استانادا تاريحي باستاماعا ارنالعان كورمە ءوتتى

جيىنعا سىرتقى ىستەر ءمينيسترى قايرات ءابدىراحمانوۆ, كەڭەس حاتشىلىعىنىڭ اتقارۋشى ديرەكتورى گۋن تسزيانۆەيا جانە بىرقاتار قۇرمەتتى قوناقتار قاتىستى.

كورمەنىڭ اشىلۋ سالتاناتىندا ءسوز سويلەگەن ق.ءابدىراحمانوۆ مۇنداي شارالاردىڭ ەل يگىلىگى ءۇشىن ءتيىمدى ەكەنىنە توقتالدى. ونىڭ پىكىرىنشە, كىتاپحاناداعى كورمە كەڭەستىڭ جۇمىسىن كەڭ كولەمدە كورسەتىپ, ونىڭ قالىپتاسۋ تاريحى مەن دامۋ كەزەڭىنەن مول اقپارات بەرەدى.

سونىمەن قاتار, مينيستر ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ قىزمەتى تۋرالى تارقاتىپ ايتىپ بەردى. ق.ءابدىراحمانوۆتىڭ سوزىنە سۇيەنسەك, اتالعان كەڭەس قازىرگى زامان تالابىنا ساي.

«ەلباسى نۇرسۇلتان نازارباەۆتىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەس قۇرۋ تۋرالى باستاماسى ءوز ماقساتىنا جەتتى. بۇگىنگى تاڭدا كەڭەس قۇرلىقتاعى ۇجىمدىق قاۋىپسىزدىكتى جان-جاقتى تالقىلاۋعا مۇمكىندىك بەرەدى. بۇل وقيعا قازاق حالقىنىڭ جاھاندىق قاۋىمداستىققا تەرەزەسى تەڭ ەل رەتىندە قوسىلعانىن ايعاقتاپ, بابالارىمىز بىرنەشە عاسىر اڭساعان تاۋەلسىزدىكتىڭ ايقىن كورسەتەدى», – دەدى ق.ءابدىراحمانوۆ.

ۆەدومستۆو باسشىسىنىڭ سوزىنە سۇيەنسەك, مۇنداي كورمەلەر ەلباسىنىڭ ماڭىزدى ساياسي باستامالارىن تولىق تۇسىنۋگە مۇمكىندىك بەرەدى. ول كىتاپحانا وقىرماندارى مەن قوناقتارى كەڭەس قىزمەتى جانە ەلباسىنىڭ ەرەن ەڭبەگى جايىندا مول ماعلۇماتقا قانىق بولاتىنىن اتاپ ءوتتى.

سىرتقى ىستەر ءمينيسترى ازيادا ءالى كۇنگە شەشىمىن تاپپاعان بىرقاتار كۇردەلى ماسەلەلەر بار ەكەنىن ءسوز ەتتى. ونىڭ پايىمداۋىنشا, مۇنداي شيەلەنىستەردى شەشىپ, حالىقارالىق قاۋىپسىزدىكتى قامتاماسىز ەتۋدىڭ جالعىز ايقىن تەتىگى – مەملەكەتتەر اراسىنداعى سەنىمدى ارتتىرۋ قاعيداتى. وسى ورايدا, ءىس-قيمىل جانە سەنىم شارالارى جونىندەگى كەڭەس كۇرمەۋگە كەلمەيتىن كۇردەلى كەلىسپەۋشىلىكتىڭ ۇتىمدى شەشىمىن تابۋعا مۇمكىندىك بەرەدى.

كەڭەس حاتشىلىعىنىڭ اتقارۋشى ديرەكتورى گۋن تسزيانۆەيا قاتىسۋشىلاردى مەرەيتويمەن قۇتتىقتاپ, ۇيىمدى قۇرۋ جونىندەگى ەلباسىنىڭ باستاماسىن جوعارى باعالايتىنىن جەتكىزدى. ونىڭ پىكىرىنشە, كورمە تاريحي شەشىمدەر مەن اتقارىلعان جۇمىستاردان جان-جاقتى حابار بەرەدى.

كورمەدە مۇراعات قۇجاتتارى, تاريحي فوتوسۋرەتتەرى ۇسىنىلعان. سونىمەن قاتار, حالىقارالىق قاۋىپسىزدىك جونىندەگى جانە ەلباسىنىڭ سىرتقى ساياسي باستامالارى  تاقىرىبىنا ارنالعان كىتاپحانا جيناقتارى قويىلدى.

ۇجىمدىق قاۋىپسىزدىك ماسەلەسى جونىندەگى ازيا قۇرلىعىنداعى ەڭ ءىرى فورۋمنىڭ مەرەيتويىنا كەلگەن مەيماندار تاريحي باستامادان حابار بەرەتىن شارالاردى ءجيى وتكىزۋدىڭ پايداسى مول ەكەنىن مالىمدەدى. سونىمەن بىرگە, ولار كەڭەستىڭ جۇمىسىن ودان ءارى نىعايتۋدىڭ ماڭىزدىلىعىن ءسوز ەتتى.

ەلباسى ن.نازارباەۆ ازياداعى ءوزارا ءىس-قيمىل جانە سەنىم شارالارى جونىندەگى كەڭەستى شاقىرۋ باستاماسىن تۇڭعىش رەت 1992 جىلعى 5 قازاندا بۇۇ-نىڭ 47-ءشى باس اسسامبلەياسىندا جاريالاعان بولاتىن. اتالعان كەڭەستىڭ ماقساتى – ازياداعى بەيبىتشىلىك پەن قاۋىپسىزدىكتى قامتاماسىز ەتۋ ءۇشىن ءتيىمدى جانە قولايلى قۇرىلىم الاڭىن ورناتۋ. قازىرگى تاڭدا الەمنىڭ 26 مەملەكەتى كەڭەس قۇرامىنا ەنگەن. سونىمەن قاتار, 9 مەملەكەت پەن 5 حالىقارالىق ۇيىم باقىلاۋشى رەتىندە قاتىسادى. تاياۋدا بۇۇ باس اسسامبلەياسىنىڭ 72-ءشى سەسسياسى اياسىندا قازاقستان پرەزيدەنتى باستاماسىنىڭ 25 جىلدىعىنا ارنالعان, كەڭەسكە مۇشە ەلدەردىڭ سىرتقى ىستەر مينيسترلەرىنىڭ بەيرەسمي كەزدەسۋى ءوتتى. وندا قاتىسۋشىلار حالىقارالىق كۇن تارتىبىندەگى وزەكتى ماسەلەلەردى تالقىلاپ, فورۋمنىڭ شيرەك عاسىرداعى جەتىستىگىن اتاپ ءوتىپ, ۇيىمنىڭ الداعى ماقساتتارىن ايقىندادى.

اباي اسانكەلدى ۇلى,

«ەگەمەن قازاقستان»