سولتۇستىك قازاقستان وبلىسىندا ءۇش كۇن ىشىندە كولىك باسقارىپ كەلە جاتىپ تەلەفونمەن سويلەسكەن 92 اۆتوبۋس جۇرگىزۋشىگە ايىپپۇل سالىندى.
پوليتسەيلەر اۆتوبۋس جۇرگىزۋشىلەرى قۇقىق بۇزۋشىلىعىنىڭ الدىن الۋ جانە ولاردى انىقتاۋ شارالارىن جانداندىردى. شارا بارىسىندا ولار 1249 جول ەرەجەسىن بۇزۋ فاكتىسىن انىقتادى. اكىمشىلىك حاتتامانىڭ 241-ءى قوعامدىق كولىك جۇرگىزۋشىلەرگە قاتىستى تولتىرىلدى.
«جۇرگىزۋشىلەر كوبىنەسە اكىمشىلىك قۇقىق بۇزۋشىلىق تۋرالى كودەكستىڭ 591-بابىن («كولiك قۇرالىن باسقارۋ كەزiندە جۇرگiزۋشiنiڭ تەلەفوندى نە راديوستانتسيانى پايدالانۋى») بۇزدى. ولارعا قاتىستى 92 حاتتاما تولتىرىلدى. 41 جۇرگىزۋشى اكىمشىلىك جاۋاپقا تارتىلدى. جۇرگىزۋشى كۋالىگىنسىز كولىك باسقارۋ بويىنشا 28 فاكت تىركەلدى, 17 جۇرگىزۋشى جىلدامدىقتى ارتتىرعانى ءۇشىن جازالاندى», دەيدى جەرگىلىكتى پوليتسيا قىزمەتىنىڭ باستىعى قانات ايتباەۆ.
بىلتىر 674 جۇرگىزۋشى اكىمشىلىك جاۋاپقا تارتىلعان بولاتىن.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى