بيىل ماڭعىستاۋ وبلىسىندا كاسىپكەرلەردىڭ قاراجاتىنان 8 سپورت كەشەنى مەن 20 اشىق سپورت الاڭدارى سالىنعان. سەگىز اۋىلدا «جاس باتىر» سپورت مەكتەبىنىڭ فيليالدارى اشىلدى.
كەلەر جىلى جەكەمەنشىك مەملەكەتتىك سەرىكتەستىكپەن مۇز سارايى مەن بوكس ورتالىعى قۇرىلىسى باستالماق. سونىمەن قاتار ۇستەل تەننيسى ورتالىعى مەن بارلىق اۋدانداردا دەنەشىنىقتىرۋ ساۋىقتىرۋ كەشەنى سالىنادى. اقتاۋ قالاسىندا ىقشاماۋداندارعى 15 ويىن الاڭى جوندەۋدەن وتكىزۋ جوسپارلانعان. سونىمەن قاتار, وڭىردە دزيۋدو, سامبو كۇرەسى, كاراتە-دو, كيكبوكسينگ قارقىندى دامىپ كەلە جاتىر. جاستار مەن جاسوسپىرىمدەر اراسىندا ماڭعىستاۋلىقتار - سامبو كۇرەسىنەن رامازان ماماەۆ, دزيۋدودان ازيا جانە ەۋروپا كۋبوگىنىڭ چەمپيونى سۇڭعات جۇباتقان, كاراتە-دودان ەركىنبەك بايتوريەۆ الەم چەمپيونى اتانسا, حورۆاتيادا جاستار اراسىندا دزيۋدودان وتكەن الەم چەمپيوناتىنىڭ تۇڭعىش قولا جۇلدەسىن باۋىرجان نارباەۆ يەلەندى. ماڭعىستاۋلىق ءۇش جاتتىقتىرۋشى «قر ەڭبەگى سىڭىرگەن جاتتىقتىرۋشى» اتاعىن ابىرويمەن قورعادى. وبلىستا تۇراقتى سپورتپەن اينالىساتىنداردىڭ سانى 30%-دان استى.
مەرەكەلىك كەشتە تومەندەگىدەي ماراپاتتار تابىستالدى:
قازاقستان رەسپۋبليكاسى مادەنيەت جانە سپورت مينيسترلىگىنىڭ «دەنە شىنىقتىرۋ مەن سپورتتى دامىتۋعا سىڭىرگەن ەڭبەگى ءۇشىن» توسبەلگىسىمەن قاراقيا اۋداندىق مادەنيەت, دەنە شىنىقتىرۋ جانە سپورت ءبولىمىنىڭ باسشىسى دۇيسەنباي اتاعاراەۆ جانە ماڭعىستاۋ وبلىستىق وليمپيادالىق دايارلاۋ ورتالىعىنىڭ ديرەكتورى قانات وزعانباەۆ; قازاقستان رەسپۋبليكاسى مادەنيەت جانە سپورت مينيسترلىگىنىڭ «قۇرمەتتى سپورت قىزمەتكەرى» توسبەلگىسىمەن ماڭعىستاۋ وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى نۇربەك قاراباللاەۆ; قازاقستان رەسپۋبليكاسىنا ەڭبەك سىڭىرگەن جاتتىقتىرۋشىسى مەدالىمەن تاەكۆوندودان جاتتىقتىرۋشى عاني يبراگيموۆ, بوكستان جاتتىقتىرۋشى جاراس كاليموۆ, كيكبوكسينگتەن جاتتىقتىرۋشى ەسەنمۇرات سەليكوۆ; سپورت سالاسىن دامىتۋعا قوسقان ۇلەسى ءۇشىن «جومارت جۇرەك» نوميناتسياسىمەن سارسەنباي ابدۋللاەۆ; سپورت سالاسى بويىنشا «جىلدىڭ ۇزدىك اۋدانى» نوميناتسياسىمەن ماڭعىستاۋ اۋدانى ماراپاتتالدى.سونداي-اق, وسى سالانىڭ دامۋىنا سۇبەلى ۇلەس قوسقان 70-كە جۋىق ازاماتقا ماڭعىستاۋ وبلىسى اكىمىنىڭ العىسى تابىستالدى.
شارا سوڭى ءوڭىردىڭ ونەر جۇلدىزدارى مەن سپورتشىلار قاتىسقان مەرەكەلىك كونتسەرتكە جالعاستى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى