اقتاۋدا وتكەن حالىقارالىق بيزنەس فورۋم اياسىندا وبلىس اكىمى ە. توعجانوۆ الەمنىڭ جەتەكشى جەتى كومپانياسىنىڭ وكىلدەرىمەن كەزدەسىپ, كەلىسسوز جۇرگىزدى.
اتاپ ايتقاندا, 2005 جىلى نەگىزى قالانعان دۋبايلىق «DP WORLD» كومپانياسىنىڭ وكىلىمەن ەكى جاقتى كەلىسىمشارتتىڭ شارتتارى تالقىلاندى. بۇل كومپانيامەن وبلىس باسشىسى بۇعان دەيىن دە بىرنەشە رەت كەزدەسۋ وتكىزگەن. ايتا كەتەيىك, شەتەلدىك مەكەمە كوپ ۋاقىتتان بەرى الەمدىك نارىقتا جۇك تاسىمالداۋمەن اينالىسادى.
ال, مالايزيالىق «Reach Energy» كومپانياسى قارا التىندى ءتيىمدى يگەرۋ بويىنشا الدىڭعى قاتاردا كەلە جاتقان مەكەمە. اتالمىش كاسىپورىن مۇنايلى ولكەدە كوگىلدىر وتىندى قايتا وڭدەپ, ونى سۇيىتۋمەن اينالىسۋعا دايىن ەكەنىن جەتكىزدى. ەگەر ەكى جاقتى كەلىسسوزدەر وڭ شەشىمىن تاپسا, ولار 2018 جىلدىڭ سوڭىنا دەيىن 55 مىڭ توننا گاز وندىرەتىن بولادى. تاعى ءبىر مالايزيالىق «One Ocean Environment Sdn Bhd» كومپانياسى ماڭعىستاۋ وڭىرىندە ءوز جۇمىسىن باستاۋعا دايىن. ماشينا جاساۋ جانە ەلەكترتەحنيكا جابدىقتارىن ورناتۋ سالاسىندا 40 جىلعا جۋىق تاجىريبەسى بار مەكەمە. كومپانيانىڭ قازىرگى ماقساتى وبلىسىمىزدا ەنەرگيا كوزدەرىن تارتۋ جانە سۋ تۇششىتۋ سالاسى بويىنشا ينۆەستيتسيا سالۋدى كوزدەپ وتىر.
«Saj Group» كومپانياسى ءتۇرلى سالادا قىزمەت كورسەدى. 17 جىلدىق تاجىريبەسى بار مەكەمەنىڭ مىسىر, كانادا, سۋدان, زامبيا جانە قازاقستاندا بولىمشەسى ورنالاسقان. مۇنايحيميا جانە مۇنايدى قايتا وڭدەۋمەن اينالىساتىن كومپانيا ءبىزدىڭ وڭىردە تۇرمىستىق قاتتى قالدىقتاردى قايتا وڭدەيتىن زاۋىت سالۋعا نيەتتى.
وبلىس اكىمى ە.توعجانوۆ كەلىسسوز جۇرگىزگەن «TECDRY» كومپانياسى وڭىرىمىزدە قۇرىلىس سالاسىندا جۇمىس ىستەگىسى كەلەتىنىن ايتتى. ويتكەنى, بۇل كومپانيا الەمدىك نارىققا مۇناي-حيميا سالاسىنداعى قالدىقتاردى تازالاۋ جانە ءتۇرلى سالادى جاسىل تەحنولوگيانى ەنگىزۋ بويىنشا تاجىريبەسى مول.
ال, 2014 جىلى قۇرىلعان تۇركيالىق «Enerwo Energy» كومپانياسىنىڭ باس ديرەكتورى وگۋز زەيرەك ءوڭىر باسشىسىنا ناقتى جوسپارىمەن تانىستىردى. ولار ماڭعىستاۋ وبلىسىندا بيتۋم زاۋىتىن سالۋ ماقساتىندا كەلگەنىن ايتتى. سەبەبى, بۇل ايماقتا جاڭا باعىتتاعى جول قۇرىلىستارى سالىنۋدا.
مەملەكەت تاراپىنان شەتەلدىك ينۆەستورلارعا جاسالىپ جاتقان جەڭىلدىكتەردى اتاپ وتكەن حالىقارالىق كومپانيا وكىلدەرى ماڭعىستاۋ وبلىسىندا جۇمىس ىستەۋگە دايىن ەكەندەرىن جەتكىزدى, دەلىنگەن ءباسپاسوز حابارلاماسىندا.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى