بۇگىن «نۇر وتان» پارتياسىنىڭ ورتالىق اپپاراتىندا «كوش كولىكتى بولسىن» رەسپۋبليكالىق اكتسياسى ءوتتى.
پارتيانىڭ رەسپۋبليكالىق قوعامدىق قابىلداۋ بولمەسى ەكىنشى رەت ۇيىمداستىرىپ وتىرعان اكتسياعا كوشى-قون ساياساتى بويىنشا جۇمىستاردى جۇزەگە اسىرىپ وتىرعان اتقارۋشى ورگانداردىڭ وكىلى قاتىستى جانە ەلىمىزدەگى بارلىق وبلىستار مەن استانا, الماتى قالاسىنداعى كوشى-قون پوليتسياسىنىڭ قۇرىلىمدىق بولىمشەلەرىنىڭ ماماندارى بەينە بايلانىسقا شىقتى.
بۇل شارا اتقارۋشى بيلىكتىڭ نازارىن كوشى-قون ساياساتىنا نازارىن اۋدارۋ, «حالىقتىڭ كوشى-قونى تۋرالى» زاڭى مەن وزگە دە قاۋلىلاردىڭ ءوز دەڭگەيىندە اتقارىلۋىن قامتاماسىز ەتۋ, سونداي-اق ازاماتتاردىڭ كۇن تارتىبىندە شەشىلمەي تۇرعان ماسەلەلەرىن انىقتاپ ونى زاڭ اياسىندا شەشۋگە ىقپال ەتۋ ماقساتىندا ءوتىپ وتىر. ەلباسىنىڭ دۇنيەجۇزى قازاقتارىنىڭ V قۇرىلتايىندا بەرگەن تاپسىرمالارىن جۇزەگە اسىرۋ جۇمىستارى دا باياندالعان جيىندا قۇزىرلى ورگان وكىلدەرى كوشى-قون ماسەلەلەرى بويىنشا ازاماتتاردى تاقىرىپتىق قابىلداۋ وتكىزدى.
جيىندا ورالماندار ماسەلەسىن شەشۋگە اتسالىسىپ كەلە جاتقان قوعامدىق ۇيىم باسشىلارى اتقارۋشى بيلىك وكىلدەرىنەن وسى ماسەلە توڭىرەگىندەگى سۇراقتارىنا تىكەلەي جاۋاپ الدى جانە ۇسىنىستارىن جەتكىزدى.
اتاپ ايتقاندا قوعامدىق ۇيىمدار تاراپىنان قر اكiمشiلiك قۇقىق بۇزۋشىلىق تۋرالى زاڭنامانى ءبىر رەت بۇزعان قانداستارىمىزدىڭ «حالىقتىڭ كوشى-قونى تۋرالى» زاڭىنا ساي, تۇراقتى تىركەۋگە تۇرۋعا مۇمكىندىگى بولا تۇرىپ, سوتقا تارتىلۋى جانە تۇراقتى تىركەۋگە تۇرۋدان ءبىر جىلعا شەتتەتىلۋى, ءبىلىم الۋ ماقساتىندا كەلىپ, گرانتپەن وقۋعا تۇسكەن ۇلتى قازاق ستۋدەنتتەردىڭ جوعارى وقۋ ورىندارىنىڭ جاتاقحاناسىنا زاڭ اياسىندا تۇراقتى تىركەۋگە تۇرۋعا مۇمكىندىگى بولا تۇرىپ, تۇراقتى تىركەۋگە تۇرا الماۋى, سىرتتا جۇرگەن قانداستارىمىزعا وزدەرى تۇرعان ەلدەردەگى قازاقستان مەكەمەلەرى ارقىلى قر ۇكىمەتى ايقىنداعان وڭىرلەرگە كەلۋگە, ورالمانداردى قابىلداۋدىڭ وڭىرلىك كۆوتاسىنا ەنۋگە بولاتىنى تۋرالى سىرتقى ىستەر مينيسترلىگىنەن جەتكىلىكتى اقپارات بەرمەۋى سياقتى ماسەلەلەر ورتاعا قويىلدى. مينيسترلىك وكىلدەرى جاۋاپ قايتاردى جانە زاڭ اياسىندا شەشۋ جولدارىن قارستىرۋعا ۋادە بەردى.
ساۋالدارعا ساي ىشكى ىستەر مينيسترلىگى كوشى-قون قىزمەتى كوميتەتى توراعاسىنىڭ ورىنباسارى ىرىسبەك يساەۆ ەلىمىزدە كوشى-قون ماسەلەلەرىمەن اينالىساتىن حالىققا قىزمەت كورسەتۋ ورتالىعى جىلدىڭ اياعىنا دەيىن استانادا قۇرىلاتىنىن جانە كەلەسى جىلى بۇنداي ورتالىق بارلىق وبلىستاردا اشىلاتىنىن ايتتى. سونداي-اق ول 2018 جىلدىڭ 1 شىلدەسىنەن باستاپ ەلىمىزگە ۆيزامەن كەلەتىن شەتەل ازاماتتارى شەكارادان وتكەن كەزدە بىردەن ۋاقىتشا تىركەۋگە مۇمكىندىك الاتىنىن جەتكىزدى.