بۇل تۋرالى ماڭعىستاۋ وبلىسى اكىمدىگىندە وتكەن اپپاراتتىق جيىندا ايتىلدى.
سونداي-اق, كۇن تارتىبىندە اتاۋلى الەۋمەتتىك كومەكتىڭ جاڭا فورماتىن ەنگىزۋ جانە ءوزىن-ءوزى جۇمىسپەن قامتىعانداردى فورماليزاتسيالاۋ, 2018 جىلى نەگىزگى ماقساتتى كورسەتكىشتەرگە قول جەتكىزۋ ءۇشىن ەنەرگەتيكا جانە تۇرعىن ءۇي-كوممۋنالدىق شارۋاشىلىقتى باسقارۋ جۇمىستارىنىڭ جوسپارلارى جانە اۋىل شارۋاشىلىعى باسقارماسىنىڭ ءىس-شارالار جوسپارى تالقىلاندى.
2017 جىلى 1615 وتباسى نەمەسە 8052 ادام اتاۋلى الەۋمەتتىك كومەك, بالالار جاردەماقىسىن جانە ورلەۋ جوباسى اياسىندا الەۋمەتتىك تولەمدەرمەن قامتىلعان. جاڭا فورماتتاعى الەۋمەتتىك كومەكتى ساپالى ەنگىزۋ ءۇشىن وسى وتباسىلاردىڭ جاعدايى زەرتتەلىپ, مۇقتاجدىعى انىقتالدى.
– جاڭا فورماتتا ارناۋلى الەۋمەتتىك كومەكتى الۋ مەجەسىنىڭ وسۋىنە بايلانىستى (40% تان 50%) اعىمداعى جىلى 1400 وتباسى نەمەسە 7000 ادام شارتتى اقشالاي كومەك الۋعا كەلەدى دەپ كۇتىلۋدە. ورتا ەسەپپەن العاندا ءبىر وتباسىنان 1,4 % ادام جۇمىسقا قابىلەتتى دەپ ەسەپتەپ, 1960 ادامدى جۇمىسپەن قامتۋدى جوسپارلاپ وتىرمىز, - دەدى ماڭعىستاۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ مىندەتىن اتقارۋشى قۋانىش بەرىشباەۆ.
ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارۋ باسقارماسىنىڭ بايانداماسىنا سايكەس, بۇگىندە وبلىس بويىنشا 3 قالالىق ەلدى مەكەن – 99,8 %, 61 اۋىلدىق ەلدىمەكەننىڭ 64%-ى ورتالىقتاندىرىلعان اۋىز سۋمەن قامتاماسىز ەتىلگەن. 2017 جىلى جالپى قۇنى – 6,1 ملرد.تەڭگە, ۇزىندىعى 253,42 كم قۇرايتىن 6 جوبانىڭ قۇرىلىس جۇمىستارى باستالدى. جىل اياعىنا دەيىن 3 ەلدى مەكەندى (مۇنايلى اۋدانىنىڭ باسقۇدىق سەلوسى, بەينەۋ اۋدانىنىڭ بورانقۇل جانە سارعا سەلولارى) تولىقتاي سۋمەن قامتاماسىز ەتۋ جوبالارى پايدالانۋعا بەرىلەدى. ناتيجەسىندە, 2018 جىلى ورتالىقتاندىرىلعان سۋمەن جابدىقتاۋعا قولجەتىمدىلىك كورسەتكىشى اۋىلدىق ەلدى مەكەندەردە 69 % بولادى.
– 2018 جىلى جالپى قۇنى – 2,1 ملرد.تەڭگە, ۇزىندىعى – 92,1 كم. مۇنايلى اۋدانىنىڭ قىزىلتوبە سەلوسىن اۋىز سۋمەن قامتاماسىز ەتۋ جوباسىنا – 300,0 ملن.تەڭگە قاراجات ءبولىندى. اعىمداعى جىلى «نۇرلى جول» باعدارلاماسىنىڭ اياسىندا تۇپقاراعان اۋدانىنىڭ فورت-شەۆچەنكو قالاسىندا قۇنى-1,4 ملرد.تەڭگە, ۇزىندىعى-61,8 كم اۋىز سۋ قۇبىرىن سالۋ جۇمىستارى اياقتالادى. بۇل جوبا جۇزەگە اسىرىلعاننان كەيىن, فورت-شەۆچەنكو قالاسى 100% ورتالىقتاندىرىلعان اۋىز سۋمەن قامتاماسىز ەتىلەدى, - دەدى ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارۋ باسقارماسىنىڭ باسشىسى ساپار امانبەكوۆ.
قازىرگى تاڭدا 3 قالالىق ەلدى مەكەن – 97 %, 61 اۋىلدىق ەلدىمەكەننىڭ 17,1 %-ى ورتالىقتاندىرىلعان كارىز جۇيەسىمەن قامتاماسىز ەتىلگەن. وبلىس بويىنشا 3 قالالىق ەلدى مەكەن – 100 %, 61 اۋىلدىق ەلدىمەكەننىڭ 86,89%-ى ورتالىقتاندىرىلعان گاز جۇيەسىمەن قامتىلدى. وبلىستىڭ دامۋ دەڭگەيىن ەسكەرە وتىرىپ, الداعى ۋاقىتتا ەنەرگيا تاپشىلىعىن بولدىرماۋ ءۇشىن قۋاتى 250 مۆت بۋ-گاز قوندىرعىسىنىڭ قۇرىلىسىن سالۋ جوباسىن مەملەكەتتىك-جەكەمەنشىك ارىپتەستىك تەتىگى بويىنشا جۇزەگە اسىرۋ جۇمىستارى جۇرگىزىلۋدە.
ماڭعىستاۋ وبلىسىندا جەل جانە كۇن ەلەكتر ستانتسياسىنىڭ قۇرىلىسىن سالۋ بويىنشا 3 جوبا جۇزەگە اسىرىلىپ جاتىر. ونىڭ ىشىندە, 2 جوبانىڭ قۇرىلىس جۇمىستارى 2018 جىلدىڭ 1-توقسانىندا (تۇپقاراعان اۋدانىنىڭ اقشۇقىر سەلوسىندا قۋاتتىلىعى 5 مۆت جەل ەلەكتر ستانساسىنىڭ قۇرىلىسى, مۇنايلى اۋدانىنىڭ باتىر سەلوسىندا قۋاتتىلىعى 7 مۆت كۇن ەلەكتر ستانساسىنىڭ قۇرىلىسى) جانە 1 جوبانىڭ قۇرىلىس جۇمىستارى 2018 جىلدىڭ سوڭىنا دەيىن اياقتالادى (ماڭعىستاۋ اۋدانىنىڭ شەتپە سەلوسىندا قۋاتتىلىعى 12 مۆت كۇن ەلەكتر ستانساسىنىڭ قۇرىلىسى).
ماڭعىستاۋ وبلىسىنىڭ اۋىل شارۋاشىلىعى باسقارماسى 2018 جىلى وبلىستىڭ باسىم باعىتتاعى كوكونىس, باقشا داقىلدارىن شامامەن 1200 گەكتار جەرگە ەگۋدى جانە وبلىستاعى جىلىجايلاردىڭ جۇمىسىن جانداندىرىپ, ءونىم مەن گەكتار كولەمىن ۇلعايتۋدى جوسپارلاپ وتىر. 2018 جىلى شامامەن 2 جىلىجاي كولەمىن (جك «شاندىقۇل», جك «بۇركىتباەۆ») 1,5 گەكتاردان 3 گەكتارعا كەڭەيتۋ, 2 جىلىجايدى («گرەنحاۋس» جشس, «سەنەك» جشس) ىسكە قوسۋ ارقىلى وبلىس تۇرعىندارىن قولجەتىمدى كوكونىستەرمەن قامتاماسىز ەتۋ, مال شارۋاشىلىعىمەن اينالىساتىن شارۋا قوجالىقتارى مەن كاسىپكەرلەرىنىڭ ءوتىنىشى نەگىزىندە كەتكەن شىعىندارىنىڭ 80%-ىن سۋبسيديالاۋ, 60 قۇدىق قازۋ قولعا الىنباق.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى