ارينە, «مىڭ رەت ەستىگەننەن ءبىر رەت كورگەن ارتىق» دەپ ءبارىمىز دە تاريحي ورىنداردى تاماشالاپ, تامىلجىعان تابيعات اياسىندا سەرۋەندەگىمىز كەلەدى.
بىراق وعان ۋاقىت شىركىن ىرىق بەرە مە؟ بىرەۋدىڭ جۇمىسى, بىرەۋدىڭ ساباعى دەگەندەي. دەگەنمەن دە قالادان شىقپاي-اق, الىسقا ۇزاماي-اق وڭىردەگى تاريحي ەسكەرتكىشتەرمەن, قۇندى جادىگەرلەرمەن, وبلىستىڭ كوركەم تابيعاتىمەن تانىسۋعا, تاماشالاۋعا بولا ما؟ بولادى ەكەن. وسكەمەندەگى ا.پۋشكين اتىنداعى وبلىستىق كىتاپحانا ۇجىمى «رۋحاني جاڭعىرۋ» باعدارلاماسى اياسىندا «مەنىڭ ولكەم – عاجاپ ءارى كوركەم» اتتى ۆيرتۋالدى كىتاپ كورمەسى ارقىلى شاھار تۇرعىندارىنا وسىنداي تاماشا مۇمكىندىك ۇسىنىپ وتىر. وڭىردەگى عاجاپ جەرلەر مەن عاجايىپ تاريحتى عالامتور الدىڭىزعا جايىپ سالادى. تەك كىتاپحاناعا كەلسەڭىز, ىقىلاس-پەيىل بولسەڭىز بولعانى. «ۆيرتۋالدى كورمە «كونە ءارى جاس», «قۇپيالى ءارى قۇدىرەتتى», «شىرايلى ءارى شۋاقتى», «كيەلى ءارى قاسيەتتى», «يگىلىكتى ءارى دارحان» جانە «عيبراتتى ءارى پاراساتتى» دەگەن بىرنەشە بولىمنەن تۇرادى. ءار ءبولىم ەلباسىنىڭ «شىعىس قازاقستان – ەلىمىزدىڭ ءىنجۋ-مارجانى» دەگەن تاماشا سوزىنەن باستاۋ الادى. كورمە ارقىلى ايماعىمىزداعى تاۋلار مەن دالالاردى, وبلىس تاريحىنا قاتىستى اڭىز-ءاپسانالاردى, سالت-داستۇرلەرىمىزدى جانە قازاق جەرىندەگى تابيعي بايلىقتار مەن الەم نازارىن اۋدارعان تاريحي ەسكەرتكىشتەردى تاماشالاپ, ولار تۋرالى مول ماعلۇماتتار الۋعا بولادى. وبلىستان شىققان تانىمال اقىن-جازۋشىلار تۋرالى دەرەكتەر دە مول. ۆيرتۋالدى كورمە ءالى دە جالعاسادى. سوندىقتان قالا تۇرعىندارىن كورمەنى تاماشالاۋعا, ءوڭىرىمىزدىڭ تاريحىمەن, تابيعاتىمەن تانىسۋعا شاقىرامىز», دەيدى كىتاپحانا قىزمەتكەرى جانسايا اشكەنوۆا.
ازامات قاسىم, «ەگەمەن قازاقستان»
وسكەمەن