وتكەن ءبىر ماقالامىزدا اتاقتى بالۋانشولاقتىڭ «عاليا» انىندەگى «اۋعان تۇيە سەكىلدى, بەيىمدەلسەڭ» دەگەن تۇسىن تالداپ ەدىك. ءدال وسى ءاننىڭ «اقبوز ۇيگە سۇيەنگەن» جايىن دا ارنايى ءسوز ەتتىك. ەندى وسى انگە ماتىندەگى «بۇيدا پىشاق» سوزىنە بايلانىستى قايتا اينالىپ سوعۋعا تۋرا كەلىپ تۇر.
بۇل ەندى اسا كۇردەلى ەمەس. تەك وسى كۇندە قولدانىستا جوق قۇرال جابدىقتاردىڭ قاتارىندا كوزدەن بۇل-بۇل ۇشقان «بۇيدا پىشاق» ءسوزى جونىندە ايتا كەتپەكپىز.
«عاليانىڭ قولىندا بۇيدا پىشاق,
عاليانى كوردىم دە جايدىم قۇشاق» دەيدى عوي بالۋانشولاق اتامىز. بۇل ەندى عاشىقتىقتىڭ ءبىر سيپاتى عوي. – ولەيىن, تىرىلەيىن, مەندە ەندى ەشقانداي شەگىنەر جول, ويلانار ءجاي جوق, – دەپ ونىڭ جولىنا ءوزىن ارناعان عاشىقتىڭ تاۋەكەل ءسوزى. بۇل جەردە, ارينە, «بۇيدا پىشاقتى» اۋىسپالى ماعىنادا قولدانىپ وتىرعانى تۇسىنىكتى بولار. ونىڭ قولىندا پىشاق بولسا دا, پىشاق بولعاندا دا ءجاي پىشاق ەمەس, بۇيدا پىشاق بولسا دا مەن قۇشاعىمدى جايدىم دەيدى. -مەن باستادىم, سەن قوستا, مەن ايانبادىم, سەن نە ەتەسىڭ دەگەن سالماق تا, ولتىرسە دە, وپسە دە ءوزى ءبىلسىن, - دەپ ەسسىز قۇلاعان ەركەلىك تە ءبارى-ءبارى سىيىپ جاتقانداي بۇل سوزگە!
ەندەشە, بالۋان اتامىزدىڭ عاشىعىنىڭ قولىنداعى بۇيدا پىشاق جايلى از-كەم اقپارات بەرە كەتەلىك. بۇيدا پىشاق – ءجۇزى جالپاق ءارى ۇزىن, پىشاق ءتارىزدى قارۋدىڭ ءبىر ءتۇرى. سابىن بوكەننىڭ, تاۋەشكىنىڭ مۇيىزىنەن نەمەسە قاتقان ىرعايدان جاسايدى. بۇل ماعىنا قولونەر اتالىمدارىنا بايلانىستى سوزدىكتە دە بار. سوزدىكتە ماعىناسى بولسا, مۋزەيدە بۇيدا پىشاقتىڭ ءوزى دە بار.
تولەۋ ءمانشاريپوۆ ەسىمدى جىلقىشى اكەسىنەن مۇراعا قالعان بۇيدا پىشاعىن مۋزەيگە وتكىزگەنى تۋرالى جۋرناليست ن. جولبارىس جازعان «بۇيدا پىشاق» دەگەن شاعىن ماقالادان بىلگەنبىز. قازىر كوزايىم جادىگەر قىزىلوردا وبلىسىنىڭ جالاعاش اۋداندىق مۋزەيىندە ساقتاۋلى ەكەن.
«بۇيدا پىشاق اتالۋ سەبەبى تۋرالى ءار ءتۇرلى دەرەكتەر كەزدەسەدى. كەندىر مەن جۇننەن جاسالعان بۇيدا ءجىپتى بايلاۋعا تۇيە نەمەسە وگىزدىڭ مۇرنىن تەسىپ, جەز ورناتۋعا ىڭعايلى پىشاق بولعاندىقتان بۇيدا پىشاق اتالادى دەيدى. ەندى ءبىر دەرەكتەردە ءۇزىلۋى قيىن كەندىردەن جاسالعان بۇيدانى ءبىر سالعاندا-اق قيىپ تۇسۋىمەن بايلانىستىرادى», دەلىنگەن ماقالادا. ارتىق بولماس, ونى دا قوسىپ قويالىق.
ۇلاربەك نۇرعالىم ۇلى,
«ەگەمەن قازاقستان»