باتىس قازاقستان وبلىسىنداعى شىڭعىرلاۋ اۋدانى – تابيعي گازبەن 100 پايىز قامتاماسىز ەتىلگەن ءوڭىر ساناتىنا قوسىلدى. اۋدان ورتالىعىنان ەڭ شالعان جاتقان ەلدىمەكەننىڭ ءبىرى – اقسۋات اۋىلى 2018 جىلدىڭ باسىندا كوگىلدىر وتىن جەلىسىنە قوسىلدى.
باتىس قازاقستان وبلىسىنىڭ شىعىس بولىگىندە ورنالاسقان, اۋماعى - 7,2 مىڭ شارشى شاقىرىمدى قۇرايتىن شىڭعىرلاۋ ءوڭىرى رەسەي فەدەراتسياسىنىڭ ورىنبور وبلىسىمەن شەكتەسەدى. شەكارالىق اۋداندا بۇگىنگى تاڭدا جالپى سانى 15304 ادام تۇرىپ جاتىر. اۋدانداعى 8 اۋىلدىق وكرۋگ, ونداعى ءىرىلى-ۇساقتى 20 ەلدىمەكەنگە تۇگەلىمەن تابيعي گاز قۇبىرى جەتكىزىلدى.
اقسۋات – قاراعاش اۋىلدىق وكرۋگىنە قارايتىن, 31 ۇيدەن عانا تۇراتىن شاعىن ەلدى مەكەن. نەگىزگى مەكتەبى, مادەنيەت ءۇيى, فەلدشەرلىك پۋنكتى سەكىلدى بىرنەشە الەۋمەتتىك نىسان قىزمەت ەتىپ تۇرعان ۇياداي اۋىلدا 425 ادام تىرشىلىك ەتەدى. اۋدان ورتالىعىنان شەتكەرى جاتقاندىقتان اقسۋاتتىقتار تابيعي گاز يگىلىگىن كورە الماي جۇرگەن ەدى. مۇنىڭ دا شەشىمى تابىلدى, گاز قۇبىرى ىرگەدەگى سىرىم اۋدانى اۋماعىنان تارتىلدى.
- اقسۋات اۋىلىنا تابيعي گاز قۇبىرى جەتكىزىلۋى – ەلباسى تاپسىرمالارىنان تۋىنداپ وتىرعان ناقتى جوسپارلى قادامنىڭ ەدى. ءبىز شىڭعىرلاۋ اۋدانى اۋماعىن تۇگەل قامتىعان اۋقىمدى جۇمىستى ورىنداپ شىقتىق, - دەدى ءوز سوزىندە اۋدان اكىمىنىڭ ورىنباسارى تىلەپبەرگەن قايىپوۆ.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان وبلىسى