الەمدە سپورتتىڭ ءبىر تۇرىمەن شۇعىلدانىپ, حالىقارالىق دودالاردا الما-كەزەك توپ جارىپ, ايى وڭىنان تۋىپ جۇرگەن اعايىندى سپورتشىلار كوپتەپ كەزدەسىپ جاتادى. مىسالى, سوڭعى جىلدارى تەننيستەن «ۇلكەن دۋلىعا» ساناتىنا ەنەتىن «ۋيمبلدون» جانە بۇگىن باستالعان اۋستراليا اشىق چەمپيوناتىندا بىرىنەن سوڭ ءبىرى توپ جارىپ جۇرگەن امەريكالىق اپالى-ءسىڭلىلى تەننيسشىلەر سەرەنا مەن ۆينۋس ۋيليامس, اۋەسقوي مەن كاسىپقوي بوكستا اسا اۋىر سالماقتا الەم چەمپيونى اتانعان ۋكراينالىق اعالى-ءىنىلى بوكسشىلار ۆيتالي جانە ۆلاديمير كليچكو, امەريكالىق باسكەتبولشىلار مەيسون جانە مايلز پلاملي, تاسجولدا ءبىر-بىرىمەن جارىسقان گەرمانيالىق پيلوتتار ميحاەل مەن رالف شۋماحەر جانە تاعى باسقا بىرقاتار سپورتشىلار بار.
ءبىر قىزىعى, ءبىر انادان تۋعان اعايىندى سپورتشىلاردىڭ اراسىندا وليمپيا ويىندارىنا قاتىسىپ, تۇعىر ساتىسىنا بىرگە كوتەرىلگەندەرى دە بار ەكەن. ءتورت جىلدا ءبىر كەلەتىن بايراقتى باسەكەگە تەك ىرىكتەۋدەن ىركىلمەگەندەر عانا قاتىسىپ, ۇزدىكتەردىڭ ۇزدىگى عانا وليمپ شىڭىن باعىندىرىپ جاتادى ەمەس پە. ال ءبىزدىڭ تومەندەگى كەيىپكەرلەرىمىز وليمپياداعا بەرەتىن جولدامانى يەلەنىپ قانا قويماي, وليمپ تۇعىرىنىڭ ەڭ بيىك ساتىسىنا كوتەرىلگەن. ءبىز بۇل جولى قىسقى وليمپيادانىڭ ءبىر سپورت تۇرىنەن باق سىناپ, جەڭىس تۇعىرىنا بىرگە كوتەرىلگەن اعايىندى سپورتشىلار تۋرالى ءسوز ەتپەكپىز.
اعايىندى سپورتشىلاردىڭ وليمپيا ويىندارىندا توپ جارۋى 1928 جىلى شۆەيتساريانىڭ سانكت-موريتس قالاسىندا وتكەن ەكىنشى قىسقى وليمپيا ويىندارىندا تىركەلدى. سانكت-موريتستە امەريكالىق اعالى-ءىنىلى سپورتشىلار دجەننيسون حيتون مەن دجون حيتون سكەلەتون سپورت ءتۇرى بويىنشا باق سىناپ, ءوزارا ءبىرىنشى جانە ەكىنشى ورىنداردى ءبولىپ العان. دجەننيسون حيتون 3:01.8 ۋاقىت كورسەتكىشىمەن مارەگە ءبىرىنشى جەتسە, دجەننيسوننىڭ ءىزىن الا باۋىرى دجون حيتون 3:02.8 ناتيجەسىن تىركەپ, موينىنا كۇمىس مەدال تاققان. ءسويتىپ, قىسقى وليمپيادا تاريحىندا تۇڭعىش رەت اعايىندى سپورتشىلار سپورتتىڭ ءبىر تۇرىنەن توپ جارىپ, ەسىمدەرى تاريحتا التىن ارىپتەرمەن جازىلدى.
ارادا 36 جىل وتكەندە امەريكالىق اعايىندىلاردىڭ جەتىستىگىن 1964 جىلعى ينسبرۋك (اۋستريا) قىسقى وليمپياداسىندا فرانتسيالىق اپالى-ءسىڭلىلى ماريەل جانە كريستين گوليتسەلدەر قايتالادى. ولار الىپ سلالوم سپورتىنىڭ ەكى سايىسى بويىنشا سىنعا تۇسكەن. العاشقى جارىستا گوليتسەلدەردىڭ ۇلكەنى ماريەل ءبىرىنشى ورىندى يەلەنسە, ءسىڭلىسى كريستين مارەگە ەكىنشى بولىپ كەلگەن.
ال باسەكەنىڭ ەكىنشى جارىسىندا اپالى-ءسىڭلىلى سپورتشىلاردىڭ كىشىسى جەڭىمپاز اتانعان. ماريەل گوليتسەل بۇل جولى مارەگە ەكىنشى بولىپ جەتكەن. ءسويتىپ ينسبرۋك وليمپياداسىندا اعايىندى گوليتسەلدەردىڭ ەكەۋى دە ەلدەرىنە ءبىر-ءبىر التىن جانە سونداي كۇمىسپەن ورالعان.
قازىرگى بوسنيا جانە گەرتسەگوۆينانىڭ استاناسى ساراەۆو قالاسىندا وتكەن ءحىV قىسقى وليمپيا ويىندارىندا (1984 جىل) ەكىنشى رەت امەريكالىق اعايىندىلار توپ جاردى. فيل جانە ستيۆ مارە سلالوم سپورتى بويىنشا باق سىناپ, جوعارىداعى كەيىپكەرلەرىمىز سەكىلدى ءبىرىنشى جانە ەكىنشى ورىنداردى يەلەنگەن. فيل مارە التىن السا, ستيۆ مارە كۇمىستى قاناعات تۇتقان. مارەلەردىڭ كىشىسى قاتارىنان ءۇش وليمپياداعا قاتىسىپ (1976, 1980 جانە 1984 جىلى), سوڭعىسىندا عانا جۇلدەگە ىلىككەن. ال اعاسى فيل مارە 1980 جىلى اقش-تىڭ لەيك-پلەسيد قالاسىنداعى اق وليمپيادادا كۇمىس مەدال جەڭىپ العان.
1992 جىلى فرانتسيانىڭ البەرۆيلە قالاسىندا جالاۋى جەلبىرەگەن وليمپيا ويىندارىندا اۋستريالىق اپالى-ءسىڭلىلى دوريس جانە انگەليكا نوينەرلەر شانا سپورتىنان سىنعا تۇسكەن. ناتيجەسىندە دوريس نوينەر التىننان القا تاقسا, ءسىڭلىسى انگەليكا نوينەر كۇمىس مەدالدى ولجالاعان.
2006 جىلعى تۋرين وليمپياداسىندا شۆەيتساريالىق اعالى-ءىنىلى سنوۋبوردشىلار فيليپپ شوح جانە سايمون شوح (سۋرەتتە) اراسىنداعى قاراما-قايشىلىق وتە تارتىستى وتكەن. بۇل جولعى باسەكەدە دە اعاسىنىڭ مەرەيى ۇستەم بولعان. فيليپپ ءبىرىنشى ورىن, ءىنىسى سايمون ەكىنشى ورىن العان. ايتا كەتەرلىك تاعى ءبىر جايت, فيليپپ 2002 جىلى سولت-لەيك-سيتيدە وتكەن وليمپيادا دا چەمپيون اتانعان. فيليپپ پەن سايموننىڭ جاس ارالىعى نەبارى ءبىر جىل ءۇش كۇن.
رەسەيدىڭ سوچي قالاسىندا وتكەن XXII قىسقى وليمپيادادا كانادالىق اپالى-ءسىڭلىلى قىزدار التىن مەن كۇمىس مەدالدى ءوزارا ءبولىستى. فريستايلدان قاتىسقان جيۋستين ديۋفۋر-لاپۋانت نەبارى 20 جاسىندا تۇعىردىڭ ءبىرىنشى ساتىسىنا كوتەرىلسە, حلوە ديۋفۋر-لاپۋانت سىڭلىسىنەن تومەن ۇپاي جيناپ, كۇمىس مەدال الدى.
قازاقتىڭ «الدىڭعى اربا قايدا جۇرسە, سوڭعى اربا سوندا بارادى» دەگەن ءسوزى ءبىزدىڭ وسى كەيىپكەرلەرىمىزگە ءدال كەلىپ تۇرعان سياقتى. ويتكەنى اعاسىنىڭ ارتىنان ءىنىسى, اپكەسىنىڭ سوڭىنان ءسىڭلىسى ەرىپ, سپورتتاعى ەنشىسىن ەسەلەي تۇسكەن. بۇل دا ءبىر الدىڭعى بۋىننىڭ تاعىلىمى سوڭعىلارعا جۇققانىنان بولسا كەرەك. مۇنداي ءىرى جەڭىس تەك اعايىندى سپورتشىلاردىڭ عانا ەمەس, ءبىر وتباسىنىڭ, بۇكىل ەلدىڭ ەسەلەگەن قۋانىشى. تاپ وسىنداي قۋانىش, جەڭىس ءبىزدىڭ دە سپورتشىلارعا جۇعىستى بولسىن دەيىك.
ءالي بيتورە,
«ەگەمەن قازاقستان»