شارادا تمد-عا مۇشە مەملەكەتتەردىڭ 2020 جىلعا دەيىنگى حالىقارالىق جاستار ىنتىماقتاستىعى ستراتەگياسى سەكىلدى كۇن تارتىبىندەگى ماسەلەلەر قارالدى.
كەڭەستىڭ جۇمىسىنا ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ, ازەربايجان جاستار جانە سپورت ءمينيسترىنىڭ ورىنباسارى ي.باباەۆ, رەسەي فەدەراتسياسى ءبىلىم جانە عىلىم مينيسترلىگى بالالاردى جانە جاستاردى تاربيەلەۋ سالاسىنداعى مەملەكەتتىك ساياسات دەپارتامەنتىنىڭ ديرەكتورى ي.ميحەەۆ, تمد-عا قاتىسۋشى مەملەكەتتەردىڭ جاستار ۇيىمدارىنىڭ جەتەكشىلەرى, قازاقستانداعى ارمەنيا, بەلارۋس, تاجىكستان, قىرعىزستان مەملەكەتتەرى ەلشىلىگىنىڭ وكىلدەرى قاتىستى.
جيىندى اشقان ن.ەرمەكباەۆ جاستاردىڭ ماسەلەسى مەملەكەتتىڭ ماڭىزدى باعىتتارىنىڭ ءبىرى ەكەنىن اتاپ ءوتتى. مينيستر كەڭەس قاتىسۋشىلارىن مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ نەگىزگى باعىتتارىمەن تانىستىرىپ, جاستار اراسىندا ءدىني ەكسترەميزم مەن راديكاليزمنىڭ الدىن الۋ بويىنشا جۇرگىزىلىپ جاتقان جۇمىستار جايىندا اڭگىمەلەدى.
«كەزىندە شىعىس ويشىلى ءابۋ ناسىر ءال-فارابي: «جاستارىڭىزدى كورسەتسەڭىز, مەن سىزدەردىڭ ەلدەرىڭىزدىڭ بولاشاعىن ايتىپ بەرەمىن» دەگەن ەكەن. سوندىقتان, ءبىزدىڭ ەلدەر اراسىنداعى جاستاردىڭ ءوزارا دوستىق قارىم-قاتىناستا بولۋى قوعامىمىزدىڭ وركەندەۋدىڭ كەپىلى. قازىرگى تاڭدا جاستار بارلىق ءداستۇرلى دىندەرگە جانە جالپىعا ورتاق قۇندىلىقتارعا اينالعان رۋحاني, مورالدىق, ەتيكالىق پرينتسيپتەردى دۇرىس ءتۇسىنىپ, بۇعان وڭ كوزقاراسپەن قاراۋى ءتيىس. ءبىز جاستاردى ءبىلىم الىپ, العا ۇمتىلۋعا, ورتاعاسىرلىق دوگمالار مەن قاراڭعىلىقتان اۋلاق بولۋعا شاقىرامىز», دەدى ن. ەرمەكباەۆ.
سونىمەن قاتار, جيىن بارىسىندا XIX دۇنيەجۇزىلىك جاستار جانە ستۋدەنتتەر فەستيۆالىنىڭ قورىتىندىسى, «تمد-عا ارنالعان 100 يدەيا» حالىقارالىق جوباسىنا دايىندىق سەكىلدى بىرقاتار كۇن تارتىبىندەگى ماسەلەلەردى تالقىلاندى.
كەڭەس مۇشەلەرى قازاقستاننىڭ پاتريوتتىق جانە ەكولوگيالىق تاربيەلەۋ, ەرىكتىلەر قوزعالىسىن دامىتۋ جانە جاستار رەسۋرستىق ورتالىقتارىنىڭ قىزمەتىن ۇيىمداستىرۋ بويىنشا وزىق تاجىريبەسىن اتاپ ءوتتى. سونداي-اق, وتىرىس اياسىندا «جاستار» عىلىمي-زەرتتەۋ ورتالىعىنىڭ قىزمەتى تانىستىرىلدى. جيىنعا قاتىسۋشىلار ەلىمىزدىڭ كەڭەسكە جوعارى دەڭگەيدە توراعالىق ەتكەندىگىن اتاپ ءوتىپ, ءدىن ىستەرى جانە ازاماتتىق قوعام مينيسترلىگىنە العىستارىن ءبىلدىردى.