الاكولدىڭ جاعاسىنداعى قابانباي اۋىلىندا جاقىندا ەل ەسىندە قالاتىنداي, جۇرەكتەرگە قۋانىش سىيلاعان ەلەۋلى وقيعا بولدى. وسى اۋىلدىڭ ءوسىپ-وركەندەۋىنە ەرەكشە ۇلەس قوسقان جالعىزباستى گۇلبارام قۇرمانوۆا دەگەن 74 جاستاعى انا 70 جىلدان بەرى ابدەن توزىعى جەتكەن شاعىن ءبىر بولمەلى ۇيدە تۇرىپ كەلسە دە, الاقان جايىپ, ەشكىمنەن كومەك سۇرامادى, بارىن قاناعات تۇتىپ تىرشىلىك جاساپ كەلدى.
قابانباي اۋىلدىق وكرۋگىنىڭ اكىمى قاليحان نۇرىمباەۆ, ءۇرجار اۋداندىق جۇمىسپەن قامتۋ جانە الەۋمەتتىك باعدارلامالار بولىمىنە قاراستى قابانباي اۋىلدىق بولىمشەسىنىڭ قىزمەتكەرلەرى باعداگۇل تەمىرعاليەۆا مەن اقمارال شاقاباەۆا اپايلارىنىڭ تۇرمىسىن جاقسى بىلگەندىكتەن اۋدان اكىمى سەرىك زاينۋلدينمەن, اۋىلداستارىمەن اقىلداسىپ ەلباسىنىڭ «رۋحاني جاڭعىرۋ» ماقالاسى اياسىندا كەيۋاناعا تۇرعىن ءۇي سالىپ بەرۋدى ۇيعاردى.
قارت اناعا تۇرعىن ءۇي كىلتىن تاپسىرۋعا ارنالعان جيىنعا اۋىلداستارى تۇگەل كەلدى. اۋىل اكىمى ق.نۇرىمباەۆ سالتاناتتى جيىندى اشىپ, ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ادامدارعا الەۋمەتتىك جاعداي جاساۋ, ولاردىڭ تۇرمىسىنا كوڭىل ءبولۋ جايلى ايتىلعانىن ەسكە سالا كەتتى. بۇدان كەيىن اۋىل اكىمى تۇرعىن ءۇي سالۋعا قولعابىس جاساعان ابزال جاندارعا العىسىن ءبىلدىردى. الاكولدىڭ جاعاسىنداعى كاسىپكەرلەر 250 مىڭ تەڭگە جيناپ بەرىپتى. ماردان اقساقال باسقاراتىن اقساقالدار القاسى – 65, اۋىل اقساقالدارى مۇقان ومارعاليەۆ, ەركىنبەك قاليپانوۆ, سەرىك جانۇزاقوۆ, اۋىلدىڭ باس يمامى مارات قاجى, «دوروجنيك», «سانسىزباي» دەمالىس ۇيلەرىنىڭ باسشىلارى, «ماناس» قوجالىعىنىڭ يەسى قوماقتى قارجى قوسقان. اۋىل ازاماتى مەيرامبەك داۋلەتحانوۆ بريگاداسىمەن كەلىپ ءۇيدىڭ تاعانىن قۇيىپ بەردى. «كوپ تۇكىرسە كول» دەگەندەي, اقىرى توبەسى جابىلعان, اۋلاسى شىرىگەن اعاشتاردان تازارتىلعان, كوزدىڭ جاۋىن الاتىن تۇرعىن ءۇي پايدالانۋعا بەرىلدى.
اۋدان اكىمىنىڭ ورىنباسارى سەرىك سادۋاقاسوۆ قابانباي اۋىلىنىڭ تۇرعىندارىنا, الەۋمەتتىك سالا قىزمەتكەرلەرىنە قارياعا جاساعان قامقورلىعى ءۇشىن ريزالىق ءبىلدىردى. قارت انانىڭ قۋانىشىن بولىسكەن جەرلەستەرى سىيلىقتارىن دا الا كەلگەن ەكەن. ياعني كىلەم, ىدىس-اياق, تۇرمىسقا قاجەت زاتتاردى تابالدىرىققا ءۇيىپ تاستادى. اقمارال شاقاباەۆا ۇزاق ۋاقىت بويى اجەنى قامقورلىعىنا الىپ, كومەكتەسىپ كەلىپتى. قىس مەزگىلىندە مەكتەپتىڭ تيمۋرشىلارى قار كۇرەپ, وتىنىن جاعىپ, سۋىن تاسىپ بەرەدى ەكەن. ول ءوز سوزىندە الداعى ۋاقىتتا دا اناعا قولعابىس جاساي بەرەتىنىن تىلگە تيەك ەتتى. ال قارت اجە وزىنە قامقورلىق جاساعان اۋدان, اۋىل باسشىلارى مەن جەرلەستەرىنە العىسىن ءبىلدىرىپ, كوزىنە جاس العان كەزدە كوپشىلىك قاۋىم تولقىپ كەتتى.
اۋىل تۇرعىندارى گ.قۇرمانوۆانىڭ جاڭا ۇيىنە كىرىپ, شاشۋ شاشتى, داستارقاننان ءدام تاتتى.
وڭداسىن ەلۋباي,
جۋرناليست
شىعىس قازاقستان وبلىسى,
ءۇرجار اۋدانى