس قاقپاسى» ارنايى ەكونوميكالىق ايماعىنىڭ تىنىس-تىرشىلىگىمەن تانىستى.
پرەمەر-ءمينيستردىڭ ورىنباسارى الدىمەن «التىنكول» تەمىرجول بەكەتى مەن وسىندا ورنالاسقان كەدەندىك رەسىمدەۋ ورتالىعىندا بولىپ, حالىقارالىق جۇك تاسىمالى مەن تەكسەرۋ-باقىلاۋ جۇمىستارىنا كۋا بولدى. مۇنداعى قىزمەت كورسەتۋ تولىقتاي تسيفرلى جۇيەگە كوشكەن. بۇل ءوز كەزەگىندە ترانزيت كولەمىن ارتتىرىپ, ەلارالىق تاۋار تاسىمالداۋدىڭ دەڭگەيىن جاڭا ساپاعا كوتەردى. بۇرىندارى تەك تەمىرجولداعى تەكسەرۋ جۇمىسىنا جارتى كۇن كەتەتىن بولسا, اۆتوماتتاندىرۋ ناتيجەسىندە كەز كەلگەن جۇكتى دايىنداپ جونەلتۋگە 4 ساعاتتاي عانا ۋاقىت جەتكىلىكتى ەكەن.
- كەدەن بەكەتىندەگى قىزمەت كورسەتۋ دە تسيفرلىق تەحنولوگيانىڭ ەنۋىمەن جىلدام ءارى ساپالى بولا ءتۇستى. قازىر جۇك تاسىمالداۋشىلار ءۇشىن بارلىك جاعداي جاسالۋدا. دەكلاراتسيا تولتىرۋ, كەدەندىك تەكسەرۋ, تاسىمالداۋعا رۇحسات بەرۋ ءۇردىسى تولىقتاي تسيفرلىق جۇيەگە كوشتى. كەدەندەگى كەدەرگى ازايىپ, جۇك وتكىزۋ كوبەيدى. ازاماتتار مەن كومپانيا وكىلدەرى ەلەكتروندى قىزمەت كورسەتۋ بارىسىن باقىلاپ وتىرۋعا مۇمكىندىك الدى,-دەدى ورتالىقتىڭ جۇمىسىمەن تانىستىرعان مەملەكەتتىك كىرىستەر كوميتەتى توراعاسىنىڭ ورىنباسارى عوسمان ءامرين.
سونداي-اق اسقار جۇماعاليەۆ ارنايى ەكونوميكالىق ايماقتا قۇرلىسى باستالعان «نۇر جولى» كەدەندىك باقىلاۋ بەكەتىندەگى جۇمىستاردى كورىپ, قۇرعاق پورت جوباسى اياسىندا اتقارىلعان ءىس بارىسىمەن تانىستى.
قالماحانبەت مۇقامەتقالي,
«ەگەمەن قازاقستان»
الماتى وبلىسى